रोमियो 9
9
परमेश्वरेरै चुणोरै मैहणु
1-3अबै अगर असु कोई बि परमेश्वरेरै प्रेमा किना अलग ना करि सकता, ता इस्राएलेरै भाई परमेश्वरा किना अलग किहीं अत्तै? मूं तेन्हैरै तेईनी बड़ा दुख आ जां हमेशा मिंडै दिला मझ तेन्हैरै तेईनी दुख मैहसूस भूंता। हकीकत मझ आंउ, अपड़ै ऐ मैहणुवां केरै बचावेरै तेईनी, आंउ ऐपु पन आरोप लांणानि जां मसीह किना अलग भूंणनी तियार आ। आंउ मसीह गवाह मनि करि सच बोलता। पवित्र आत्मा जां मिंडा अंतरात्मा बि गवाहि दींता कि ऐकेई सभ गलै सच अत्ति। 4सैक्यै इस्राएलेरै मैहणु अत्तै, सैक्यै परमेश्वरै गोद लैकरी आउलादिरै रूपा मझ चुणै। परमेश्वरै तेन्हैरै तेईनी अपड़ि महिमा प्रकट की; तैन्हांं सिंउ अपड़ा वायदा केया जां तेन्हांनि व्यवस्था दित्ती, सैक्यै सच्चै तरीकै सिंउ परमेश्वरेरी अराधना कातै, तैन्हैं परमेश्वरेरी प्रतिज्ञाय प्राप्त क्यौरी अत्ति। 5अब्राहम, इसहाक जां याकूब तेन्हैरै पूर्वज अत्तै जां शरीरेरै अनुसार यीशु मसीह तैन्हांं केरै वंशा किना थ्या। परमेश्वर जै सभनियां पन राज काता, तेसैरी तारीफ हमेशा भूंती रिय्हा। आमीन।
6पण ऐ मेईं सौचा कि परमेश्वरै अपड़ा वायदा पूरा ना केया, केईनी कि सैक्यै सारै मैहणु जै याकूबेरै वंशा किना अत्तै जां जै ऐपुनी इस्राएलेरै मैहणु शुणांतै, सैक्यै सारै मैहणु परमेश्वरै सच्चै मैहणु ना मंनै। 7अब्राहमेरै वंशा मझ जन्म लींणै ला-ऐ सभ जंणै तेसैरी सच्ची आउलाद ना बंणी गांहथै; केईनी कि परमेश्वरै अब्राहमा सिंउ बौलु, जै इसहाकेरै वंशा मझ जन्म लींतै, सैहै तिंडै वंश मनियुंणै। 8ऐठणीरा मतलब ऐ आ कि जै शरीरेरै अनुसार जन्म लींतै, सैक्यै परमेश्वरेरी संतान नत्तै, पण सिर्फ जैन्हैरा जन्म वायदेरै अनुसार भौरा, सैहै अब्राहमेरी संतान मनियुंतै। 9केईनी कि परमेश्वरै ऐहीं-चारै वायदा क्यौरा थ्या, कि “मूं अगलै साला ऐसै टैंमा दुबारे फिरी ऐईंणु जां तेख्णी साराय किना अक पुत्र पेईदा भूंणा।”
10यौतुवै ना, पण जेख्णी रिबका बि असेड़ै पूर्वजा इसहाका किना दुपराणी थी, तेख्णी तेसेरू पैटा मझ जुड़वा बच्चै थ्यै। 11-12बच्चै पेईदा भूंणा किना पेहिलै या भला-बुरा कंम कांना किना पेहिलै प्रभु रिबकाय सिंउ बोलोरू थियु कि, “तिंडै मोटै छौकरै, हल्कै छौकरैरी सेवा कांनी।” प्रभु ऐ लुहानेरै तेईनी बौलु कि सैक्या अपड़ि पसंद ऐपुवे बंणाता। जां जै तैन्हैं कियु सैक्यु बगैर वजहि थियु। 13ऐ ठीक तिहियें आ, जिहीं पवित्र शास्त्रा मझ लिखियोरू आ; “मीं याकूबा सिंउ प्रेम केया जां एसावा सिंउ बैर केया।” 14तां ऐसेरा मतलब कितु भुआ, क्या पिता परमेश्वर अन्यायि आ, बिल्कुल ना! 15केईनी कि परमेश्वर मूसै सिंउ बोलता,
“आंउ जैस पन दया कांनी चाहला,
तैस पन दया कांनी,
जां जैस-कोस पन कृपा कांना चाहला,
तेसै पन कृपा कांनी।”
16तां परमेश्वरा सैक्या मैहणु चुणना, जैस पन सै दया कांनेरा फैसला लींता; तेसैरी पंसद ऐस गलै पन निर्भर काति, कि मैहणु कितु चांहथै अत्तै या कितु कांनेरी कोशिश कातै अत्तै। 17केईनी कि पवित्र शास्त्रा मझ परमेश्वरै मिस्र देशेरै राजै फिरौननी बोलोरू थियु कि, “मीं तु राजा बंणाउरा, कि ताउ मझ अपड़ि सामर्थ लुहाउं जां मिंडु नाँईयेरा प्रचार इस संसारैरा मैहणुवां मझ भुईया।” 18ऐठणीरै तेईनी परमेश्वर जैस पन चांहथा, तैस पन दया काता जां जैस मर्जी तैस हठीलै बंणा दींता।
