San Mateo 26
26
Cu múuch' tuculta'al bix cun machbil Jesús
(Mc 14.1-2; Lc 22.1-2; Jn 11.45-53)
1Cu dzo'ocol u ya'alic Jesús tuláacal le ba'alo'oba', tu ya'alaj ti' u aj canbalo'ob:
2Je'el bix a wojelile'exe', ichil ca'a p'éel kiine' u kiinbesajil le Táadz máanbalo': u Paal Máaque' bíin ku'ubuc túun u ti'al ca si'inic ti' Cruz.
3Ti' le kiino'obo', u nuuctaquil aj kiino'ob, yéetel u nojchilo'ob le judíobo' j much'lajo'ob tu táancabil u yotoch Caifás, máax u nojoch le aj kiino'obo', 4ca tu tucultajo'ob bix cun u machilo'ob Jesús yéetel tuus u ti'al u quíimso'ob. 5Ba'ale' tu ya'alajo'ob: Ma' ichil u kiinilo'ob le kinbesajo', u ti'al ma' u wo'och'táanbal le máaco'obo'.
Jun túul co'olel cu wequic qui'iboc ja' tu pool Jesús
(Mc 14.3-9; Jn 12.1-8)
6Ti' yaan Jesús Betaniae', tu yotoch Simón, le máax cu kaba'inta'al leproso; 7ca tu nadzajubáa jun túul co'olel tu yicnal, táan u bisic jun p'éel qui'ichquelem frasco chuup yéetel qui'iboc ja' jach co'oj u tojol. Ca'aliquil culucbal Jesús te j mayacche'o', leti'e' tu wecaj le qui'iboc ja' tu pool Jesuso'. 8Le aj canbalo'obo' le ca tu yilajo'ob lela', kuuxilnajo'ob ca jo'op' u ya'alico'ob: ¿Ba'axten cu we'equel lela'? 9Tumen cu páajtal ca'ach u co'onol tu yo'olal ya'abcach taakine' u ti'al u y áanta'al óotzilo'ob.
10Jesuse' tu yu'ubaje' ca tu ya'alaj ti'ob: ¿Ba'axten ca kuuxile'ex ti' le co'olela'? Le ba'ax dzo'oc u beetic tena' jun p'éel ma'alob ba'al. 11Tumen mantadz bíin yanaco'ob óotzilo'ob ichile'ex, ba'ale' tene' ma' mantadz bíin yanaquen ichile'exi'. 12Le ba'ax dzo'oc u beetic le co'olel iquil tu wequilac le qui'iboc ja' tu yóokol in wíinclila', tu beetaj u ti'al nu'ucbesic in mu'ucul. 13Tu jaajil quin wa'alic ti' te'exe', je'el tu'uxac ca tze'ecta'ac u ma'alob péectzil tocsajil ti' tuláacal yóokolcaabe', yaan u tzicbata'al xan le ba'ax tu beetaj le co'olela', u ti'al u ka'ajsa'al leti'.
Judase' cu ya'alic u kubic Jesús
(Mc 14.10-11; Lc 22.3-6)
14Jun túul ti' le doce aj canbalo'obo', le máax Judas Iscariote u kaaba'o', j bin t'aan yéetel u nuuctaquil le aj kiino'obo' 15ca tu ya'alaj ti'ob: ¿Bajux je'el a dzáique'ex teen wa quin kubic Jesús ti' te'exe'? Leti'ob túune' tu bo'otajo'ob ti' treinta u taakinil plata. 16Ti' le je'elo' jo'op' u caxantic Judas bix je'el u páajtal u kubic Jesús tu kabo'obe'.
U quili'ich janal Yuumtzil
(Mc 14.12-25; Lc 22.7-23; Jn 13.21-30; 1 Co 11.23-26)
17Tu yáax kiinil le kiinbesaj iquil u jaanta'al le waaj x ma' levadurao, le j canbalo'obo' tu nadzajuba'ob ti' Jesuse' ca tu káat chi'itajo'ob ti': ¿Tu'ux a káat ca c nu'ucbes u ti'al ca a jaant u jaanlil le Táadz máanbalo'?
18Leti'e' tu ya'alaj ti'ob: Xeene'ex te j caajo', tu yotoch jun túul Máaque', ca a wa'ale'ex ti': Le aj ca'anbesajo' cu ya'alic: In kiinile' naadz yanil, ta wotoch quin in kinbes le Táadz máanbal yéetel in j canbalo'obo'.
19Le aj canbalo'obo' tu beetajo'ob je'el bix a'ala'ab ti'ob tumen Jesuso', ca tu nu'ucbesajo'ob u jaanlil le táadz máanbalo'.
