एस्तेर 9
9
यहुदी अपसा वेरीक नाश कोरे
1अदार नावोन बारवे मोहनेन तेरवे दाहड़े क, जेने दाहड़े राजा नु हुकुम आरु कायदो पुरो हयने क हुतो, आरु यहुदियो क वेरी उना पोर प्रबल होयनेन आशा राखता हुता, पुन एरा वीपरीत यहुदी आपसा वेरी पोर प्रबल हुया; उना दाहड़े, 2यहुदी लोगहन राजा क्षयर्ष क आखा प्रान्तो मा आपसा-आपसा नगर मा एकठा हुया, की ज ओको हानि कोरने क यत्न कोरे, उना पोर हाथ चालाड़े। कुय ओको सामनो नी कोर सक्यो, काहकी ओको बीक देश-देश क आखा लोगहन क मन मा समाय गुयो हुतो। 3पुन प्रान्तो क आखा हाकीमो आरु अधिपतीयो आरु मुखिया आरु राजा क कामकरन्या न यहुदियो नु सहायता कोर्या, काहकी ओका मोन मा मोर्दके क बीक समाय गुयो हुतो। 4मोर्दके ते राजा क याँ घनो प्रतीष्ठित हुतो, आरु ओकी कीर्ती आखा प्रान्तो मा फेल गुय; पुन उना मानुस मोर्दके नु महिमा वदरी गुय। 5अत: यहुदियो न आपसा आखा वेरी क तलवार सी मारीन आरु घात कोरीन नाश कोर नाख्या, आरु आपसा वेरी सी आपनी मोरजी ओनसारे बर्ताव कोर्या। 6शुशन राजगढ़ मा यहुदियो न पाच सोव मानसो क घात कोरीन नाश कोर्या। 7हुये पर्शन्दाता, दल्पोन, अस्पाता, 8पोराता, अदल्या, अरीदाता, 9पर्मशता, अरीसे, अरीदे आरु वेजाता, 10अर्थात् हम्मदाता क पुर्य यहुदियो क वेरी हामान क दसु पुर्यो क वी घात कोर्या; पुन ओको धन क नी लुट्या। 11तेने दाहड़े शुशन राजगढ़ मा घात कोर्या हुया नु गिनती राजा क सोमवाड़्या गुया। 12तोत्यार राजा न एस्तेर रानी सी कयो, “यहुदियो न शुशन राजगढ़ज मा पाच सोव मानसो आरु हामान क दसु पुर्या क वी घात कोरीन नाश कोर्या छे; अळी राज क दिसरा प्रान्तो मा हुये नी जाने काय-काय कोर्या होसे! हेमी एरेसी जादा तारो निवेदन काय छे? हुयो वी पुरो कर्यो जासे। आरु तु काय माँगती छे? हुये वी तुसे आप्यो जासे।” 13एस्तेर न कयो, “कदाम राजा क स्वीकार होय ती शुशन क यहुदियो क आज क समान कल वी करने क हुकुम आप्यो जाय, आरु हामान क दसु पुर्या फांसी क खम्बो पोर लटकायो जाय।” 14राजा न कयो, “असो कर्यो जाय,” यो हुकुम शुशन मा आप्यो गुयो, आरु हामान क दसु पुर्या लटकाय गुया। 15शुशन क यहुदियो न अदार महीना क चोदवे दाहड़े क वी एकठा होईन शुशन मा तीन सोव मानसो क घात कोर्या, पुन धोन नी लुट्या।
16राज क दिसरा प्रान्तों क यहुदी एकठा होईन आपसा-आपसा जीव वाचाड़ने क लीय उबा हुया, आरु आपसा वेरी मा सी तीन वीस ने पोंद्रे हजार मानसो क घात कोरीन आपसा वेरी सी आराम जड़्यो; पुन धोन नी लुट्या। 17यो अदार मोहना क तेरवे दाहड़े क कोर्यो गुयो, आरु चोदवे दाहड़े क हुये आराम करीन भोज कर्या आरु खुशी क दाहड़ु ठहराया। 18पुन शुशन क यहुदी अदार मोहनान तेरवे दाहड़े क, आरु तेनेत मोहनेन चोदवे दाहड़े क एकठा हुया, आरु तेने मोहनेन पोंद्रवे दाहड़े क हुये आराम करीन भोज क आरु खुशी क दाहड़ो ठहराया। 19एने कारण देहाती यहुदी ज वीगुर सोहोरपनाह नु नगर मा रोहता छे, हुये अदार मोहनान चोदवे दाहड़े क खुशी आरु भोज आरु खुशी आरु आपसा मा भोजन सोमान मुकळने क दाहड़ो नेवाड़ करीन माने छे।
