KA ʻEUANELIO I KĀKAU ʻIA AI E IOANE 20
20
MOKUNA XX.
1 No ke ala hou ʻana o Iesū. 11 ʻIke ʻia ʻo ia e Maria. 19 Hōʻike iā ia iho i nā haumāna. 24 No ka manaʻoʻiʻo ʻole o Toma.
1¶ I ka lā mua o ka hebedoma, i kakahiaka nui, e pouli ana nō, hele maila ʻo Maria Magedalene i ka hale kupapaʻu, a ʻike aʻela ia i ka pōhaku i huli ʻia aʻe mai ka hale kupapaʻu aku.
2No laila, holo akula ia a hiki i o Simona Petero lā, a me kekahi haumāna a Iesū i aloha ai, ʻī akula iā lāua, “Ua lawe aku lākou i ka Haku mai ka hale kupapaʻu aku, ʻaʻole mākou i ʻike i kahi i waiho ai lākou iā ia.”
3A laila, hele akula ʻo Petero a me kēlā haumāna, a hiki ma ka hale kupapaʻu.
4Holo pū akula lāua; a māmā akula ua haumāna lā iā Petero, a hiki mua i ka hale kupapaʻu.
5Kūlou ihola ia, a ʻike aʻela i ka lole olonā e waiho ana, ʻaʻole naʻe i komo i loko.
6A laila, hiki mai ʻo Simona Petero e hahai ana ma hope ona, a komo ihola i loko o ka hale kupapaʻu, a ʻike akula i ka lole olonā e waiho ana,
7a me ka hainakā i kāʻei ʻia ai kona poʻo, ʻaʻole e waiho pū ana me ka lole olonā; akā, ua ʻopeʻope ʻia ma kahi ʻē.
8A komo akula nō hoʻi ua haumāna lā, ka mea i hiki mua ma ka hale kupapaʻu, a ʻike akula, a manaʻoʻiʻo ihola.
9No ka mea, ia manawa ʻaʻole lākou hoʻomaopopo i ka Palapala Hemolele, e pono ke ala hou ʻia mai ka make mai.
10A laila hoʻi akula nā haumāna i ko lāua wahi iho.
11¶ Akā, kū aʻela ʻo Maria ma ka hale kupapaʻu ma waho e uē ana. A i kona uē ʻana, kūlou ihola i ka hale kupapaʻu,
12a ʻike ihola i nā ʻānela ʻelua i kāhiko ʻia i ke kapa keʻokeʻo e noho ana, ma ke poʻo kekahi, a ma ka wāwae kekahi, ma kahi i waiho ʻia ai ke kino o Iesū.
13ʻĪ maila lāua iā ia, “E ka wahine, no ke aha lā ʻoe e uē ai?” ʻĪ akula ʻo ia iā lāua, “No ka mea, ua lawe aku lākou i kuʻu Haku, ʻaʻole au i ʻike i kahi i waiho ai lākou iā ia.”
14Pau kāna ʻōlelo ʻana ia mau mea, huli aʻela ia i hope, a ʻike akula iā Iesū e kū ana, ʻaʻole naʻe ʻo ia i ʻike, ʻo Iesū ia.
15ʻĪ maila ʻo Iesū iā ia, “E ka wahine, no ke aha lā ʻoe e uē ai? Iā wai lā ʻoe e ʻimi nei?” Manaʻo ihola ia, ʻo ka mea ia nāna i mālama ka māla, ʻī akula iā ia, “E ka haku, inā ua lawe aku ʻoe iā ia, e haʻi mai ʻoe iaʻu i kahi i waiho ai ʻoe iā ia, a naʻu nō ia e lawe aku.”
16ʻĪ maila ʻo Iesū iā ia, “E Maria!” Hāliu aʻela ia, ʻī akula iā ia, “E Raboni;” ʻo ia kēia ʻōlelo, “E ke Kumu.”
17ʻĪ maila ʻo Iesū iā ia, “Mai hoʻopā mai ʻoe iaʻu; no ka mea, ʻaʻole au i piʻi aku i koʻu Makua; akā, e hele ʻoe i koʻu poʻe hoahānau, e ʻī aku iā lākou, ‘E piʻi ana au i koʻu Makua, a i ko ʻoukou Makua; a i koʻu Akua, a i ko ʻoukou Akua.’”
