2 Thessaloniami 3
3
Akighini Qhüiniju keu
1Athiküzümi eno achelimiqo, Ampeu kükütsü tsà nongu gholo toi papashi külhalu eno gihukulupu shilu penike ningu ghenguno inikhu tsü alo. 2Eno küsakügha ngò küsaküghamiqo lau no ningu xaphelu penike inikhu tsülo, kughengu timi kümtsü küpülümi kumoe. 3Ikemu Ampeu ye pükhübekuluu, eno pa no nongu shikumto tsü nani eno küsaküghau lau no nongu süsho nani. 4Ningu no azah nongu tsükeu thimeqo gholu aghí nani eno gholu ache nani kepi ningu ye Ampeu lono pükhübe ani. 5Ampeu pelo nongu mulo kiche sasü Alhou kikimiye eno Khristoʼw tsükhoi keu lo wulu peniu.
Akipichi Vehu lo Pikichi keu
6Athiküzümi eno achelimiqo, Ampeu Jisü Khristo je lono küpülümi khunoqo no akipichi shi xü acheni eno nongu no ningu lau no akükütsü ithulu keu ghola lono xü chemo keno panongu lau no putosü apenike ningu no azah nongu tsü ani. 7Kughengu nongu ye ningu no xüpe piyeve keu pape moayesa kepi nolikhi nongu no ithi ani. Ningu ye nongu gholo ache kelo akipichi shimoe, 8momu ningu ye ame tsümo no khiu chuqupu mu chupe püamoe. Tishini ke züqhulo, ningu ghenguno nongu khiu makhomu shipemo nike ghenguno ningu ye aghimeshi putho-pucho akümlà shi acheke. 9Ningu ye akukuphu ithulu küzüpu kumo ke ghenguno hitoi shike kumoe, ikemu ningu vechewo akühapu lakhi shi no nongu pelo tipau kishishi shipe nikeu ghenguno ke. 10Kughengu ningu no nongu gholo akelo nomu ningu no ayeza hipau nongu tsüke: “Timi khuu no mülà nishi chemo keno pa ye chu kepu kumoe.”
11Nongu dolo khami ye akipichi shi xü acheni eno aküküpüna süghi acheni kepi ningu no chilu ani. Panongu ye pano kümlà ghenguno mighì acheni ke kumoe; panongu ye kütami kümlà lo chhosu keu no mighì acheni. 12Timi hitoi keqo ye kithikiyi xüwuve no panongu no chu kepu chuqupu ghenguno mülà moayesa kepi ningu no Ampeu Jisü Khristo lono hakite ghi azah tsü ani. 13Athiküzümi eno achelimiqo, nongu ye kiu no akivi keno tipau shini keu khilemu lhove kelo.
14Khunoqo no yèsü hipau lo ninguw shikakütsü gholumo nike no tipaqo amichi shipe qhilo. Panongu pelo kujove penike panongu gholo kuloji kevilo. 15Ikemu küpülümi aküsàmi lakhi toi panongu kütüghüni thono aghümi lakhi toi kihi kevilo.
Kishekha Petha
16Itehi ye alokughuno-kütsüu Ampeu pelo pa ampi no ado aghuloki kümtsü lo eno alaghi kümtsü lo aloino keu nongu tsüpeniu. Ampeu no nongu kümtsü gholo apeniu.
17Ni Paul ampi no petha hipau yè ani, eno hiye iw yèsü kümtsü lo akimchi shi akeu michipu ke. Ni ye hitoi yè acheni ke.
18Ningu Mipeu Jisü Khristoʼw küpükini no nongu kümtsü gholo apeniu.
Sümi Tiqhelimi Bible™| Copyright © 2023, 2026 by Biblica, Inc. |
Used with permission. All rights reserved worldwide.