Ap'u 40
40
Arm'ertu avp'resin avm'atr kavla sei
1Dav'a, itauatah a si lera, dui na naui m'iel m'am'an a mlin a Itsip, m'a dui na p'ret nan aran si stu kinkin karani ti mlinar, iv'i mlin lil a Itsip, nln irer anr. 2Laha, a Veru nln irer anr arm'ertu na parian, arv'i mlinar dui na naui m'iel m'am'an, m'a mlinar dui na p'ret nan. 3Laha, itaur al p'resin iter asn nmahan a mlin na m'rnur, iv'i nut a Susev' ip'resin. 4Mlin na m'rnur itaur al lm'an a Susev' a ti ipap'aurr. Dav'a, arlak al p'resin ip'arei isusupa.
5Dav'a, dui na naui m'iel m'am'an a mlin a Itsip m'a dui na p'ret nan la arlak al p'resin ha, arla sei arna m'etrienar arna lihat iamk. Sei arlei iv'iv'en si ururaur. 6M'ih nen m'etav'aran a Susev' ima asnr kap'ar, kala ti arrn istu. 7Laha, imiman anr arm'ertuan a Veru arru, la arlak m'ei al p'resin al nmahan a mlinan hara, kavr ti a, “?Nla ti kam'i krru krrn istu dika inap'i?”
8Arvr ani karvr ti a, “Nrla si kinkin naran nrm'atr, v'eti m'ertu ipavrp'ep'a sei m'etrien lera iv'iv'ani ihei.” Laha, a Susev' ivr anr kavr ti a, “Atua irndu ti ipavrp'ep'a sei iv'iv'ani uaki. Parvri asnk.”
9Sarei, mlinar dui na naui m'iel ivrp'ep'a m'etrienan an a Susev' kavr ti a, “Parni, nm'atr kala ti nahau iter arna nahk. 10Arna nahau nen plkan itl. Iv'amk m'a ti issvt, ninen iak, laha navan iak katarep' dav'a kam'am'd. 11Sarei, panikinan a Veru iter al lm'ak. Laha, nlev' krep kaphsi ti uin iv'a a nl panikinan a Veru, katu panikin al lm'an a Veru.”
12Laha, a Susev' ivr ani, kavr ti a, “Sei km'atr kalei hilaha. Plka nahau itl iv'i napn itl. 13Arna nitla napn uaki a Veru ipani ti nahm ipav'a eia, katauh arna pariam la kani itauamu ha, laha patu panikinan a Veru al lm'an ml, inep'a nut kani inap'ei naran kv'i dui na naui m'iel m'am'an. 14V'eti pav'ahur kana naran si udlani ipama kap'as asnm, kav'iv'en vtmienam a kana kavrur kana m'ei a Veru, kalev'la kana al nmah laha. 15Sena ti avv'nah kana dan arna v'anuar ardu a Isrel. Arna nut laha ml kana nahan si kinkin ipastu a ti apatu kana al p'resin sanan.”
16Naran mlinar dui na p'ret ila ti v'nen lera ip'as, ivr an a Susev' kavr ti a, “Kana ml nm'atr kala sei. Laha, parni, naten tva itl iter arna ptk. 17Al naten ki iter eia, p'ret kinkin ururaur iter, iv'i p'ret nan a Veru. Laha, m'anh avhan p'ret lahara iter al naten arna ptk.”
18Laha, a Susev' ivrprani, kavr ti a, “Sei km'atr kalei hilaha. Naten itl iv'i napn itl. 19Arna nitla napn uaki a Veru ipatrus ptm kani ti palal arna nai. Laha, m'anh apavhan p'akm.”
20Dav'a, arna nitla napn, la iv'i pnul nen a Veru ha, hin ien tim'ah nar arm'ertuan udlani. Laha, iani ti nahn a mlinar dui na naui m'iel m'am'an iv'a eia ml arna nahr m'ertuan. 21Sarei, itu mlinar dui na naui m'iel m'am'an iv'a ml arna parian, hin ilev' panikin kataui al lm'an a Veru. 22V'eti isrp'n mlinar dui na p'ret nan, inep'a nut a Susev' itv'iv'en sarei anr inap'ei. 23V'eti mlin na naui m'iel iav'ahur a Susev' ml, hin ivnapn ani.
Поточний вибір:
Ap'u 40: nmb
Позначайте
Копіювати
Порівняти
Поділитись
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 2023 Presbyterian Reformed Church of Australia