रोमियो 10
10
1मिंडै विश्वासी भाईयो, मिंडै दिलैरी ईच्छा जां इस्राएलेरै मैहणुवां केरै तेईनी परमेश्वरा सिंउ मिंडी ऐ प्रार्थना आ कि परमेश्वर तैन्हांं बचाईया। 2केईनी कि आंउ तेन्हैरै बारै मझ ऐ गवाहि दी-सकता, कि तैन्हांं मझ परमेश्वरेरै तेईनी जोश आ, पण परमेश्वरेरी सेवा किहीं करियो, ऐठणीरै बारै मझ तेन्हैरी समझ सही ना। 3केईनी कि परमेश्वर मैहणुवां धर्मी बणांता, तैन्हांं ऐस गलैरा पता ना लगा कि, सैक्यै अपड़ै तरीकै ला धर्मी बंणनेरी कोशिश कातै थ्यै। ऐठणीरै तेईनी तैन्हैं अपांणा परमेश्वरेरी धार्मिकतायरै आधीन ना केया। 4केईनी कि व्यवस्थायरा मकसद अबै मसीहरै ऐईंणै ला पूरा भौ गियौरा, ता हर कोई जै मसीह मझ विश्वास काता, परमेश्वरा सिंउ धर्मी घोषित करियूंणा।
उद्धार सभनियांं केरै तेईनी
5केईनी कि मूसेरी व्यवस्थाय किना मेओरी धार्मिकतायरै बारै मझ, परमेश्वरेरै वचना मझ ऐक्यु लिखोरू आ कि जै मैहणु मूसेरी व्यवस्थायरा पालन काता, सैक्या व्यवस्थाय ला जींता रींहणा। 6पण विश्वासै ला मेईंणै बाई धार्मिकतायरै बारै मझ, पवित्र शास्त्र ऐ बोलता कि, “तु ऐपु किना मेईं पुच्छै कि स्वर्गा मझ कोस गांहणु?” (मतलब मसीह थल्लै धरती पनि अंणनैरै तेईनी!) 7या ऐ मेईं पुछतै कि “थल्लै अधोलोका मझ कोस गांहणु?” (मतलब मसीह मौरा मझां जींतैरी करि प्रननी अंणनेरै तेईनी!) 8ऐठणीरा मतलब ऐ आ कि “तुवे अपड़ै होंठै ला ऐस संदेशा मनि सकतै, जां अपड़ै दिला मझ स्वीकार करि सकतै” ऐक्या संदेश बोलता कि तुहां परमेश्वरा पन भरौसा कांना चेहिंथा, जेसैरा असै प्रचार कातै अत्तै।। 9उद्धार पांणेरै तेईनी अगर तु मुहां किना बोलि करि कि यीशु मसीह प्रभु आ। जां ऐहीं जांणि करि मैहणुवां केरै सांमणै यीशु मसीहरा अंगीकार करिया, जां अपड़ै मंना मझ विश्वास करिया, कि परमेश्वरै यीशु मौरा मझां जींतेरौरा, ता परमेश्वरा तिंडा उद्धार कांना। 10असै अपड़ै दिल सिंउ विश्वास कातै, ऐठणीरै तेईनी परमेश्वर असु धर्मी घोषित काता जां असै अपड़ै मुँहै ला बोलतै कि असै विश्वास कातै, ऐठणीरै तेईनी असै बचि गांहथै। 11केईनी कि यशायाह भविष्यवक्तै मसीहरै बारै मझ पवित्र शास्त्रा मझ लिखोरू थियु, कि “जै कोई तैस पन विश्वास करैला, सैक्या निराश ना भूंणा।” 12ऐ ऐठणीरै तेईनी आ कि यहूदियै जां होरनियां जातिया मझ कोई फर्क ना; केईनी कि सभनियां केरा प्रभु अक्कै आ जां जै तैस अपड़ि मजत कांनेरै तेईनी शदांतै, सैक्यै तैस बचांणै। 13केईनी कि पवित्र शास्त्रा मझ ऐ लिखोरू आ; “प्रभु सैक्यै सारै बचांणै, जै तैस अपड़ि मजतिरै तेईनी शदांतै।”
इस्राएलेरै मैहणुवें खुशखबरी ना मनि
14पण मैहणुवां प्रभु किना मजत मगणा किना पेहिलै तैस पन विश्वास कांना चेहिंथा; जां विश्वास कांना किना पेहिलै मैहणुवां तेसेरै बारै मझ शुणनु चेहिंथु, जां मैहणु प्रभुरै बारै मझ शुणि सकिया, ऐसेरै तेईनी कोसक्यै मैहणु तैन्हांंनि शुणांणु चेहिंथु। 15जां ऐत किना पेहिलै कि खुशखबरी शुणाणै बाऐ गहि करि तेन्हांनि शुणा सकिया, खुशखबरी शुणांणार भेईजणा जरूरी आ। ऐठणीरै तेईनी पवित्र शास्त्र बोलता; “खुशखबरी अंणनारा मैहणुवां केरै पैयिड़ कियोतै छै अत्तै।” 16पण सभनियें तैस खुशखबरी पन विश्वास ना केया। भविष्यवक्ता यशायाह बोलता, कि “प्रभु, कुनि बि असेड़ै संदेशा पन विश्वास ना केया।” 17ऐठणीरै तेईनी विश्वास तेख्णी भूंता, जेख्णी तुवे संदेश शुणतै जां ऐ संदेश मसीहरा वचन आ। 18पण आंउ पौलुस ऐड़ि अक गल पुछता; कि क्या यहूदियै सही मझ मसीहरै बारै मझ संदेश ना शुणौरा? केईनी कि पवित्र शास्त्रा मझ लिखोरू आ; “खुशखबरी शुणांणारा केरी आवाज सारी पृथ्वी पन, जां वचन पृथ्विरी हर जगाय पुजि गियौरा।” 19फिरी आंउ पुछता, कि क्या इस्राएलेरै मैहणुवां ऐ पता ना थ्या? पेहिलै ता परमेश्वरै मूसै भविष्यवक्तेरै जरियै ऐ बौलु, “मूं तुवे तैहां यहूदिया सिंउ जलन कांनेरा कारण बंणाणै, जै अक दैश ना। मूं तुहांनि मूर्ख होरी जातिरै जरियै गुस्सा दिवांणा।” 20यशायाह भविष्यवक्तै बड़ै जोश सिंउ प्रभुरा ऐक्या वचन शुणां कि,
“जै मूं ना तोपींथियै,
तेन्हांनि आंउ मेयि ग्या;
जां जै मूं पुछींथियै बि ना,
तैन्हांं पन आंउ प्रकट भौ ग्या।”
21पण परमेश्वरै यशायाह भविष्यवक्तेरै जरियै इस्राएलेरा मैहणुवां केरै बारै मझ बोलोरू थियु कि, “आज्ञा ना मनणारै जां विद्रोही मैहणुवंनी ऐपु किनि वापस शदांणेरै तेईनी, आंउ पूरी धियाड़ी विनती काता रिय्हा।”
موجودہ انتخاب:
रोमियो 10: CDJNT
سرخی
کاپی
موازنہ
شئیر
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.