पुरीम तीहवार टाकनो
20एनी वातो क वाराम लीखीन, मोर्दके न राजा क्षयर्ष क आखा प्रान्तो मा, काय धड़े काय छेटा रोहनेवाळा आखा यहुदियो क पास चीट्ठियाँ मुकल्या, 21आरु यो हुकुम आप्या, की अदार मोहनान चोदवे आरु तेनेत मोहनेन पोंद्रवे दाहड़े क होर वरीस मनायो जासे। 22जेरेम यहुदियो न आपसा वेरी सी आराम जड़्यो, आरु यो मोहनो जेरेम शोक खुशी आरु वीलाप खुश मा बदली गयो; ओका जेवनार आरु खुशी आरु एक दिसरा क पास भोजन चीजे मुकळने आरु कंगालो क दान आपने क दाहड़े माने। 23अत: यहुदियो न जोसा सुरु कोर्या हुता, आरु जसो मोर्दके न उको लीख्यो, तसोज करने क पाको कोर लेदो। 24काहकी हम्मदाता अगागी क पुर्य हामान ज आखा यहुदियो क वीरोधी हुतो, हुयो यहुदियो क नाश करनेन वीचार कोर्यो की, आरु ओको मिटाय नाखने आरु नाश करने क लीय पुर अर्थात् चीट्ठी नाखाड़्यो हुतो। 25पुन जोत्यार राजा न यो जान लेदा, तोत्यार हुयो हुकुम आप्यो आरु चीट्ठि लीखवाड़्यो की ज दुष्ट वीचार हामान न यहुदियो क वीरुद्ध कोर्यो हुतो चो ओकाज मुनका पोर पलट आवे, तोत्यार हुयो आरु ओका पुर्या फांसी क खाम्बा पोर लटकाड़यो गुयो। 26एने कारण उना दाहड़ा क नाव पुन बुल सी पुरीम राख्यो गुयो। एनी चीट्ठी क आखी वातो क कारण, आरु ज काहि हुये एना वाराम देख्या आरु ज काहि उना पोर वीतलो हुतो, ओका कारण वी 27यहुदियो न आपसा-आपसा लीय आरु आपसी ओवलीयाद क लीय, आरु उना आखा क लीय वी ज उनामा मिळ गुया हुता यो पाक्को वीचार कोर्या, की उना लेख क ओनसारे होर वरीस ओका टाकला टेम मा हुये ये दुय दाहड़ा माने। 28आरु पीढ़ी-पीढ़ी, कुल-कुल, प्रान्त-प्रान्त, नगर-नगर मा ये दाहड़ा फोम कोरे आरु मान्या जासे। आरु पुरीम नावोन दाहड़े यहुदियो मा कोदी नी मिटसे आरु ओको फोम ओका ओवलीयाद सी जातो नी रोहसे। 29ओळी अबीहेल नु पुराय एस्तेर रानी, आरु मोर्दके यहुदी न, पुरीम क वाराम यी दुसरी चीट्ठी मोटा होक क भेळ लीख्या। 30एरी चीट्ठि मोर्दके न क्षयर्ष क राज क, एक सोव सत्ताईस प्रान्तों क आखा यहुदियो क पास शान्ती आपनेवाळी आरु वारु वातो क भेळ एना मोतलोब सी मुकल्यो, 31की पुरीम क उना दाहड़े क खास टाकलो हुयो टेम मा मोर्दके यहुदी आरु एस्तेर रानी नु हुकुम नु ओनसारे, आरु ज यहुदियो न आपसा आरु आपसी ओवलीयाद क लीय ठान लेदो हुतो, ओका ओनसारे वी उपवास आरु वीलाप कोर्यो जाय। 32पुरीम क वाराम क यो कायदो एस्तेर नु हुकुम सी वी स्थिर कोर्यो गुयो, आरु ओकी वात कीपात मा लीखी गुय।
The Dhankavi Bible © The Word for the World International and Dhankavi Mandli, Khargon, Raykhed, Nandurbar, Maharashtra 2025