Amos Uram 9
9
Amos biryi liki amubaryi dinyi eibmou kunumna ara, Er Iya Erebdobnyi bira sun ninyi dama oboka uk dan keil dungna dam tikmou asi eibmou uram deyok
9:1-6
1Amos biryi kunumna liki amubaryi dinyi eibmou to asi nukmou. Ara, ato eboka nukmou, “Er Iya Erebdobnyi bira ninyi dama uk dan keil dungna dam tikmouci, uram eboka arungmou asi eibmase. Ara, uram ato eboka arukmou asi kekebmase,
‘Yuma ingwelen abyokomna kisok ai asi weikanun iboka kulabdarur.
Ba, ai bisik sangkurya nirya waring-waring eboka ururub sakoka ninyi nirya kisok deici siklibkwande.
Asi, takdongobkwande nang ara Niryi ya sekoka obkwan.
Ba, sun kankan aryi ninyi tentok ababyi ton cukoka inirdarorbana kum kubkwande.
Ani, sun kankan aryi ninyi tentok aryi kum lebdandobkwande. Eda, sun nirya kum dansekwaming.
2Sunci wikibkaboka ninyi din nang wengbaraming mutuk dam wengdorbinmangnyi ababyi,
Ni taruk aryi a wengdorbinmangnyi ai aryi kilibtaleboka bodeiriryankwan.
Ani, sunci imtam welebindomangnyi ababyi,
Niryi sunsi imtam aryi yakwetebkwan.
3Ani, sunci Karmel mutuk kon ai inibdandobmangnyi ababyi,
Niryi sunsi ingkirikokabniryi doboka boyankwan.
Sunci Ni urasin dam aryi weik me kwan umbura kobdob inirdarorbinmangnyi ababyi,
Niryi kwatima asi aruknyi ba, a bindoka kunmangnyi ai aryi si tobkwande.
4Sun mar ordana nang aryi tabwe deboka era mutuk deirirlorbinamingnyi ababyi,
Niryi sun mar ordana nang asi aruknyi ba, ya sekoka obkwaming.
Ni urasin danguboka sun tam deibkwan ara sunsi teleb kun dinyi ati, kum deibkwan.
Eda, sunsi wenebkwan ati, Ni urasin sun tam deibkwan,’ ebmou asi kekebmase.
5Er Imtamnyi Iya Erebdobnyi bira ilil tenenanyi kurur.
Erci tukwe asi bol libdeci uca mutuk eimna dorur tukwe nirya eimlamnande.
Ba, ninyi tukwetam kunung nang nirya ara mambul kanya bonung.
Ura, tukwetam nang ara Mesir mutuk me si Nil aryi lutamuboka im sungnande to kuboka im sukoka tukwe ai maryurbanung.
6Er Imtamnyi bira Er kun ai imtam asi erebdeiboka dobdobunyi kurur.
Ani, tukwetam asi Er ai aruma lamna duma erebdeiboka dobdobunyi.
Tonda, Erci weik me kwan asi doboka bulubdeibmaci ani,
dobkweteboka tukwetam mo cemdeirirurnyi kurur.
Er si ara Er Iya Erebdobnyi biryi ukurur asi eibmase,” eboka nukmou.
Er Imtamnyi biryi sun Israel nang asi wiamuryok, “Akatei nang ara Ni li,” ebmou uram deyok
9:7-10
7Er Imtamnyi biryi sun Israel nang ati ato ebmou,
“We, sun Israel nang a, sun wingdan kanya boboka, ‘Nunda Erci nun yuk wibmasouci, Mesir mutuk aryi boyanansou.
Ati, nunda bikdob nang kunub bok, yuk atei nang ara malyi atei nang kununga,’ tenerdana mem.
Niryi sun Israel nang asi dirnilisunun to sun yuk atei nang Etiopia nang ababyi dibniliboka boukwe kimnun.
Tonda, sun Filistin nang asi Kaftor mutuk aryi dibniliboka boyananse.
Ani, Aram nang asi Kir mutuk dam aryi dibniliboka boyananse.
