KA ʻEUANELIO I KĀKAU ʻIA AI E IOANE 19
19
MOKUNA XIX.
1 Hahau ʻia ʻo Iesū, a kau ʻia akula ka lei kākalaioa ma luna ona a me ka ʻaʻahu ʻulaʻula. 16 Hāʻawi akula ʻo Pilato iā ia e make ma ke keʻa. 38 No kona kanu ʻia ʻana.
1¶ A laila lālau aʻela ʻo Pilato iā Iesū, a hahau ihola iā ia.
2Ulana ihola nā koa i lei aliʻi kākalaioa, a kau akula ma luna o kona poʻo, a kāhiko akula iā ia i ka ʻaʻahu ʻulaʻula,
3ʻī akula, “Aloha ʻoe, e ke Aliʻi o nā Iudaio!” a papaʻi akula lākou iā ia.
4Hele hou maila ʻo Pilato i waho, ʻī maila iā lākou, “Aia hoʻi, ke alakaʻi mai nei au iā ia i waho i o ʻoukou lā, i ʻike ai ʻoukou, ʻaʻole i loaʻa iaʻu ka hewa iki i loko ona.”
5A laila hele maila ʻo Iesū i waho, e kau ana ma luna ona ka lei aliʻi kākalaioa, a me ka ʻaʻahu ʻulaʻula. A ʻī akula ʻo Pilato iā lākou, “Eia hoʻi ke Kanaka!”
6A ʻike aʻela nā kāhuna nui a me nā ilāmuku, hea nui akula lākou, ʻī akula, “E kau ma ke keʻa, e kau iā ia ma ke keʻa.” ʻĪ maila ʻo Pilato iā lākou, “Na ʻoukou ia e lawe, a e kau ma ke keʻa; no ka mea, ʻaʻole i loaʻa iaʻu ka hewa i loko ona.”
7ʻŌlelo akula nā Iudaio iā ia, “He kānāwai ko mākou, a ma ko mākou kānāwai, he pono nō e make ia; no ka mea, ua ʻōlelo mai ia, ʻo ia ke Keiki a ke Akua.”
8A lohe aʻela ʻo Pilato i kēia ʻōlelo, makaʻu loa ihola ia.
9A komo hou akula ia i loko o kahi hoʻokolokolo, a nīnau akula iā Iesū, “No hea lā ʻoe?” ʻAʻole ʻōlelo mai ʻo Iesū iā ia.
10A laila ʻī akula ʻo Pilato iā ia, “ʻAʻole anei ʻoe e ʻōlelo mai iaʻu? ʻAʻole anei ʻoe i ʻike he mana koʻu e kau iā ʻoe ma ke keʻa, a he mana koʻu e hoʻokuʻu aku iā ʻoe?”
11ʻŌlelo maila ʻo Iesū, “ʻAʻohe ou mana iki e kūʻē iaʻu, ke ʻole i hāʻawi ʻia mai ia nou mai luna mai; no ia mea, ua ʻoi aku ka hewa o ka mea nāna au i hāʻawi aku iā ʻoe.”
12Mai ia manawa mai, ʻimi ihola ʻo Pilato e hoʻokuʻu aku iā ia. Akā, hea nui maila nā Iudaio, ʻī maila, “Inā e hoʻokuʻu aku ʻoe iā ia, ʻaʻole ou aloha iā Kaisara. ʻO ka mea e hoʻoaliʻi iā ia iho, ua kūʻē nō ʻo ia iā Kaisara.”
13A lohe nō ʻo Pilato i kēia ʻōlelo, alakaʻi akula ʻo ia iā Iesū i waho, a noho iho ma luna o ka noho hoʻokolokolo, ma kahi i kapa ʻia, he Kīpapa Pōhaku, a ʻo Gabata ma ka ʻōlelo Hebera.
14ʻO ka wā hoʻomākaukau ia no ka Mōliaola, ʻo ke ono paha o ka hora; a ʻī maila ia i nā Iudaio, “Eia hoʻi ko ʻoukou Aliʻi!”
15Kāhea nui akula lākou, “E lawe aku, e lawe aku, e kau iā ia ma ke keʻa.” ʻĪ akula ʻo Pilato iā lākou, “E kau aku anei au i ko ʻoukou Aliʻi ma ke keʻa?” ʻĪ maila nā kāhuna nui, “ʻAʻohe o mākou aliʻi, ʻo Kaisara wale nō.”
16A laila hāʻawi akula kēlā iā ia na lākou, e kau ʻia ʻo ia ma ke keʻa. A lālau akula lākou iā Iesū, a alakaʻi akula.
17¶ A hele akula ia e hali ana i kona keʻa ma kahi i kapa ʻia ʻo ka Iwi Poʻo, a ʻo Golegota ma ka ʻōlelo Hebera.
18Ma laila lākou i kau ai iā ia ma ke keʻa, a me nā kānaka ʻelua me ia, ma kēlā ʻaoʻao kēia ʻaoʻao, a ʻo Iesū ma waena.
19Kākau iho ʻo Pilato i palapala, a kau akula ma ke keʻa. Pēnēia ka palapala ʻana, “ʻO IESŪ NO NAZARETA KE ALIʻI O NĀ IUDAIO.”
20Nui nō ka poʻe Iudaio i heluhelu i ua palapala lā; no ka mea, ua kokoke ma ke kūlanakauhale ka wahi i kaulia ai ʻo Iesū ma ke keʻa; a ua kākau ʻia ia mea ma kā Hebera ʻōlelo, a me kā Helene, a me kā Roma.
