Njéga̰g-Rəwtaje 7
BN89
7
Dəwje lə Gedeo̰ d’as tɔl-munda (300) ba
1Jerubaal gə́ to Gedeo̰, gə njérɔje lai gə́ d’isi səa na̰’d lé teḛ gə ndɔ rad ndá d’aw d’wa loo-si dee mbɔr kəm-rəw-mán gə́ Arɔd. Loo-si Madianje to kel dɔgel lə Gedeo̰ mbɔr dɔdərloo gə́ Moré gə́ to mee wəl-loo’g.
2Njesigənea̰ ula Gedeo̰ pana: Dəwje gə́ d’isi səi neelé bula yaa̰ boo kəm kam m’ila Madianje meḛ ji dee’g el, nà banelə Israɛlje d’a kula ne rɔnduba dɔ rɔ dee-deḛ’g kɔsm ne rəw pana: Ji neḛje ya ɓa n’taaje ne rɔ neḛje. 3#TtG 20.8 Maji kari ila ta neelé mbi njérɔje’g pana: Maji kar yeḛ gə́ to njeɓel gə́ unda bala tigi-tigi ndá tel ɔr rəa dɔ mbal gə́ Galaad lé aw ɓee.
Ndá dəwje tɔl-dɔg-loo-rɔ-joo (20.000) mbuna njérɔje’g lé tel d’aw ɓee ar ges dee gə́ nai to tɔl-dɔg-loo-dɔg (10.000) ba. 4Njesigənea̰ ula Gedeo̰ pana: Njérɔje lé bula yaa̰ ya ɓəi. Ar dee d’aw ta mán’g ndá lé gə́ neelé ɓa m’a mbər dee keneŋ kari, yeḛ gə́ m’a kulai pana: Maji kar yeḛ neelé aw səi ndá a kaw səi ya, nɛ yeḛ gə́ m’a kulai pana: Maji karee aw səi el ndá a kaw səi el ya tɔ.
5Gedeo̰ ar njérɔje lé d’aw ta mán’g ndá Njesigənea̰ ula Gedeo̰ pana: Deḛ lai gə́ kəblə mán lagm-lagm gə ndo̰ dee to gə́ bisi bèe lé i a kɔr kəm dee kunda dee ɓəd ləm, deḛ gə́ d’ɔs kəji dee naŋg ɓa mba kai mán kara i a kɔr kəm dee kunda dee ɓəd ləm tɔ.
6Deḛ gə́ kəblə mán gə ji dee ɓa d’aw ne ta dee’g ɓəi lé bula d’as dəwje tɔl-munda (300) ndá ges dəwje lai gə́ nai lé d’ɔs kəji dee naŋg ɓa mba kai mán tɔ. 7Njesigənea̰ ula Gedeo̰ pana: Njérɔje gə́ tɔl-munda (300) ba gə́ kəblə mán neelé ɓa m’a kaji sí ne ləm, m’a kya̰ ne Madianje jii’g ləm tɔ. Maji kar ges njérɔje lai gə́ nai lé nana kara tel aw loo-siée’g siée’g ya.
8Deḛ d’odo nésɔje lə koso-dəwje ləm, gə to̰to̰je lə dee ləm tɔ. Tɔɓəi Gedeo̰ ya̰ koso-dəwje gə́ Israɛl lai ar nana kara tel aw mee kəi-kubu’g ləa-ləa, nɛ dəwje gə́ tɔl-munda (300) lé ba yeḛ ŋgəm dee rəa’g.
Loo-si Madianje to gelee’g mee wəl-loo’g.
Nétɔji gə́ wɔji dɔ kun baŋga
9Njesigənea̰ ula Gedeo̰ loondul’g pana: Ḭta aw loo-si dee’g mbata ma m’uba dee m’ya̰ dee jii’g mba̰. 10Ɓó lé i ɓəl gə mba kaw rɔ dee’g ndá ar Pura, kura ləi aw səi na̰’d. 11I a koo taje lai gə́ d’a gə pa ndá gée gə́ gogo jii a ɓar mèr-mèr, bèe ndá aw loo-si dee’g lé ya.
Yeḛ aw gə Pura, kura ləa lé na̰’d saar teḛ ŋgaŋ loo-si dee’g raga tɔ. 12Madianje ləm, Amalekje ləma, gə njé gə́ Bər ləm tɔ lé yal na̰ pə mee wəl-loo’g, bula digi-digi to gə́ beedéje bèe ləm, jambalje lə dee kara dum tura to gə́ nagəra gə́ ta baa-boo-kad’g bèe ləm tɔ. 13Loo gə́ Gedeo̰ ree ndá aa oo, dəw kára si ndaji ta ni ləa ar kuramaree. Yeḛ pana: Ma m’ni, ndá aa oo, mbə nduji kó-ɔrj gə́ ndèm nduburu loo-si Madianje’g, yee aw saar dar kəi-kubu aree oso, yee tel kəi-kubu lé ar dəa to gə́ naŋg ləm, ar mée to gə́ tar ləm tɔ ɓa tel oso ɓəi.
