San Mateo 27
27
Jesuse' cu bisa'al tu táan Pilato
(Mc 15.1; Lc 23.1-2; Jn 18.28-32)
1Le ca sáaschaje', tuláacal u nuuctaquil le aj kiino'obo', yéetel u nuuctaquil le judíobo' tu múuch' tucultajo'ob bix cu bin u quiimsico'ob Jesús. 2Kaxa'an tu bisilaco'ob ca tu kubajo'ob ti' Poncio Pilato le jalach wíinico'.
Bix quíimic Judas
3Judas le máax j kubo', le ca tu yilaj dzo'oc u xotkinta'al Jesús u ti'al quíimile yaji u yóole' ca tu sutaj le treinta u taakinil platao' ti' u nuuctaquil le aj kiino'obo' yéetel ti' u nuuctaquil le caajo' 4ca tu ya'alaj ti'ob: Tene' kebanchajen iquil tin kubilac u ti'al ca quíimsa'ac jun túul máac mina'an u si'ipil. Ba'ale' leti'obe' tu núucajo'ob ti': ¿Ba'ax yaan c il to'on yéetel lelo'? ¡Teech a ca'acaj yéetel!
5Judas túune' tu píicch'intaj le taakin te j kulnajo ca j bine' ca tu jich'aj u caal.
6U nuuctaquil le aj kiino'obo' tu molajo'ob le taakino' ca tu ya'alajo'ob: Ma' tu páajtal c dzáic le takiina' tu cúuchil le ti'ibil óolalo' tumen u tojol ma'anic ki'ik.
7Cu dzo'ocole' tu múuch' tucultajo'ob u manico'ob yéetel le taakino' u Lu'um le J patkato', u ti'al ca yanac jun p'éel cúuchil tu'ux u mu'ucul le j táanxel lu'umilo'obo'. 8Le o'olale' cu kaaba'inta'al le lu'umo' tac tu kiinil bejela'e' U Lu'umil Ki'ik. 9Bey dzo'ocpajic le ba'ax a'ala'ab tumen aj bóobat Jeremías: Tu ch'a'ajo'ob le treinta u taakinil platao' (le u tojol dza'ab ti' tumen le j israelitaobo'), 10tu yéetele' tu manajo'ob u lu'um le j patkato', je'el bix tu ya'alajilac teen Yuumtzilo'.
Jesuse' tu táan Pilato
(Mc 15.2-5; Lc 23.3-5; Jn 18.33-38)
11Jesuse' j bisa'ab tu táan le jalach wíinico', máax tu káatchi'itaj ti': ¿Teech wa u ajaw le j judíobo'? Jesuse' tu ya'alaj ti': Beyo', je'el bix dzo'oc a wa'alico'.
12Le ca j ta'ac u pool tumen u nuuctaquil le aj kiino'obo' yéetel u nuuctaquil le caajo' Jesuse' ma' tu núucaj mix ba'ali'. 13Pilato túune' tu ya'alaj ti': ¿Ma' wa ta wu'uyic buca'aj ba'alo'ob cu ya'ala'al ta wo'olalo'?
14Ba'ale' Jesuse' mix ba'al tu núucaj ti'; le jalach wíinic túuno' sen ja'ak u yóol.
Jesuse' cu ku'ubul u ti'al ca quíimsa'ac
(Mc 15.6-20; Lc 23.13-25; Jn 18.38—19.16)
15Tu kiinil u kiinbesajil le Táadz máanbalo' suucja'an ti' le jalach wíinico' u jáalkabtic jun túul máac kala'an, je'el máacalmáac ca u yéey le caajo'. 16Yaan jun túul máax kala'an jach kaj óola'ane', u kaaba'e' Barrabás; 17le ca j much'lajo'obe' Pilatoe' tu káat chi'itaj ti'ob: ¿Máax a káate'ex ca in jáalkabte, Barrabás wa Jesús máax cu ya'ala'al le Cristoo'?
18Tumen dzo'oc u yilique' tu yo'olal u kaakas tuuculo'ob tu kubajo'ob Jesús ti'.
19Ca'aliquil Pilato culucbal tu jalach káanche'e', u yatane' tu túuxtaj a'albil ti': Ma' a wocsicabáa yéetel le utzil máaco', tumen bejela'e' tin wayaktaj jakbe'en ba'alo'ob tu yo'olal leti'.
20Ba'ale' u nuuctaquil le aj kiino'obo' yéetel u nuuctaquil le caajo' tu dzajo'ob tu tuucul le máaco'obo' ca u káato'ob ca jáalkabta'ac Barrabás yéetel ca quíimsa'ac Jesús. 21Le jalach wíinico' tu káat chi'itaj ti'ob tu ca'a téen: ¿Máacal máac ti' le ca'a túul a káate'ex ca in jáalkabte'exo'? Leti'obe' tu ya'alajo'ob: Jáalkabt to'on Barrabás.
22Pilatoe' tu káat chi'itaj ti'ob: ¿Ba'ax túun quin in beet yéetel Jesús le máax cu ya'ala'al le Cristoo'? Tuláacalo'ob tu núucajo'ob: ¡Sin ti' cruz!