21ʻŌlelo akula nā kāhuna nui o nā Iudaio iā Pilato, “Mai palapala ʻoe, ‘ʻO ke Aliʻi o nā Iudaio’; akā, ua ʻōlelo nō ia, ‘ʻO wau nō ke Aliʻi o nā Iudaio.’”
22ʻŌlelo maila ʻo Pilato, “ʻO ka mea aʻu i palapala ai, ʻo ia kaʻu i palapala.”
23¶ A i ka manawa i kau ai ka poʻe koa iā Iesū ma ke keʻa, lawe nō lākou i kona mau kapa, a puʻunaue aʻela i nā puʻu ʻehā, pākahi no kēlā koa, kēia koa, a me ke kapa komo. ʻAʻole i humuhumu ʻia ke kapa komo, ua ulana ʻokoʻa nō ia mai luna, a hala loa i lalo.
24No laila ʻī aʻela lākou i kekahi i kekahi, “Mai haehae kākou i kēia; akā, e hailona kākou i akāka ai ka mea nona kēia mea”; i kō ai ka Palapala Hemolele, ka mea i ʻōlelo mai, “«Ua puʻunaue lākou i koʻu mau kapa, a ua hailona lākou no kuʻu kapa komo». Hana nō hoʻi nā koa ia mau mea.”
25Kū aʻela ma ke keʻa o Iesū kona makuahine, a me ka hoahānau o kona makuahine, ʻo Maria ka wahine a Kelopa, a me Maria Magedalene.
26ʻIke maila ʻo Iesū i ka makuahine, a me ka haumāna āna i aloha ai e kū ana, ʻī maila ia i kona makuahine, “E ka wahine, e nānā i kāu keiki!”
27A laila ʻī maila ia i ka haumāna, “E nānā i kou makuahine!” A mai ia hora mai hoʻokipa akula ua haumāna lā iā ia ma kona hale iho.
28¶ Ma hope aʻela, ʻike ihola ʻo Iesū, ua pau nā mea i ka hana ʻia, ʻī maila ia, i kō ai ka Palapala Hemolele, “Ua make wai au.”
29E waiho ana i laila kekahi ipu, ua piha i ka vīnega; a hoʻopiha ihola lākou i ka huʻahuʻa kai i ka vīnega, a kau akula ma ka lāʻau husopa, a hoʻopā akula i kona waha.
30A loaʻa iā Iesū ka vīnega, ʻī maila ia, “Pau akula!” A kūlou ihola kona poʻo, a kuʻu aku ia i ka ʻuhane.
31¶ No laila hoʻi, ʻo nā Iudaio, i ʻole e waiho nā kino ma ke keʻa i ka Sābati; no ka mea, ʻo ka wā hoʻomākaukau nō ia, (a he lā nui ʻo ua Sābati lā,) noi akula lākou iā Pilato, e uhaʻi ʻia nā wāwae o lākou, a e lawe ʻia aku.
32A laila hele mai ka poʻe koa, a uhaʻi iā lākou nā wāwae o ke kanaka mua, a me ko kekahi i kāu pū ʻia me Iesū ma ke keʻa.
33A hiki lākou i o Iesū lā, a ʻike aʻela, ua make loa ia, ʻaʻole lākou i uhaʻi aku i kona mau wāwae.
34Akā, ʻō akula kekahi koa i kona ʻaoʻao i ka ihe, a kahe koke mai nō ke koko a me ka wai.
35A ʻo ka mea ʻike maka, hōʻike akula ia, a he ʻoiaʻiʻo kāna hōʻike ʻana, a ua ʻike nō ia, ke ʻōlelo pololei nei ia, i manaʻoʻiʻo ai ʻoukou.
36No ka mea, ua hana ʻia kēia mau mea, i kō ai ka Palapala Hemolele, “«ʻAʻole e uhaʻi ʻia kekahi iwi ona».”
37Ua ʻōlelo mai hoʻi ma kekahi Palapala Hemolele, “«E nānā auaneʻi lākou i ka mea a lākou i ʻō aku ai».”
38¶ Ma hope iho, noi akula ʻo Iosepa, no ʻArimataia iā Pilato, e ʻae iā ia e lawe aku i ke kino o Iesū, he haumāna hoʻi ia na Iesū, ua hūnā ʻia nō naʻe i ka makaʻu i nā Iudaio; a ʻae maila ʻo Pilato iā ia. Hele akula ia, a lawe akula i ke kino o Iesū.
39Hele maila nō hoʻi ʻo Nikodemo, (ʻo ia ka mea i hele i o Iesū lā ma mua i ka pō,) e lawe mai ana i ka lāʻau, he mura i hui ʻia me ka ʻaloe, hoʻokahi haneri paona paha.
40Lawe aʻela lāua i ke kino o Iesū, a wahī ihola iā ia i ka lole olonā me ua lāʻau ʻala lā, e like me ke ʻano o ke kanu ʻana a nā Iudaio.
41A ma ua wahi lā, kahi i kau ʻia ai ʻo ia ma ke keʻa, he māla; a ma loko o ua māla lā he hale kupapaʻu hou, ʻaʻole i waiho ʻia kekahi kanaka i loko.
42Ma laila hoʻi, no ka hoʻomākaukau ʻana o nā Iudaio, i waiho aku ai lāua iā Iesū; no ka mea, ua kokoke ka hale kupapaʻu.
موجودہ انتخاب:
KA ʻEUANELIO I KĀKAU ʻIA AI E IOANE 19: KBH
سرخی
کاپی
موازنہ
شئیر
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Ka Baibala Hemolele © Partners Development Foundation, 2018.
