إنجيل متّى 15
15
الفصل خمسطاش
1في ديك الساعة جاو نْعند يَسوع المُعلّمين د الشريعة والفرّيسيّين من أُورُشَليم، كَيْقولو: 2"علاش التلامد ديالك كَيْخالفو التقاليد د الشيوخ؟ حيت ما كَيْغسلو شي اليَدّين ديالوم ملّي كَياكلو الخبز." 3ردّ عليهُم يَسوع وْقالّوم: "وْحتّى أنتُمَ علاش كَتْخالفو وَصيّة اللّٰه بْسباب التقاليد ديالكُم؟ 4حيت اللّٰه وصّى كيقول: «وَقّر باباك ويمّاك، والّي كيزبّل في باباه أَوْلا يمّاه، لازم يموت.»#15:4 هَد الاقتباس من سفر الخروج 20:12 و21:17. 5أمّا أنتُمَ كَتْقولو: «أَي واحد الّي عندو باش يعاون باباه أَوْلا يمّاه، إدا قالّوم: "كُل شي الّي عندي باش نعاونكُم، هُوَ هدية ناللّٰه،" 6ديك الساعة ما خصّوْ شي يكرّم الوالِدين ديالو.» وْهَيداك بطّلْتو وَصيّة اللّٰه بالتقاليد ديالكُم. 7آ المُنافقين، راه الّي تنبّأ عليكُم إشَعْيا كان صحيح ملّي قال: 8«هَد القوم كَيْكرّموني بالشفايف ديالوم، أمّا القلب ديالوم بعيد عليَّ. 9باطل كَيْعبدوني وْكَيْعلّمو بالتعْليم الّي هُوَ من الوَصايا د الناس.»"#15:9 هَد الاقتباس من سفر النَّبي إشعيا 29:13.
10وْعَيّط يَسوع نالناس وْقالّوم: "سمعو وْفهمو. 11ديك الشي الّي كيدخل نالدقوم ما كيوسّخ شي الإنسان. بالعكس، الّي كيخرج من الدقوم، هُوَ الّي كَيْوسّخوْ." 12ديك الساعة جاو التلامد ديالو وْقالو لو: "واش كتعرف بلّي الفرّيسيّين تعصّبو ملّي سمعو هَد الكلام؟" 13ردّ عليهُم يَسوع وْقال: "كُل غرس الّي ما غرسوْ شي بابا السماوي غادي يتقلّع. 14خلّيوهُم. هُمَ عُمْيان مݣوّدين العُمْيان. وِادا كان العمى كيݣوّد العمى، غادي يطيحو بْجوج بِهُم في شي حفرة." 15جاوب بُطْرُس وْقال لو: "فسّر نّا هَد المتال." 16قال يَسوع: "واش حتّى أنتُمَ باقي ما فهمْتو شي؟ 17واش ما كَتْفهمو شي بلّي كُل شي الّي كيدخل نالدقوم كيݣوز نالمعِدة وْكيخرج من الجسم؟ 18أمّا الّي كيخرج من الدقوم، كيجي من القلب، وْديك الشي كيوسّخ الإنسان. 19حيت من القلب كَيْخرجو الأفْكار القباحين، القتل، الزنا، الفساد، السرقة، شهادة الزور، الكُفر. 20هَد الشي هُوَ الّي كيوسّخ الإنسان، أمّا باش ياكل باليَدّين بلا غسيل، هَد الشي ما كيوسّخ شي الإنسان."
21خرج يَسوع من تمّاك وْمشى نالمنْطَقة د صور وْصَيدا. 22وْواحد المراة كَنْعانيّة ماجّة من ديك الجّهة عيّطَتْ لو، كتقول: "رْحمْني، يا رَبّي، بن داود! بِنْتي مسْكونة بواحد الجنّ الّي كيعدّباْ بزّاف." 23أمّا يَسوع ما ردّ عليها حتّى بْكلمة. وْجاو التلامد ديالو وْطلبو لو وْقالو: "صيفطاْ فحالاْ، حيت هي كتغوّت من مورانا." 24ردّ عليهُم وْقال: "أنا مصيفط غير نالغنم المتْلوفة د الدار د إسْرائيل." 25وَلكن جات المراة وْسجدَتْ لو، كتقول: "يا رَبّي، عاونْني!" 26ردّ عليها وْقال: "ماشي مزيان نشبّر الخبز د الولاد وْنسيّبوْ نالجّرا." 27وْقالت: "كاينة، يا رَبّي، وَلكن حتّى الجّرا كَياكلو من الفتاوت الّي كتطيح من الطيفور د مواليهُم." 28ديك الساعة جاوب يَسوع وْقالّاْ: "آ المراة، الإيمان ديالك كبير. غادي يكون عندك كيفما بغيتِ." وْتشافات البنيتة ديالاْ في ديك الساعة.
29خرج يَسوع من تمّاك وْمشى نْجهة البحَر د الجَليل. وْطلَع نالجّبل وْݣلس تمّاك، 30وْجاو نْعندو بزّاف د الناس وْمعهُم العُرَج والعُمْيان والمكْحوشين والزيازن ويَخرين بزّاف، وْنزّلوهُم عند الرِّجلين د يَسوع وْشافاهُم. 31تعجّبو الناس ملّي شافو الزيازن كَيْتكلّمو، والمكْحوشين صحاحو، والعُرَج كَيْمشيو، والعُمْيان كَيْشوفو. وْمجّدو الإلَه د إسْرائيل.
32وْعَيّط يَسوع نالتلامد ديالو وْقال: "كيعزّو عليَّ الناس، حيت هَدي تلت أيّام وْهُمَ ݣالسين معيَ وْما عندوم ما ياكلو. وْما بغيتْ شي نصيفطوم صايمين، وَقيلا يقدرو يسخفو في الطريق." 33ديك الساعة قالو لو التلامد ديالو: "ماين غادي يجينا في الخلا هَد المقْدار د الخبز حتّى يشبعو هَد الكتْرة د البشر؟" 34قالّوم يَسوع: "شحال د الخُبزات عندكُم؟" قالو: "سبعة، وْشي حويتات قلالين." 35وآمر الناس يݣلسو في الرحْبة، 36وْشبّر السبعة د الخُبزات والحوت وْشكر وْقطّع وْعْطى نالتلامد ديالو، والتلامد عْطاو نالناس. 37وْكلاو كاملين وْشبعو. وْجمعو الّي شاط من الكسور سبعة د السلال معمّرين. 38وْهَدوك الّي كلاو كانو أربع آلاف رَجل، زايد النسا والعيال. 39ديك الساعة صيفط الناس فحالوم وْدخل نالفلوكة وْمشى نالمنْطَقة د مَجْدَن.
Поточний вибір:
إنجيل متّى 15: ary
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 2023 (Active), Instituto de Asistencia Teológica (IAT)
