Amos Uram 8
8
Amos biryi dumbaryi dinyi eibmou kunumna ara tower aling aryi co du kibdongoboka deibmou asi asing eibmou uram deyok
8:1-3
1Amos biryi kunumna liki dumbaryi dinyi eibmou to ati nukmou. Ara, ato eboka nukmou, “Er Imtamnyi Iya Erebdobnyi biryi kunumna ara ato lak kibdeibmou asi eibmase. Doua li berekamwe bok, tower aling tentok asi co du langdiboka kiboka deibmai asi lak kibdeibmou ba, eibmase. 2Ura, Erci ato eboka asibdenmanou, ‘Amos a, ara unatoa eibmarim do?’ eboka asibdenmanou. Uca, niryi ato ebmase. ‘Ni asing eibman ara, doua li berekwe bok asi, tower aling tentok asi co du langdiboka kiboka deibmang asi eibman,’ ebmase. Ba, Er Iya Erebdobnyi biryi nisi ato ebmanou,
‘Kanci co du eng obdau asi kiboka deibmang eibmarim to Niryi dinun uca, Ni wibmase atei nang Israel nang ara sun malyi kun dinyi ara co du eng orande to kubmar.
Ati, sun kuron uki ara Niryi kum daneibkwaman dam kubmar.
Niryi sun malyi kun dinyi ati, “Malyi a kunmanunga,” teneboka eiboka kum taklobkwan.
Niryi sunsi wenebkwan tenebse to kunuboka wenebkwan.
3Ba, Ni Imtamnyi biryi wenen dinyi karebkwan ba, ninyi dibkwaming ara ton boboka tukwe dongorbana kum kubkwaming aryi dantam-dantam nirya ninyi din nang asok dem kibkwande.
Ba, a uki tum ara sun Israel nang weik sienyi kun atei dam babyi ur Israel nang kun atei dam babyi mot semnamingnyi ai nirya ara engebkwaming.
Sunda, Er Imtamnyi biryi iya weik wenena aryi wenebsicei ati, ur dem kilikoka kubdobkwandarur.’
Ato eboka Er Iya Erebdobnyi biryi kunubdeibmou asi asing eibmase,” eboka Amos biryi nukmou.
Ton tam deici nang aryi ton yuk deici nang asi ining urubde yirdana ati yan memebmou uram deyok
8:4-8
4Amos biryi sun Israel nang asi ato ebmou,
“Sun a mutuk dam aryi utotoa kum nang asi malyi kimnandum nang ab,
sun mambul doraming nang asi orminingnandum nang ab ara a ebkwaman uram asi diboka kekebdarur.
5Ura, sunda ato tenendarur, ‘Ukura gandum du dekoka co bok talebkub talak dam kibkur do?
Wala oubmaci ura, wa in kum talak kimdur ara ola bisibkur do?
Ani, taruk louboka bun tum kiting yakna ola bisibkwamar talak do?
Ba, gandum du ikin kiklina malyi aryi kikliboka dengna weik-weik tabakdongoboka doronkub talak dam ola kibdur.
6Ba, ato kubibyi uca, co bok doronkwanub,’ tenendarur.
Ani, tonda ‘Sun mikib kum aryi sun yuk utotoa kubdobman kum nang ara
co bok mitikanun kareboka nun wa irmilin nang kibdobkwayeb,’ tenendarur.
Ani, tonda ‘Yuk nang asi manmalyi gandum du kareboka sun co bok nirya dobdobkwayeb,’ tenendarur.
7Ati, Er Iya Erebdobnyi bira sun Yakub yaldangna nang aryi dub ererdeirinungnyi kurur.
Erci Er mining si aryi sirya si darabdeiboka uram dobdeibwe.
Ara, ato eboka dobdeibwe, ‘Diba kobdob aryi, Niryi akatei nang sun iya yu dinyi ukunung dinyi ara luba kum kibkwan, iya kanya teneinkwan.
