Timoteus I 6
6
Heb nongen le ndro su lao dandendegei.
1Be ndorlaben homo gin semani su lao dandendegei aden le moni, de le memrad aden, hian su lao dandendegei, gabmugueni ndorlaben asu, debosan homo i boii ngarn ad Jehova, ma nongen aden helian. 2Su lao dandendegei, ndorlaben asu i hom lao ad Jehova hohunan, hian, su gabmugueni ndorlaben asu, mbue su hanguruen i hom ndere, io de delengo le nongen aden bui. Io ha lengi su gabmugueni su ndorlaben, su lao ad Jesu Kristo, hanu le asu, su gob mburer le ndro ndorlaben hian monen ge.
Su ndremda hernou bahilou.
3Ghenunuen su le longu ogo, bohernou le ndro su longu ogo. Ar homo i henunuen su le nongen, i nongen ad Ndorlaben adu Jesu Kristo bui, be homo i de henunuen su le bern ad Kristo bugane, 4i de danen hebsa bui, i de danen hanguruen heb monen bugane, i gina sik, longu hendre e hendre molhege nongen le iil, nongen le bahun, nanenongen aden i gin hinen meluan momen ge, 5de danen hanguruen nongen monen, bern hian ge bugane, su ghanguruen surien le mburer asu ge. 6Ar homo i gin ibdi bern houen ad Kristo, i do da hian ge le gor aden ndangen, gan anen, memrad aden, Ndorlaben gin hengen le ndro i, aga i vonei le ndro i. 7Iou de gin huri heb memrad le gor boan bui, dandu hedi giao heb memrad ber gor ogo bui, bersi muren be iou gbieni gor boan. 8I vonei me adu be gan e salo i da ndro du. 9Su da hanguruen memrad ber boan, beg huri me goure memrad dsoln, Satan i seslaini su le longu hendre e hendre, beg hosi su, le hangungerou asu, su gina momen ri, su na glos. 10Meruan dsoln, aga su da voaniso moni, i dege ngondrn le gei heie momen ge, mbuegei ber gei ogo gina momen. Su holel su da gin hangungerou memrad ber boan, gin bieni sal monen, su ha dogi momen ge, ngendiasu dsoln.
11Uo ge, uo hom ndramed ad Jehova, mbue hangungerou dege ogoro. Hanguruen longu hian monen ber lang, ma bern monen ge, e boro ndoui ad Ndorlaben e golnisden aden, ghanguruen hian monen ge, dege i gin hinen i le ndro su ndramed ber boan. 12Ibdi bahun hian ad Jehova, e bore ndoui aden, hilou ge sal adem, hilou, e ngab memrad ber lang, Ndorlaben gin loh uo, beg hengeni le ndro uo, dege uo gin boharni le ndro su mabosanged. 13Io vong le ndro uo le bormarn ad Jehova, i da mamaren ge, i da gin mengseni longu masigane ber boan, i mamaren, io ha vong le bormarn ad Jesu Kristo, i da gin boharni le bormarn ad Pontius Pilatus le longu aden ber lang: 14Ghinen longu masigane, io gin bai le ndro uo, ha dogi monen ge le sal ad Ndorlaben, meluam na ge rosan, mabenan Ndorlaben adu, Jesu Kristo, i gmeher. 15Muren longu masigane na gmehere, dege bohon i gin bai, i Ndorlaben manden ge, i danen hinen i, dege i gin bai, i King asu King masi, i Ndorlaben asu Ndurhian masi, 16i homo ge i de somad bui, i da mamaren sidesi, logna aden i da le sul ber lang, le engerang ad Jehova, hom ndramed de danen lele bormarn bui, homo ber goru de gin ilndri i masou. Iou gabmugueni, io gabmugueni ndoui aden, bing si e rang si sidegesi. Amen.
Nongen ad Paulus le ndro su, memrad asu dsoln.
17Absou le ndro su, memrad asu dsoln, mbue su ghanguruen manden le asu, mbue su hanguruen memrad asu, su belengeni Jehova ge, i da hengen me ndro du longu hendre e hendre ber boan monen ge. 18Absou le ndro su, su gob mburer hian gle memrad asu, su osbani su, heb gan ansu bui, su hengen le ndro su, memrad asu bugane. 19Be su ghinen i dagara, su huri me goure memrad ber gor lundielang, su horuan, su mamaren gleri. 20O Timoteus, orgulue memrad adem ber lang, orgulue meluam le nongen molhege, dege su holel su ha bosoui ri, dansu longu masi monen ge. 21Su holel asu, su gin bieni sal hian, su ha dogi momen ge. Golnisden ad Ndorlaben i da ge ndro uo.
موجودہ انتخاب:
Timoteus I 6: LLENT
سرخی
کاپی
موازنہ
شئیر
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Published by the British and Foreign Bible Society 1956