20Le ca j áakabchaje' Jesuse' j culaj janal yéetel u doce aj canbalo'obo'. 21Ca'aliquil táan u janalo'obe' Jesuse' tu ya'alaj ti'ob: Tu jaajil quin wa'alic ti' te'exe' jun túul ti' te'ex cun u kuben.
22Leti'obe' jach okomchaj u yóolo'ob ca jo'op' u káat chi'itico'ob ti' tu jujun túulil: ¿Teen wa, Yuumtzil?
23Jesuse' tu núucaj ti'ob: Le máax cu janal tin wéetel tin platoe' leti' le máax cu bin u kuben. 24U Paal Máaque' táan u bin ti' le bej cu ya'alic le Quili'ich Dzíibo', ba'ale' ¡óotzil le máax kubico! Asab ma'alob ca'ach ti' le máac ma' u síijil ca'ache'.
25J t'anaj túun Judas le máax kubico' ca tu ya'alaj ti': Aj ca'anbesaj, ¿teen wa? Jesuse' tu núucaj ti': Bey, teech. 26Ca'aliquil táan u janalo'obe' Jesuse' tu ch'a'aj le waajo', tu dzaj nib óolal ti' Yuum Ku, cu dzo'ocol u xet'ique', ca tu dzaj ti' u aj canbalo'ob táan u ya'alic: Jaante'ex, lela' in wíinclil.
27Cu dzo'ocole' tu ch'a'aj tu kab jun p'éel u nu'uculil ukule' ca tu dzaj nib óolal ti' Yuum kue', ca tu dzaj ti'ob táan u ya'alic: Ukulnene'ex tuláacale'ex ti' le nu'ucula', 28tumen lela' in ki'ikel cu jaajcuntic le túumben nup t'aan yéetel cu we'equel tu yo'olal ya'abcach máaco'ob u ti'al u sa'atsajil u kebano'ob. 29Ba'ale' quin wa'alic ti' te'exe' ma' bíin in wuk tu ca'a téen u kab le uvao' tac le kiin quéen in wuk ta wéetele'ex le túumben vino tu ajawil in Taatao'.
Jesuse' cu ya'alic yaan u cúulpachcunta'al tumen Pedro
(Mc 14.26-31; Lc 22.31-34; Jn 13.36-38)
30Cu dzo'ocol u kayo'obe' j bino'ob tu pu'uquil le Olivo'obo'. 31Jesús túune' tu ya'alaj ti'ob: Tuláacale'ex yaan u lúubul a wóole'ex tin wo'olal ti' le áakaba'; tumen le Quili'ich Dzíibo' cu ya'alic: Bíin in ca'aj in quíims le j canan tamano', le tamano'ob túuno' yaan u ki'itpajlo'ob. 32Ba'ale' cu dzo'ocol in ca'a púut cuxtale', bíin xi'iquen táanil ti' te'ex tac Galilea.
33Pedroe' tu núucaj túun ti': Quex tuláacal ca lúubuc u yóol ta wo'olale' tene' ma'.
34Jesuse' tu ya'alaj ti': Tu jaajil quin wa'alic teche', ti' le áakaba', ma'ili' kaaynac le j t'eelo', yaan a wa'alic óoxten ma' a kajóoleni'.
35Pedroe' tu ya'alaj ti': Quex ca yanac in quíimil ta wéetele', ma' bíin in wa'al ma' in kaj óolechi'. Tuláacal le aj canbalo'obo' tu ya'alajo'ob xan beyo'.
Jesuse' cu payalchi' Getsemani
(Mc 14.32-42; Lc 22.39-46)
36Cu dzo'ocole' j bin Jesús yéetel u aj canbalo'ob ti' jun p'éel cúuchil cu kaaba'intic Getsemani, ca tu ya'alaj ti'ob: Culene'ex waye' ca'aliquil quin bin payalchi' te'elo'.
37Ca tu bisaj Pedro yéetel ca'a túul u paalal Zebedeo, ca jo'op' u yu'ubic nojoch okom óolal yéetel yaayaj óolal. 38Ca tu ya'alaj ti'ob: Táan in wu'uyic tin pixan u okom óolalil quíimil. P'áatene'ex waye' ca p'il ichnaque'ex tin wéetel.
39Jesús túune' j bin jun p'íit asab táanile' ca j noclaj lu'ume' ca j payalchi'inaj ti' Yuum, táan u ya'alic: In Yuum, wa cu páajtale' toquen ti' le yaayaj óolala'; ba'ale' ma' u beetchajal le ba'ax in káat teno' ba'ale' ba'ax a káat teche'.