23Pilato túune' tu ya'alaj ti'ob: ¿Ba'ax kaasil u beetmaj? Ba'ale' leti'obe' tu sen awto'ob: ¡Sin ti' Cruz!
24Le ca tu yilaj Pilato mix ba'al cu jo'osique', ba'ale' táan u wo'och'táanbal le máaco'obo', tu túuxtaj taasbil ja'e' ca tu p'o'aj u kab tu táan le máaco'obo' táan u ya'alic: Tene' mina'an in si'ipil iquil cun quíimil le utzil máaca', a ca'acaje'ex te'ex.
25Tuláacal le máaco'obo' tu núucajo'ob: ¡Ca lúubuc u ki'ikel t óokol yéetel tu yóokol c paalal!
26Pilato túune' tu jáalkabtaj Barrabás ti'ob; cu dzo'ocole' tu túuxtaj ja'aja'adzbi Jesuse' ca tu kubaj u ti'al ca si'inic ti' cruz.
27Cu dzo'ocole' u aj ba'atelo'ob le jalach wíinico' tu bisajo'ob Jesús te j chúumuc najo', ca tu láaj much'juba'ob tu bakpach. 28Cu dzo'ocole' tu pitajo'ob u nooke' ca tu búucbesajo'ob yéetel jun p'éel chac nook, 29ca tu dzajo'ob tu pool jun p'éel péet jo'ol jit'a'an yéetel ki'ixo'ob, tu dzajo'ob xan jun p'éel che' tu x no'oj kab. Cu dzo'ocole' xolajo'ob tu táane', ca jo'op' u p'a'astico'ob, táan u ya'alico'ob ti': ¡Qui'iqui' óolil ti' u Ajaw le judíobo'!
30Tu túubajo'ob xan, yéetel tu ch'a'ajo'ob le che' yaan tu kabo' ca tu ko'okolajo'ob u pool yéetel. 31Cu dzo'ocol u p'a'astico'ob beyo', tu pitajo'ob le chac nook ti'o', ca tu búucbesajo'ob yéetel u nook, cu dzo'ocole' ca tu bisajo'ob u ti'al u sino'ob ti' cruz.
Cu si'inil Jesús ti' cruz
(Mc 15.21-32; Lc 23.26-43; Jn 19.17-27)
32Táan u jóokolo'obe' ca tu yilajo'ob jun túul máax Cirenéil, u kaaba'e Simón, ca tu beetajo'ob u bisic u cruz Jesús. 33Bey kuchico'ob ti' jun p'éel cúuchil u kaaba'e Gólgota, (lela' u káat u ya'ale' u Cúuchil u baaquel Pool) 34te'elo' tu dzajo'ob u yuk Jesús vino xa'akta'an yéetel káaj; ba'ale' cu dzo'ocol u túuntique' Jesuse' ma' tu yóoltaj u yuki'.
35Cu dzo'ocol u sinico'ob ti' cruze', le aj ba'atelo'obo' tu bulajo'ob u nook Jesús u ti'al u t'oxico'ob ichilo'ob. Bey dzo'ocpajic le ba'ax tu ya'alaj le aj bóobato': Tu t'oxajo'ob in nook ichilo'ob yéetel buul. 36Cu dzo'ocole' j culajo'ob te'elo' u ti'al u cananto'ob Jesús. 37Tu yóokol u poole' tu dzajo'ob jun p'éel dzíib cu ya'alic ba'ax o'olal si'in ti' cruz. Le dzíibo' cu ya'alic: Lela' Jesús, u ajaw le judíobo'.
38Si'in xan ti' cruz ca'a túul j oocolo'ob tu yéetel, jun túule' tu x no'oj u láake' tu x dzíic. 39Le máaxo'ob cu máano'obo' cu poch'ico'ob, táan u yúuntico'ob u poolo'ob yéetel 40táan u ya'alico'ob: ¡Teech ca jenic kulnaj yéetel ca líikesic tu ca'a téen ichil óox p'éel kiine', tocabáa! ¡Wa u Paalech Kue' éemen ti' le cruzo'!
41Bey xan, bey p'a'astabic tumen u nuuctaquil le aj kiino'obo', u ca'anbesajilo'ob le a'almaj t'aano', le j fariseobo' yéetel u nuuctaquil le caajo', táan u ya'alico'ob tu baatzilo'ob:
42Tu tocaj u láako'ob, ba'ale' leti'e' ma' tu páajtal u toquicubáa. Wa tu jaajil u ajaw Israele', ¡éemec ti' le cruzo', u ti'al ca c ocsaj óolte! 43Tu dzaj u alab óolal ti' Yuum Ku, ¡To'ococ túun bejela'a tumen Ku, wa tu jaajil u yaabiltmaj! tumen tu ya'alaje': U Paalen Ku.
44J po'och' xan tumen le j oocolo'ob sina'ano'ob ti' cruz tu yéetelo'.
