गिनती 6
6
नाजीरन नियम
1ओळी योहोवा भगवान मूसा सी कयो, 2इसराएलीया सी कय कि जव तक कोय ओदेमड़ो या बायोर नाजीरन मानता, मतलब आपसा काजे योहोवा करता समर्पण करनेन खास मानता लेय, 3तव त्यो दाखमदू आरू मोंद सी अलग रये; त्यो नी ते दाखमदू आरू नी ते मोंदन सिरको पिये, आरू नी दाखन काहलो बी रस नी पीये, पुण दाख नी खाय, चाहे नीळ्ळी हय चाहे सुखली हय। 4जतरा दाहड़ा त्यो अलग रये हतरा दाहड़ा तक यो बीज सी लैय छलटा तक, जो डाळीया पोयदा हुये, या मोंद ओका मा सी काय बी नी खाय। 5ओळी जतरा दाहड़ा तक त्यो न्यारो रयनेन मानता मानीयो हतरा दाहड़ा तक त्यो हेका मुनका पर छुरो नी लगाड़े; आरू जव तक त्या दाहड़ा पुरा नी हय जाय, जिनाम त्यो योहोवा भगवान वाटे न्यारो रये, तव तक त्यो चुखलो बनसे, 6आरू आपसा मुनकान झटा वदाड़तो रये। जतरा दाहड़ा तक त्यो योहोवा भगवान वाटे न्यारो रये हतरा दाहड़ा तक काहला बी धोड़न पास मा नी जाय। 7चाहे ओको बाप, माय, या भाय, या बयनी बी मर जार जाय, ते बी त्यो हेनका कारण वीटोळ नी हयनो जुळे; काहकी ओका योहोवा भगवान वाटे अलग रयनेन सोहलाणी ओका मुनका पर रयसे। 8हेका अलग रयनेन सारा दाहड़ाम त्यो योहोवान करता चुखलो बनलो रये।
9कदाम कोय ओका पास मा उचकाळून मर जाय, आरू ओका समर्पण रयनेन दाहड़ान जी सोहलाणी ओका मुनका पर हुयसे त्यो वीटोळ हुय जाय, तीब त्यो चुखो हुयनेन दाहड़ा मा मतलब सातवे दाहड़ेओको मुनको बुड़ावे। 10आरू आठवे दाहड़े त्यो दूय हुली या पेरवान दूय पीला मिलाप वाळा तम्बून झोपला पर पुजारान क पास मा ली जाय, 11आरू पुजारो हेकी पापबलि, आरू दिसरा को होमबलि करीन ओका वाटे पछतावो करे, काहकी त्यो धड़न कारण सी पापी बनलो छे। आरू पुजारो उना दाहड़े ओका मुनकाक पछो चुखो करे, 12आरू त्यो आपसा सोपनेन दाहड़ा मा ओळी योहोवान करता सोपलो बने, आरू एक सालन एक गाडरान पीलो दोषबलि करीन ली आवे; आरू जो दाहड़ो हेका सी पेहल वीत गयो उना दाहड़ाक रिकामो गिने, काहकी ओका सोपलो रयनेन सोहलाणी वीटोळ हुइय गय।
13ओळी जव नाजीरन न्यारो रयनेन दाहड़ा पुरा हये, उना टेमो वाटे हेको यो नियम छे; मतलब त्यो मिलापवाळा तम्बून झोपला पर पुग जाय, 14आरू त्यो योहोवा भगवान वाटे करीन एक सालन विनगुनाळो गाडरान नर पीलो, पापबलि करीन एक सालोन विन गुनाय गाडरान मादा पिलो, आरू मेलबलि वाटे एक विन गुनाको मेढ़ो भेंट करे। 15आरू अखमीरी रोटान एक खिल्लो, मतलब तेल सी सेकायला मैदान फुलका, आरू तेल सी चुपड़ायली अखमीरी पापड़ी, आरू उना बलिन अन्नबलि आरू अर्घ; या सब चढ़ावो साते ली जाय। 16इनु सब को पुजारो योहोवा भगवान सामने पुगाड़ीन हेका पापन पापबलि आरू होमबलि को चढ़ावे, 17आरू पुजारो अखमीरी रोटान खिल्लान को सात मा गाडराक योहोवा भगवान वाटे मेलबलि करीन, आरू उको मेलबलिन अन्नबलि आरू पेय भेट को बी चढ़ावे। 18तव नाजीर आपसा न्यारो रयनेन सोहलाणी वाळा मुनका को मिलापवाळा तम्बून झोपला पर बुड़ावीन ओका झटान को उना आगठा पर न्हाक देय जो मेलबलिन नेचो हसे। 19ओळी जव नाजीर आपसा न्यारा रयनेन सोहलाणी वाळा मिनकान झटाक बुड़ाय देय तव पुजारो गाडरान पाकाल्ला कान्धा, आरू खिल्ला मा सी एक अखमीरी रोटान को, आरू एक अखमीरी पापड़ी लीन नाजीरन हातो पर मेल देय 20आरू पुजारो हेनको हालवनेन भेट करीन योहोवा भगवान सामने हालवे; हालवेली छाती आरू हाकल्ला शातळान को सात मा यो बी पुजारा वाटे चुकली बने; ओळतेन त्यो नाजीर अंगूर का रस पी सकतलो। 21“ नाजीरन मानतान। आरू जो चढ़ावो उको आपसा न्यारो हुयनेन कारण योहोवा भगवान वाटे चढावनो हयसे ओको बी यो नियम छे। जो चढ़ावो त्यो आपसी ताकतन अनसारे चढ़ाय सके, ओका सी जादा जसी मानता त्यो मानीयो, हसत आपसान न्यारो रयनेन नियमन अनसारे उको करनो पड़से।”
पुजारान सय बोरकोत आपने वाळो नियम
22ओळी योहोवा भगवान मूसा सी कयो, 23हारून आरू ओका दुयू पोर्यान सी कय कि तुमु इसराएलीयान को इनु वचनो सी सयबोरकोत आपीया करजो;
24योहोवा भगवान तुको बोरकोत आपे आरू थारी राखवाळी करे;
25योहोवा थारा मुयो पर ओको विजाळो चुमकाड़े, आरू थार पर दया करे;
26योहोवा ओका मुय को थारे भेणी करे;
आरू तुको शांती आपे।
27“इनीये रीतिये त्या म्हारा नाव को इसराएलीयान राखसे, आरू हांव हेनको बोरकोत आपीया करीस।”
The Dhankavi Bible © The Word for the World International and Dhankavi Mandli, Khargon, Raykhed, Nandurbar, Maharashtra 2025