40Ca j suunaj tu'ux yaan u aj canbalo'obe', ca tu yilaj táan u wenelo'ob. Ca tu ya'alaj ti' Pedro: ¿Ma' páatchaj a p'il iche'ex tin wéetel mix jun p'éel horai'? 41P'il ichnene'ex yéetel payalchi'inene'ex u ti'al ma' a lúubule'ex ti' túuntaj óolal. Tu jaajile' le pixano' chuca'an u yóol ba'ale' le' wíinclilo' mina'an u muuk.
42J bin tu ca'a téene' ca payalchi'inaj beya': In Yuum, wa ma' tu páajtal in jechic le yaayaj óolala', beeta'ac túun le ba'ax a káat techo'.
43Cu dzo'ocole' j suunaj tu ca'a téene' ca tu ca'a ilaj táan u wenel u aj canbalo'ob, tumen táan u múudzul u yicho'ob tu yo'olal u jach taaquil u wenelo'ob. 44Tu p'atajo'obe' ca j bin payalchi' tu yóox páacac, táan u ya'alic je'el bix dzo'oc u káat óoltico'. 45J bin túun tac tu'ux yaan u j canbalo'obe' ca tu ya'alaj ti'ob: Beoraa' ma'alob, weenene'ex ca a je'elsaba'ex. Dzo'oc u kuchul u yorail iquil cun kubbil u Paal Máac tu kab le keban máaco'obo'. 46Líikene'ex, cone'ex; táan u taal le máax cun kubiqueno'.
Cu ma'achal Jesús u ti'al bisbil
(Mc 14.43-50; Lc 22.47-53; Jn 18.2-11)
47Ca'aliquil táan u t'aan Jesuse' ca j kuch Judas, máax jun túul ti' le doce j canbalo'obo', yéetel leti'e' j taal ya'abcach máaco'ob u machmajo'ob máascabo'ob yéetel che'ob. Túuxta'ano'ob tumen u nuuctaquil le aj kiino'obo' yéetel tumen u nuuquilo'ob le judíobo'. 48Judas le máax kubic Jesuso', u dzaama ti'ob jun p'éel chíiculal, táan u ya'alic: Le máax bíin in dzu'udzo', leti'; mache'ex ca a bise'ex.
49Tu nadzubáa ti' Jesuse' ca tu ya'alaj: ¡Qui'iqui' óolil ti' teech aj ca'anbesaj! Ca tu dzu'udzaj. 50Jesuse' tu núucaj ti': In wet' bisajbáa, le ba'ax ca taal a beete Tu nadzajuba'ob túune', tu machajo'ob Jesuse' ca tu bisajo'ob.
51Jun túul ti' u aj canbalo'ob Jesuse' tu jíilpaytaj u máascabe' ca tu ch'acaj jun p'éel u le' u xiquin u palitzil u nojoch le aj kiino'obo'. 52Jesús túune' tu ya'alaj ti': Oques le a máascab tu piixo'. Tumen tuláacal le máaxo'ob cu ba'atelo'ob yéetel máascabe' yéetel máascab bíin quíimico'ob. 53¿Ma' wa a wojel tene' cu páajtal in káat óolal ti' in Taatae', leti'e' je'el u túuxtic ten beoraa' maanal ti' doce u nojoch múuch'cabil ángelo'ob? 54Ba'ale' wa beyo' ¿Bix cun dzo'ocpajal le Quili'ich Dzíib cu ya'alic unaj u yúuchul le ba'alo'oba'?
55Jesús túune' tu káat chi'itaj ti' le máaco'obo': ¿Jóoke'ex yéetel máascabo'ob bey xan yéetel che'ob u ti'al a machiquene'ex, bey je'el bix u ma'achal jun túul j oocole'? Sáamsamal culajen ca'ansaj ichile'ex te j kulnajo', mix jun téen ta machene'ex. 56Ba'ale' tuláacal lela' cu yúuchule' u ti'al ca dzo'ocpajac ba'ax tu ya'alaj le aj bóobato'ob ti' le Quili'ich Dzíibo'. Tuláacal túun le j canbalo'obo' tu p'atajo'ob Jesús tu juunale' ca j púudzo'ob.
Jesús tu táan u múuch'ul u nuuctaquil le caajo'
(Mc 14.53-65; Lc 22.54-55,63-71; Jn 18.12-14,19-24)
57Le máaxo'ob tu machajo'ob Jesuso' tu bisajo'ob tu táan Caifás, máax u nojoch le aj kiino'obo', Tu'ux much'ucbalo'ob u aj ca'anbesajilo'ob le a'almaj t'aano' yéetel le anciano'obo'. 58Ba'ale' Pedroe' náach tu tzaypachtilac Jesús tac tu táancabil u yotoch u nojoch le aj kiino'obo'. J ooque' ca j p'áat cutal yéetel le máaco'ob cu canano'obo' u ti'al u yilic bix cun dzo'ocol tuláacal le ba'ax cu yúuchulo'.