8Diba ati, Ni Imtamnyi, Iya Erebdobnyi bira sun Israel nang sun malyi kun dinyi ara bita eirkatasunun.
Ati, Niryi sunsi tukwetam akiryi dib ati kulaboka wenebkwansin.
Bok, Niryi nirya oboka kum danardeirina kum kubkwansin,”
eboka Er Iya Erebdobnyi biryi ato ebmou.
9Ato ebmou cok, ton ato ebmurubmou,
“Diba kobdob aryi Niryi sun Israel nang wenebkwamanyi ati sun yuk mutuk nang asi arukdongobkwan.
Ani, Niryi sun yuk atei nang-yuk atei nang kankan aryi sun Israel nang asi wibkwan ara gandum du suwa deici deibdongoboka wimdaming to kubkwan.
Ba, sunda gandum du wimangiryi suwa teleb aryi yangabdeiboka wimangnyi uca,
mitik keil du ababyi tukwe ai ton sangna kum kurande to kuboka sun yu kuramingnyi nang ara sun Israel nang kankan aryi wiboka dobkabokwan.
10Ba, sun Ni uram keken nang kankan malyi kundarur nang ara ato endarur,
‘Sun a mambul donung dinyi ara nun dam ara kum domyasurur.
Ani, nunda kum bol libdenkwansir,’ endarur.
Ati, Niryi sunsi diba darabdeiboka ebkwansin.
Ara, sunda mar ordan dam aryi nirya dibsekwandum,”
eboka Er Imtamnyi biryi ato ebmou.
Er Imtamnyi biryi lemna uram deyok eboka kunubdeibmou uram deyok
9:11-15
11Er Imtamnyi biryi sun Yehuda mutuk nang aminda kubkwamnyi to ati, ato eboka kunubdeibmou.
“A tum aryi Niryi Daud atei dakwe ara tubto tamuboka dobkwan.
Ai abilinga telebsakwe dinyi ara Niryi ibdongobkwan.
Ba, dalubsakwe dinyi ara Niryi tamuboka tikeibkwan.
Niryi akatei tubto tamuboka dobkwan ara minob doramnyi atei ato kuboka dobkwan.
12Ba, sun Edom yala nang takdongoamingnyi nang ara Yehuda mutuk nang aryi talebkwaming.
Tonda, Ni mikib amwetam kun mutuk nang asi sunci talebkwaming,” eboka
a dinyi nirya kunubdeibkwandanyi Er Iya Erebdobnyi biryi ebmou.
13Ura, ton ato ebmou, “Diba kobdob aryi aminda ara uki teleb tentok ton berekwansir.
A talak uki ara gandum du wa ibmamunyi aryi uki kuna kum uca, du ola moubci ba, ya sekwandum.
Ba, co anggur ababyi du koubmamunyi talak uki kuna kum uca, du ola moubci ba, dakoka yung uruboka boun asa yibkwandum.
Ara, mutuk dub aryi me lum dorkweterande to kubdeibkwansir.
14Niryi wibmase atei nang Israel nang asi tamuboka teleb kubdeibkwan.
Ba, sunci dalubsiniamingnyi atei ara tubto tamuboka doboka kubdobkwaming.
Akatei kubingiryi, anggur du wa in dam ibingnyi ura, du yung uruboka yibkwaming.
Ani, yuk co-yuk co du yin co ababyi wa iboka kouboka du dakokabingiryi, yibde kubkwaming.
15Ba, Niryi sunsi sun tukwe dam kaibkwan ara iya bun keil ato kubkwan.
Ba, sunti karebmase mutuk dam kubkwaming ara,
yuk mutuk nang aryi boboka yuk mutuk deirlorbinman kum kubkwande,”
eboka sun Nai Iya Erebdobnyi Er Imtamnyi biryi kunubdeibmou.
موجودہ انتخاب:
Amos Uram 9: MTG
سرخی
کاپی
موازنہ
شئیر
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
@LAI 2007 (New Testament), @LAI2022 (Old and New Testament)