2 Thessaloniami 2
2
Ayè Kümthau
1Athiküzümi eno achelimiqo, ningu Mipeu Jisü Khristo ighi nikeu eno ningu no pa gholo kuhokumqo nikeu vehu lo ningu no nongu qhüiniju akeu ye 2timi khunoqo no ningu kimihi shipüzü Ampeu tsalà ye ighivae ipi tungkuptsa momu akichi tsà momu yèsü vechewo asheshu cheni keno tipaqo pelo mülalei nongu mulo shiküpüna momu shikümsa pe kevilo. 3Khuu pelomu kiu laghi lonomu nongu pishiqhive pe kevilo, kughengu hekibide ipeghimo ke kutólo eno ayè kümthau, khuu ashekha tsalà lo kütsakungove nani keno, pa pephe piyemo ke kutólo Ampeu tsalà ye ighimo nani. 4Pa no Alhou ipikeu jeli momu mülá chekeu thime jeli kümtsü lachile eno pa likhi pa pesü thime kümtsü shou süqhe nani. Pa no Alhou chineki lo iqave püzü pa likhi pa pesü Alhou ke ipi piwuve nani.
5Kughou ino nongu gholo ache keno ino hipaqo vehu pesü nongu vilo piche keu nongu ye kümsüchilelu anima? 6Eno itehi nongu ye kiu no ayeza hekibideu lakhape püani keno ithi anie. Tiye ado achipi lono pa pephe piye nikeu ghenguno ke. 7Kughengu ayè kümthau tuqhou küká ye akümlà shiauvae; ikemu itehi khuu lakhape püani keno pa ikhivemoke kutólo tuqhou shi anani. 8Tishive no ayeza hekibideu pephe piye nani. Ikelo Ampeu Jisü no pa kichí lono ipeghi keu tuthu pe ayeza hekibideu hu pìthíve nani eno pa no qhivütsüni ighi keu vechewo ayeza hekibideu kütsakungove nani. 9Ayeza hekibideu ye Satan no kíshi mülà cheni keno tipau ghola lono ighi nani. Pa no aküka jeli kümtsü peitha no akümzapu kümlà eno akichiqhipu kichileu michipu kutomo shipe piye nani 10Eno pühave niye shi akemiqo pishiqhive nike ghenguno küsakügha laghi kümtsü peitha nani. Panongu ye pühave nani kughengu panongu no kuchou kimiye no xalu nikeu milive ke. 11Hi ghenguno panongu pelo akimiki pülüve penike ghenguno Alhou no pishikiqhi kumto lakhi panongu lau puwu tsüke 12eno tishi keu vechewo kuchou pülümo no küsakügha kümlà shini keu lo alokiqishi chekemi kümtsü kiléqhive niye ke.
Ithamo no Puthugholo
13Ampeu no kimiye chekemi athiküzümi eno achelimiqo, ningu ye nongu ghenguno alhokuthu Alhou shikimthi acheni pütsá ke, kughengu Alhou no Aghungú vechewo kishekimthe keu kümlà eno kuchou lo aküpülü akeu vechewo amsüu xathi toi nongu pelo xaluve peniye kìshelu ke. 14Ningu no atsakiviu küsaje keu hipau lo pa no nongu kulù ke, tishi keu lono nongu ghí ningu Mipeu Jisü Khristo juküvü gholo küsajelu peniye ke.
15Tishiaye, athiküzümi eno achelimiqo, ithamo no puthugholo eno ningu no akichi tsà lono momu yèsü vechewo akükütsü tsaqo nongu tsü keqo mutotoi pelulo.
16Ningu Mipeu Jisü Khristo ampi no eno ningu pa Pù Alhou khuu ningu kimiye eno paw küpükini vechewo lhokta shikumtokütsü eno lajupu kivi ningu tsü keno, 17pa pelo nongu kümlà kivi eno atsa kivi pikeu kümtsü lo nongu mulo shikumto eno nongu iqhikithe tsü apeniu.
Sümi Tiqhelimi Bible™| Copyright © 2023, 2026 by Biblica, Inc. |
Used with permission. All rights reserved worldwide.