परमेश्वरैरा गुस्सा जां तेसैरी दया
19तां किछ मैहणुवां मूं सिंउ बोलणु; अगर ऐहीं आ, ता परमेश्वर किहीं बोलि सकता कि असै गलत अत्तै? केईनी कि सैक्या जै चांहथा तिहीं कांना किना तैस कोई बि ना रौकि सकता। 20मित्र तु केणु आ, जै परमेश्वरा सिंउ स्वाल काता? क्या कोई चीज अपड़ै बंणाणारै किना पुछि सकती कि, “तीं आंउ ऐतेई केईनी आ बंणाउरी?” 21क्या कोसक्यै कुम्हारैरा मिट्टी पन ऐ अधिकार ना, कि मिट्टिरै ऐक्यै ढ़ैरा मझां अक भांड खास कंमेरै तेईनी जां होरू भांड छोटै-मोटै कंमेरै तेईनी बंणाणैरा अधिकार ना? 22परमेश्वरानि अधिकार आ कि जै मैहणु तेनी बंणाउरै अत्तै, तैन्हांं सिंउ परमेश्वर अपड़ि मर्जी सिंउ जै चहिया, सै करि सकता। परमेश्वर अपड़ा गुस्सा लुहाना चांहथा थ्या, जां हर एकिरै विरूद्ध अपड़ि शक्ति प्रकट कांना चांहथा थ्या। जै नष्ट भूंणेरै हकदार अत्तै। पण परमेश्वरै ऐहीं ना कियु पण सब्र सिंउ सैक्यै सहन क्यै। 23(तेनी ऐहीं कियु) सैक्या लुहाना चांहथा थ्या कि सै क्यौता महान आ, जेख्णी तेनी तैन्हांं मैहणुवां पन दया की, जै तेनी अपड़ि महिमा मझ हिस्सैदार भूंणेरै तेईनी चुणोरै अत्तै। 24चाहै यहूदी भुईया या होरी जातिरा। असै सै चुणोरै मैहणु अत्तै। 25होरनियां जातिया केरै बारै मझ, परमेश्वरै होशे भविष्यवक्तेरी किताबि मझ बोलोरू आ;
“जै मिंडै मैहणु ना थ्यै, तैन्हांंनि मूं अपड़ै मैहणु बोलणु,
जां जै मूं प्यारै ना थ्यै, तैन्हांंनि मूं प्रिय बोलणु।
26जां जैस जगाय परमेश्वरै बौलु, कि
तुवे मिंडै मैहणु नत्तै,
तैड़ियै परमेश्वरा तेन्हांनि अपड़ि संतान बोलणु।” 27इस्राएलेरै मैहणुवां केरै बारै मझ भविष्यवक्ता यशायाह हक्कै दी-करि बोलता;
बेशक इस्राएलेरै मैहणुवां केरी गिणती
समुन्द्रेरै किनारेरी रैती बराबर भुईया,
ता तांबि तैन्हांं मझां थोड़े बचणै।
28केईनी कि प्रभु जल्दी-ऐ संसारैरा मैहणुवां केरा मजबूती सिंउ न्याय कांना।
29जिहीं भविष्यवक्तै यशायाहै बोलोरू थियु,
“अगर सर्वशक्तिमान परमेश्वरै असुनि वंशज भूंणैरी अनुमति ना दितोरी भूंती,
ता असु सदोम जां अमोरा शहरेरा मैहणुवां सैयि बंणी गांहणु थियु,
जै परमेश्वरै पूरी तराहि सिंउ नष्ट करि छडथियै।”
इस्राएलेरा अविश्वास
30असै जै बोलतै अत्तै, तेसैरा फायदा ऐ आ, कि होरी जाति अपांणा सही बंणाणैरी कोशिश ना थ्यै कातै, पण तेन्हैरै विश्वासेरै कारण, सैक्यै परमेश्वरा सिंउ सही बंणाईयोरै थ्यै। 31पण इस्राएलेरै मैहणु; मूसेरी व्यवस्थाय मनि करि अपांणा परमेश्वरै ला धर्मी घोषित करवांणा चांहथै थ्यै, पण सैक्यै धर्मी बंणना मझ सफल ना भुवै। 32ऐ किहीं भौ सकतु? ऐठणीरै तेईनी कि सैक्यै विश्वासै ला ना, पण भलै कंमै ला परमेश्वरा सिंउ धर्मी बंणनेरी कोशिश करींथ्यै; तैन्हैं मसीह ठुकरा दिता, जेसैरी तैस घौड़ा सिंउ तुलना करि सकतै जै मैहणुवंनी ठौकर दिवांता। 33जिहीं पवित्र शास्त्रा मझ लिखोरू आ, तका आंउ सिय्योन मझ अक ऐतिया घौड़ रखता, जै मैहणुवंनी ठौकर दी-करि ढ़ढै सुटणैरा कारण बंणता जां जै तैस पन विश्वास करैला, सैक्या शर्मिन्दा ना भूंणा।
موجودہ انتخاب:
रोमियो 9: CDJNT
سرخی
کاپی
موازنہ
شئیر
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.