Jakobus 2
2
Mbue hanguruen mandrn ad hom ndramed, golnisden su masi.
1Mu ndere, ar mu boro ndoui ad Ndorlaben adu Jesu Kristo ad Ndorlaben ber gor lundielang, mbue de mugueni su ndramed ber boan na ge molhe. 2Dege heb longu ogoro: Ar hom ndramed i meher le lodu ademu, i gin nouni mandrn e lomon gle memrad dsoln, gle salion ber gold, le salo hian hian ge, ma hom ndramed molhege i meher bersi le lundieum, heb memrad aden bui, salo aden heb hian rosan bugane, 3mu da ilndri ge labenen le salo aden hian ge, le nounou aden mamali ge, mu vong le ndro i, mu bai: Lugdo im logna ogo hian ge. Muren mu vong le ndro ndramed molhege, heb memrad aden bui, gonan uo lugdo im boan de ibdi heb logna ogo momen i vonei le adem. 4Hanguruen ademu i da heb monen bui, mu hanguruen momen ge le bergolmu. 5Mu ndere hian, ha hirong nongen ordo. Aga hi derbe, Jehova gin loh su ndramed molhege ber boan, heb memrad asu bui, i beg hengen le ndro su memrad ber gor lundielang, i golnisden su ndramed molhege dege ogoro, i beg hengen le ndro su gor aden lundielang, dege i gin bai le ndro su goru, de bui? 6Mu ge, mu hanguruen momen le bergolmu le ad ndramed ogoro. Sie ir ndounen su ndramed ber boan ogo? Su ge, su labenen ber gor, su bo momen le ndro su ndramed, su rui su le gord sidesi, de bugane? 7Su ge, su boii ngarn ad Ndorlaben, mu da gin ibdi Ndorlaben ademu, be su gin surhi mu gle ndran.
8Aga ndangen, ar mu ghanguruen nongen ad Jehova hian monen ge su gin hondre goru: Golmgisden homo i da baghege ndro uo, dege voamiso mandrm, uo bo hian ge, be uo ghinen i. 9Ar mu hanguruen su ndramed le memrad asu ge, mu bo longu momen ri, nongen ad Jehova i dieni mu. 10Ar homo i hinen nongen ad Jehova masi, i bieni nongen aden hendre ge, i gin hangaini nongen ad Jehova masigane. 11I ogo i da gin vong, i gin bai: Mbue robuldi nambulem, i vong dagara lie: Mbue daii homo. Be uo bogulue nambulem hian ge, ma uo daii hom ndramed, uo bo longu momen le ndro Jehova. 12Hian absou nongen ademu, ghinen longu admu le bormarn ad Ndorlaben, i da dieni mu gle nongen aden ge. 13Gord manden ir belengen homo, i ndoun ndoun le ndro homo ber boan, de danen ibdi heb gahaloseli le ndro ndern bui. Homo i da ibdi gahaloseli le ndro ndern, gahaloseli aden ir ndounen gord, i beg meher ndro i.
Homo i boro ndoui ad Jehova ndangen, i bo mburer aden lie.
14Aga i hi derbe, mu ndere hian? Ar homo i bai, i gin boro ndoui ad Ndorlaben, ma longu aden i de heb hian bui, ndoui ber lang de danen rumburdi hi derbe? 15Be salo ad ndere de bosom bugane, be gan anen bui, 16i hi derbe ar homo ademu i vong le ndro i: Uo al le mandri ad Jehova, gien gan anem, gilgi salo adem, uo de hengen le ndro i gan bui, uo de hengen le ndro i salo bugane, ndangen nongen adem i molhege le ndro i. 17Dagara hom ndramed i da boro ndoui ber lang i gina molhege le ndro i, be heb longu aden hian bugane. 18Malabo homo i beg vong me ndro io, uo ge, uo danem boro ndoui ber lang. Io ge, io bo longu hian ge. Hian bosilieni me ndro io ndoui adem ber lang, be heb longu adem hian bui, io beg bosilieni le ndro uo longu ordo hian ge. Aga i vonei: Io gin boro ndoui ber lang. 19Uo danem i, uo gin boro i: Jehova i Ndorlaben homo ge, aga i hian, aga i monen, su lao ad Satan, dagara beld Satan lie i danen i lie Jehova i Ndorlaben homo ge, i ha noh i ha rerr leri. 20Malabo uo danem, hanguruen adem i heb monen bui, aga i momen, ar homo i gin boro ndoui ber lang, be heb longu aden hian bugane, ndoui ber lang gina molhege le ndro i.
21Damen adu Abraham i gina monen ge le longu aden hian, be i gin dohor ndurn Isaak le geao ad Jehova, de bui? 22Malabo uo danem ilndri longu aden hian ge, ma ndoui ber lang i da ndro i bersi, i gin bo longu hian ge, i gin boro ndoui ber lang leri. 23Dege Nongen Helian i vong, i bai: Abraham i boro ndoui ad Jehova, Jehova i hanguruen: Abraham i monen gane, i bosoui i: Gous ad Jehova. 24Danmu ilndri malabo, ndramed na ge monen le longu aden hian ge, ndoui ber lang i de vonei bui le hinen i monen bui. 25Ndurbihin Rahab i gina monen ge le longu aden hian, be i gin sobani su gamel holel asu Israel, i gin lulueni su le boan, dansu vob le nemesu ndremda rah asu. 26Aga ndangen, mandrn ad hom ndramed ginmad, be meluan gin bieni i, dagara ndoui ber lang gina molhege le ndro hom ndramed, be longu aden heb hian bui.
موجودہ انتخاب:
Jakobus 2: LLENT
سرخی
کاپی
موازنہ
شئیر
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Published by the British and Foreign Bible Society 1956