8Niryi wenebkwan ba, tukwetam ara mutuk nirya mutuk eimna dobkwande.
Ba, ninyi nirya mambul kanya bobkwaming.
Ato kubkwan ba, tukwetam mutuk nirya me Nil lutamuboka im sungnande to kubkwande.
Ba, a mutuk eimna aryi doboka kweblobkwande ba, ninyi kanya wingdu-wangdu kanya bobkwaming ara
Mesir mutuk me aryi im sungmaci ani, yuryibarande to kubkwande,’ eboka sirya dobdeibwe,” ebmou.
Kiting oba lilibkwande tum berekwande ani, ninyi engena weik engebkwaming uram deyok
8:9-10
9Ura, Amos biryi Er Imtamnyi biryi er dam ebmou asi ton ato ebmou,
“Er Iya Erebdobnyi biryi ato ebmar, ‘A uki tum ara ato kuboka kunubkwande.
Niryi kiting dukduk en tam asi kiting wekdeibkwan.
Ba, kiting dangbininmaca tam asi tukwetam mutuk nirya kunuk dangmiting ebkwande.
10Ani, sun weik uki tum kilkil asa buluboka wengnandum tum ara
mambul kanya boboka engebkwandum tum kibdeibkwansin.
Ba, a tum semnandum mot nirya ara engena urumna akwe kibdeibkwansin.
Ani, Niryi ninyi nirya asi mambul kanya bobmangnyi ati,
aling kolo a der arikdeiboka sun kisok otong nirya kukaboka babkala kumubdeibkwasin.
A uki tum ara Niryi sunsi engen kanya bobdeibkwansin.
Ara, sun mabwe tentok deibdamingnyi asi dibingnyi ba, boraming to kanya asi bobdeibkwansin.
Ba, a berekwande tum aryi ato dinyi kunubdeibnyi uca, sunda mambul aryi iya u sik doraming ato tum kibdeibkwasin,’
eboka Er Imtamnyi biryi ebmar,” ebmou.
Aminda kwaning ab, me ab atana li dobkwande uram deyok
8:11-14
11Er Imtamnyi Iya Erebdobnyi biryi ato ebmou,
“Diba ati, uki tentok berekwande.
A tum aryi Niryi yina atana li karebkwan.
Ara, kwaning sirik atana li kuma.
Ani, me sirik atana li kuma.
Eda, Er Imtamnyi uram kekena ati, kwaning me kuna atabkwande li karebkwan.
12Ba, sunci Er Iya Erebdobnyi uram kekena ati, yibinkirikoka weik me kwan koubkaboka-koubkaboka ingkirikirikwaming.
Ani, me utam aryi kuboka yaletam ingkiringbinkwaming.
Bok, Er Imtamnyi biryi sun dam uram ton kum ebkwande ba, ton kekerona kum kubkwaming.
13A uki tum ara sun nermabwe kabunyi teleb-teleb ara mitang aryi diblalakwaming.
Ba, sun mabwe kam nang mikib mabwe ara me mitang aryi diblalakwaming.
14Sun Samaria nang sun du ner si Asima si deib aryi uram erkataramingnyi nang ababyi wenen dinyi dobdobkwaming.
Ani, Dan mutuk nang asi, ‘We, sun molondarur ner, sun du ner bira iya kam kurur ner si deib aryi ebmasib,’ eramingnyi nang ababyi wenen dinyi dobdobkwaming.
Tonda, Bersyeba nang asi, ‘We, sun kanya deiboka molondarur ner, sun du ner bira iya kam kurur ner si deib aryi ebmasib,’ eramingnyi nang ababyi wenen dinyi dobdobkwaming.
Sunda daksakoka tukwe ai maryurbinamingnyi ara tubto burongna kum kubkwaming,”
eboka Er Imtamnyi biryi ebmou.
موجودہ انتخاب:
Amos Uram 8: MTG
سرخی
کاپی
موازنہ
شئیر
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
@LAI 2007 (New Testament), @LAI2022 (Old and New Testament)