एस्तेर 8
8
यहुदियो क आपसाक वाचाड़नेन होक जड़नो
1तेने दाहड़े राजा क्षयर्ष न यहुदियो क वीरोधी हामान क घरबार एस्तेर रानी क आप देदो। मोर्दके राजा क सामने आयो, काहकी एस्तेर न राजा क बताड़ी हुती, की ओकासी ओको काय नातो हुतो 2तोत्यार राजा न आपसी ची मुंदी ज हुयो हामान सी ली लेदो हुतो, निकाळीन, मोर्दके क आप देदो। एस्तेर न मोर्दके क हामान क घरबार पोर होकदार्यो नेवाड़ कोर देदो। 3ओळतेन एस्तेर दिसरी वार राजा सी कवी; आरु ओका पाय पोर पोड़, आसा उहावीड़न उनासी गिड़गिड़ावीन वीनता कोर, की अगागी ओवलीयाद क हामान नु बुराई आरु यहुदियो क हानि नु ओको वीचार निष्फळ कोर्यो जाय। 4तोत्यार राजा न एस्तेर भेनी सोनान राजडोन बोड़ायो, तोत्यार एस्तेर उठीन राजान सामने उबी हय; आरु कोहने लागी। 5“कदाम राजा क स्वीकार होय आरु हुयो म्हारेसी प्रसन्न छे आरु यी वार ओको वारु जान पोड़े, आरु हांव वी ओको वारु लागती होय, ती ज चीट्ठियाँ हम्मदाता अगागी क पुर्य हामान न राजा क आखा प्रान्तो क यहुदियो क नाश करने नु वीचार कोरीन लीखाड़्यो हुतो, ओको बदलने क लीय लीख्यो जाय। 6काहकी हांव आपसी जाती क लोगहन पोर पड़नेवाळी उनी पिड़ा क काहने रीते सी देख सकीस? आरु हांव आपसा भास्यो क वीनाश क कोसी देख सोकीस?” 7तोत्यार राजा क्षयर्ष न एस्तेर रानी सी आरु मोर्दके यहुदी सी कयो, “हांव हामान क घरबार ते एस्तेर क आप चुक्यो छे, आरु हुयो फांसी क खाम्बा पोर लोटकाय देदो गुयो छे, एकालीय की हुयो यहुदियो पोर हाथ उठायो हुतो। 8अत: तुमु आपनी समझ क ओनसारे राजा क नाव सी यहुदियो क नाव पोर लीखु, आरु राजा नु मुंदी क छाप वी लागाड़ु; काहकी ज चीट्ठी राजा क नाव सी लीखी जाय, आरु ओका पोर ओकी मुंदीन छापो लागाड्यो जाय, ओको काय वी बदल नी सोकतो।” 9तेने टेमे मोतलोब सीवान नावोन तीसरा मोहना क तेवीसवे दाहड़े क राजा क लेखक बुलाया गुया आरु जीना-जीनाक वातोन हुकुम मोर्दके न ओको आप्यो हुतो, ओको यहुदियो आरु अधिपतीयो आरु भारत देश सी लीन कुश लगुन, ज एक सोव सत्ताईस प्रान्त छे, उना आखा क अधिपतीयो आरु हाकीमो क एक-एक प्रान्त क आकड़ा मा आरु एक-एक देश क लोगहन नु बुली मा, आरु यहुदियो क उना आकड़ा आरु बुली मा लीखी गय। 10मोर्दके न राजा क्षयर्ष क नाव सी चीट्ठियाँ लीखाड़ीन, आरु उना पोर राजान मुंदीन छापो लागाड़ीन, छाटा चालनेवळी सरकारी घुल्ला, चचर गोदड़ा आरु पोर सवार करने वाळा क हाथ मुकली देदो। 11इनु चीट्ठियो मा आखा नगरों क यहुदियो क राजा क भेनी सी हुकुम आप्यो गुयो, की हुये एकठा होये आरु आपसा-आपसा जीव वाचाड़ने क लीय तीयार होईन, जेनी जाती एने प्रान्त क लोगहन अन्यान कोरीन ओको एने ओका बायरा आरु बाळ-बोच्चा क पीड़ा आपनो चाहे, ओको घात आरु नाश कोरे, आरु ओकी धन सम्पत्ती लुट लेये। 12आरु यो राजा क्षयर्ष क आखा प्रान्तों मा एकुज दाहड़े मा कोर्यो जाय, अर्थात् अदार नावोन बारवे मोहनेन तेरवे दाहड़े क। 13एना हुकुम क लेख नु नकलें, आखा प्रान्तो मा आखा देशों क लोगहन क पास उघाड़ली हयीन मुकल्या जासे; इनासी यहुदी उना दाहड़े आपसा वेरी सी पलटो लेने तीयार रोहे। 14अत: हरकारे वेग चलनेवाळा सरकारी घुल्ला पोर सवार होईन, राजा नु हुकुम सी उतवाळ कोरीन तावनी चाली गुया, आरु यो हुकुम शुशन राजगढ़ मा आप्यो गयो हुतो। 15तोत्यार मोर्दके निळा आरु श्वेत रंगोन राजकीय पुतल्या पेहरलो आरु मुनका पोर सोनान मोटो मुकुट मुकलो हुतो आरु सुळावो सन आरु बैंगनी रंगोन बागो पेहरलो हुतो, राजा क अगळ सी निकळ्यो, आरु शुशन नगर क लोगहन खुशी नु मारे ललकार उठ्या। 16आरु यहुदियो क खुशी आरु हर्ष हुयो आरु ओकी मोटी प्रतीष्ठा हयी। 17आरु जेना-जेना राज, आरु यहुदयो क खुशी आरु हर्ष हुयो, आरु ओको भोज कोरीन उना दाहड़े क खुशी क दाहड़ो मान्या। आरु उना देश क लोगहन मा सी बेसका यहुदी बोन गुया, काहकी ओका मोन मा यहुदियो क बीक सोमाय गुयो हुतो।
The Dhankavi Bible © The Word for the World International and Dhankavi Mandli, Khargon, Raykhed, Nandurbar, Maharashtra 2025