59U nuuctaquil le j kiino'obo', le anciano'obo', yéetel tuláacal u múuch'ul u nuuctaquil le caajo' táan u caxtico'ob tacpoolo'ob tu yóokol Jesús, quex chéen tuuso'ob, u ti'al u kubico'ob ti' quíimil, 60ba'ale' ma' tu caxtajo'obi', quex tumen ya'abcach máaco'ob j taalo'ob u ya'alo'ob tuuso'ob tu yóokol. Tu dzo'oque' j taal ca'a túul j tuuso'ob 61máaxo'ob tu ya'alajo'ob: Le máaca' tu ya'alaj: Tene' cu páajtal in jenic u kulnaj Ku yéetel in líikesic tu ca'a téen ichil óox p'éel kiin.
62U nojoch le aj kiino'obo' j líike' ca tu ya'alaj ti' Jesús: ¿Ma' ta núuquic mix ba'al? ¿Ba'ax le ba'alo'ob cu ya'ala'al ta wo'olala'?
63Ba'ale' Jesuse' ma' j t'aanaji'. U nojoch le aj kiino'obo' tu ya'alaj túun ti': Tu kaaba' cuxa'an Kue', quin káat óoltic teche' ca a wa'al to'on u jaajil. A'al to'on wa teech le Cristoo', u Paal Kue'.
64Jesuse' tu ya'alaj ti': Teen je'el bix a wa'alico'. Bey xan quin wa'alic te'exe', yaan a wilique'ex u Paal Máac culucbal tu x no'oj Ku máax yaan páajtalil ti'o', yéetel táan u taal ti' u múuyalo'ob ca'an.
65U nojoch aj kiino'ob túuno' tu jataj u nooke' ca tu ya'alaj: Le máaca' dzo'oc u poch'ic Ku; ¿Ba'ax u biilal to'on u láak j tacpoolo'ob? Te'exe' dzo'oc a wu'uyique'ex le kaakas t'aano'ob tu ya'alajo'; 66¿bix a wilique'ex? Leti'obe' tu ya'alajo'ob: Yaan u si'ipil, unaj u quíimil.
67Tu túubajo'ob túun u yiche' ca tu ja'ajadzo'ob. U láako'obe' tu lajo'ob tu táan yiche' 68ca tu ya'alajo'ob ti': Bey teech le Cristoo' ¡Na'at máax tu lajech!
Pedroe' cu ya'alic ma' u kaj óol Jesusi'
(Mc 14.66-72; Lc 22.56-62; Jn 18.15-18,25-27)
69Ca'aliquile' Pedroe' culucbal táancab. Jun túul x palitzile' tu nadzajubáa ti'e' ca tu ya'alaj ti': Teech xane' táan a máan ca'ach yéetel Jesús, le Galileailo'.
70Ba'ale' Pedroe' tu ya'alaj tu táan tuláacal: Ma' in wojel ba'ax ca wa'aliqui'.
71Bin u ca'aj jóokol ca'ach Pedroe' ca j ila'ab tumen u láak x palitzil; lela' tu ya'alaj ti' le máaxo'ob yano'ob te'elo': Le máaca' táan xan ca'ach u máan yéetel Jesús le j Nazaretilo'.
72Tu ca'a téen Pedroe' tu ya'alaj: ¡Tu táan Kue' quin wa'alic ma' in kaj óol le máaco'!
73Cu dzo'ocol u máan jun súutuque', le máaxo'ob yano'ob te'elo' tu nadzajuba'ob ti' Pedroe' ca tu ya'alajo'ob ti': Tu jaajil, teche' jun túulech ti' leti'ob, tumen cu kaj óolta'al tac ti' a t'aan.
74Ca jo'op' túun u kaakas t'aan táan u ya'alic: ¡Ma' in kaj óol le máaco'! Ti' le súutuco' kaaynaj jun túul j t'eel. 75Pedro túune' j ka'aj ti' ba'ax a'ala'ab ti' tumen Jesús: Ma'ili' kaaynac le j t'eelo', teche' yaan a wa'alic óox téen ma' a kaj óoleni'. Pedroe' jóoke' ca j okolnaj yéetel yaayaj óolal.
موجودہ انتخاب:
San Mateo 26: MAYABI
سرخی
شئیر
کاپی
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992