14Kuramaree lé tel ilá keneŋ pana: To né gə́ raŋg el, nɛ to kiambas lə Gedeo̰, ŋgolə Joas, dəw gə́ Israɛl lé ya, Ala uba Madianje gə boo-njérɔje lai ya̰ dee jia’g.
15Loo gə́ Gedeo̰ oo sor ni gə gelee gə́ kɔr lé ndá yeḛ dəb kəmee naŋg. Tɔɓəi yeḛ tel ree loo-si Israɛlje’g ula dee pana: Ḭje tar mbata Njesigənea̰ uba Madianje gə boo-njérɔje lə dee ya̰ dee ji sí’g ya.
Kaw gə́ Madianje d’aw dɔ na̰’d pum-pum lé
16Njérɔje gə́ tɔl-munda (300) lé Gedeo̰ kai dee kudu munda ndá yeḛ ar dee to̰to̰je ji dee’g kel kel ləm, gə kulum manje gə́ mee dee to kari ba ləma, gə néndogóje gə́ to mee kulum manje’g ləm tɔ. 17Yeḛ ula dee pana: Seḭ a kaamje gərərə ndá seḭ a raje to gə́ ma m’ra lé tɔ. Loo gə́ m’a teḛ loo-si dee’g ndá né gə́ m’a ra lé seḭ kara a raje bèe ya tɔ. 18Loo gə́ m’a kim to̰to̰, ma ləm gə deḛ lai gə́ d’aw səm na̰’d ləm tɔ ndá seḭ kara a kimje to̰to̰ gir loo-si dee’g tɔɓəi seḭ a pajena: Jeḛ n’ra mbata Njesigənea̰ ləm, jeḛ n’ra mbata Gedeo̰ ləm tɔ.
19Gedeo̰ gə njérɔje gə́ tɔl (100) gə́ d’aw səa lé teḛ mbɔr loo-si dee’g dəb gə kàr-ŋgəm-loo gə́ to dan loo bab, to kàr gə́ ree d’ar njéŋgəmlooje taa ne tor na̰ lé. Deḛ d’im to̰to̰je lé ləm, deḛ kunda kulum manje gə́ to ji dee’g lé tɔ ləm tɔ. 20Kudu njérɔje gə́ munda lé d’im to̰to̰ ləm, gə tɔ kulum manje ləm tɔ, d’wa néndogóje jigel dee’g ləm, to̰to̰je to jikɔl dee’g mba kim ləma, deḛ d’unda bula u-u-u ləm tɔ pana: Kiambas lé to ka̰ Njesigənea̰ ləm, to ka̰ Gedeo̰ ləm tɔ.
21Deḛ lé nana kara aar loo-kaaree gə́ d’undá keneŋ gir loo-si dee’g lé ya. Ndá deḛ lai gə́ d’isi loo-si dee’g lé buŋga na̰ d’aḭ ra né tar wəl-wəl mba taa ne rɔ dee. 22Dəwje gə́ tɔl-munda (300) lé tel d’im to̰to̰je ya tɔɓəi, ndá mee loo-si dee’g lai lé Njesigənea̰ ar dee-deḛ nja tel tɔs na̰ gə kiambas. Njérɔje d’aḭ saar teḛ Bet-Sita par gə́ Serera saar teḛ ŋgaŋ loo’g lə Abel-Mehola gə́ to ta Tabat’g dəb.
23Yen ŋga njérɔje gə́ Israɛl mbo̰ dɔ na̰ ree: to Neptalije, gə Aserje, gə Manasə lai ndá d’ḭ tuba Madianje tɔ. 24Gedeo̰ ula njékaḭkulaje dɔ mbal gə́ Eprayim lai mba kar dee d’aw pana: Reeje mba kiŋgaje kəm Madianje taaje loo-kuru-manje saar teḛ ne Bet-Bara ləm, gə yee gə́ Jurdɛ̰ ləm tɔ.
Dəwje gə́ Eprayim lai mbo̰ dɔ na̰ ndá deḛ gaŋg loo-kuru-mán saar teḛ ne Bet-Bara ləm, gə yee gə́ Jurdɛ̰ lé ləm tɔ. 25Deḛ d’wa mbaije gə́ Madian joo gə́ ri dee lə Oreb gə Jeeb, deḛ tɔl Oreb dɔ mbal gə́ Oreb ləm, deḛ tɔl Jeeb loo-mbula-nduú’g lə Jeeb ləm tɔ. Deḛ tuba Madianje ndá ree gə dɔ Oreb gə dɔ Jeeb d’ar Gedeo̰ kel tura-baa gə́ Jurdɛ̰ gə́ nu tɔ.