Cu quíimil Jesús
(Mc 15.33-41; Lc 23.44-49; Jn 19.28-30)
45Ekjoch'e'enchaj túun tuláacal yóokolcaab, cáajic chúumuc kiine' tac láas tres u binbal kiin. 46Ti' le horao' Jesuse' tu ka'am a'alaj: Eli, Eli, ¿Lama sabactaní? u káat ya'ale': In Ku, in Ku, ¿Ba'axten dzo'oc a p'atiquen?
47Dze'edzec ti' le yano'ob te'elo' tu yu'ubajo'obe' ca tu ya'alajo'ob: Le máaca' táan u t'anic aj bóobat Elías.
48Ti' le jun súutuco' jun túul ti' leti'obe' j bin áalcabil u taas jun p'éel esponja, cu dzo'ocol u ch'ulic yéetel su'udz vinoe', tu dzaj ti' jun p'éel chowac che'e ca tu nadzaj tu chi' u ti'al ca u yuke. 49Ba'ale' le u láako'obo' tu ya'alajo'ob: P'ate, co'ox ilic wa cu taal Elías u ti'al toquic.
50Jesús túune' ka'am awatnaj tu ca'a téene' ca j quíimi'. 51Ti' le jun súutuco' u káasab nookil le kulnajo' jáat chúumuc, ca'anal tac cabal. Quíilbanaj le lu'umo', xíiclaj le tuunicho'obo' 52yéetel je'epaj le mucnalo'obo'; tac u wíinclil ya'abcach u yocsaj óolalo'ob Ku dzo'oc ca'ach u quíimilo'obe' ca'a púut cuxquinta'abo'ob. 53Lelo'oba' jóoko'ob ti' le mucnalo'obo', cu dzo'ocol u ca'a púut cuxtal Jesuse' ca j ooco'ob tu quili'ich caajil Jerusalén, tu'ux ila'abo'ob tumen ya'abcach máaco'ob.
54Le centurion túuno' yéetel le máaxo'ob táan u canantico'ob Jesús tu yéetelo', le ca tu yilajo'ob u quíilbal le lu'umo' yéetel le u láak ba'alo'ob úucho', jach sajacchajo'obe' ca tu ya'alajo'ob: ¡Tu jaajil, le máaca' u Paal Ku!
55Ya'abcach co'olelo'ob máaxo'ob j taalo'ob tu paach Jesús le ca j luk Galileae' yéetel tu yáantajo'obe', ti' yano'ob náachile' táan u pactico'ob le ba'alo'oba'. 56Ichilo'obe' ti' yaan María Magdalena, María u maama Jacobo yéetel José, bey xan u maama u paalal Zebedeo.
Cu mu'ucul Jesús
(Mc 15.42-47; Lc 23.50-56; Jn 19.38-42)
57Ti' le oca'an kiino' j taal jun túul ayikal máac, u kaaba'e' José Arimateail, máax u j tzaypach Jesús xan. 58Leti' túune' j bin u yil Pilatoe' ca tu káataj u wíinclil Jesús ti'. Pilato' túune' tu ya'alaj ca dza'abac ti'. 59Josee' tu ch'a'aj le wíinclilo' ca tu to'aj yéetel jun p'éel nojoch sac nooke', 60ca tu dzaj ti' u túumben mucnal, u beetmaj u po'otol ti' le tuunicho'. Cu dzo'ocol u balkesic jun p'éel nojoch tuunich tu jool le mucnalo' ca j bini'. 61Ti' yano'ob María Magdalena yéetel le u láak Mariao' culucbalo'ob tu táan le mucnalo'.
Cu dza'abal máaco'ob u cananto'ob le mucnalo'
62Tu láak kiine', u káat ya'ale', cu dzo'ocol u nu'uctajil u ti'al u kiinil sábadoe', u nuuctaquil le aj kiino'obo' yéetel le j fariseobo', bino'ob u yilo'ob Pilatoe 63ca tu ya'alajo'ob ti': Yuumtzil, cu ka'ajal to'one' le j tuus wíinico' ca'aliquil cuxa'ane' tu ya'alaj: Yaan in ca'a púut cuxtal tu yóox p'éel kiin. 64Le o'olale', túuxt canatbil le mucnal tac tu yóox p'éel, kiino', u ti'al ma' taal u canbalo'ob yéetel áakabe' ca u yocolto'ob le wíinclilo', cu dzo'ocole' ca u ya'alo'ob ti' máaco'obe': Dzo'oc u ca'a púut cuxtal ti' le quíimilo'. Wa cu yúuchul beyo', le dzo'oc tuusa' asab kaas ti' le yáaxo'.
65Pilatoe' tu ya'alaj ti'ob: Je'el jun jaatz aj ba'atelo'ob, xene'exe' ca a wile'ex ca cananta'ac u asab ma'alobil ca páatac. 66J bino'ob túune' ca tu yilajo'ob ca cananta'ac ma'alob le mucnalo', tu dzajo'ob jun p'éel chíiculal tu yóokol le tuunich yaan tu joolo' ca tu p'atajo'ob le aj ba'atelo'ob te'elo'.
موجودہ انتخاب:
San Mateo 27: MAYABI
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Texto Maya © Sociedades Bíblicas Unidas, 1992