18Hele akula ʻo Maria Magedalene, a ʻōlelo akula i nā haumāna, “Ua ʻike ia i ka Haku,” a ua ʻōlelo mai ʻo ia i kēia mau mea iā ia.
19¶ I ke ahiahi o ua lā mua lā o ka hebedoma, ua pani ʻia nā puka, ma kahi i ʻākoakoa ai nā haumāna, no ka makaʻu i nā Iudaio; hele maila ʻo Iesū a kū ihola i waena, ʻī maila iā lākou, “Aloha ʻoukou.”
20A pau kāna ʻōlelo ʻana i kēia, hōʻike maila ʻo ia iā lākou i kona mau lima, a me kona ʻaoʻao. A laila ʻoliʻoli ihola nā haumāna i ko lākou ʻike ʻana i ka Haku.
21ʻŌlelo hou akula nō ʻo Iesū iā lākou, “Aloha ʻoukou; e like me ka Makua i hoʻouna mai ai iaʻu, pēlā hoʻi au e hoʻouna aku ai iā ʻoukou.”
22A pau kāna ʻōlelo ʻana i kēia, hā ihola ʻo ia iā lākou, ʻī maila iā lākou, “E loaʻa iā ʻoukou ka ʻUhane Hemolele.
23“ʻO ka hewa o nā mea a ʻoukou e kala aku ai, e kala ʻia nō lākou; a ʻo ka hewa o nā mea a ʻoukou e kala ʻole aku ai, ʻaʻole ia e kala ʻia nō lākou.”
24¶ ʻO kekahi o ka poʻe ʻumikumamālua, ʻo Toma, i kapa ʻia ʻo Didumo, ʻaʻole ia me lākou, i ka wā i hele mai ai ʻo Iesū.
25ʻĪ akula kēia poʻe haumāna iā ia, “Ua ʻike mākou i ka Haku!” ʻĪ maila ʻo ia iā lākou, “Inā e ʻike ʻole au i nā puka o nā kui ma kona mau lima, a e ʻō i koʻu manamana lima ma ka puka o nā kui, a e ʻō hoʻi i koʻu lima ma kona ʻaoʻao, ʻaʻole loa au e manaʻoʻiʻo.”
26¶ A pō ʻawalu aʻela, ma loko hou kāna poʻe haumāna, a ʻo Toma kekahi me lākou. A ua pani ʻia nā puka, hele maila ʻo Iesū, a kū maila i waena, ʻī maila, “Aloha ʻoukou.”
27A laila ʻī maila ʻo ia iā Toma, “E ʻō mai i kou manamana lima ma ʻaneʻi, a e nānā i koʻu mau lima, e ʻō mai i kou lima, a e hou iho ma kuʻu ʻaoʻao; a mai noho a kānalua; akā, e manaʻoʻiʻo.”
28ʻŌlelo akula ʻo Toma iā ia, ʻī akula, “E koʻu Haku, a me koʻu Akua!”
29ʻŌlelo maila ʻo Iesū iā ia, “E Toma, no kou ʻike maka ʻana mai iaʻu, ua manaʻoʻiʻo ʻoe; pōmaikaʻi ka poʻe ʻike maka ʻole, a manaʻoʻiʻo hoʻi.”
30¶ A nui nō hoʻi nā hana mana ʻē aʻe a Iesū i hana ai i mua o kāna poʻe haumāna, ʻaʻole i palapala ʻia i loko o kēia buke.
31Akā, ua palapala ʻia kēia mau mea i manaʻoʻiʻo ai ʻoukou, ʻo Iesū ka Mesia, ke Keiki a ke Akua; a i ko ʻoukou manaʻoʻiʻo ʻana, i loaʻa ai iā ʻoukou ke ola ma kona inoa.
موجودہ انتخاب:
KA ʻEUANELIO I KĀKAU ʻIA AI E IOANE 20: KBH
سرخی
کاپی
موازنہ
شئیر
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Ka Baibala Hemolele © Partners Development Foundation, 2018.
