खास-चैले के काँम 14
14
इकुनियुम नंगर दे संत्त-पौलुस अरह् संत्त-बरनबास
1इकुनियुम नंगर दी ऐशी घट्णाँ घटी: के संत्त-पौलुस अरह् संत्त-बरनबास ऐ यहूदियों के चौत्रे दे हुटे, अरह् ऐशा बखाँण करा; के यहूदी, अरह् यूनानी, दुईन्नें बैजाऐ भहित्ते लोग बिश्वाषी बंणें। 2परह् जिनू यहूदियों ऐ बिश्वाष ने करी, तिन्ऐं गऐर-यहूदी लोग भड़काऐ; अरह् तिनू लोगो के मंन दा, बिश्वाषी भाऐ-बंईणों खे बिरूध पय्दा करा के से तिनके बंऐरी बंणीं गुऐ। 3संत्त-पौलुस अरह् बरनबास बैजाऐ देसो तोड़ी तेथै रूऐ, अरह् प्रभू गाशी भोर्षा करियों, नींडर हऐयों प्रचार कर्दे रूऐ; अरह् प्रभू ऐं भे तिनके हाथै बैजाऐ चींह्न-चंम्त्तकार देखाऐयों आप्णीं कृपा की खुषख्बरी का नंतिजा देखाया। 4अरह् तेथै नंगर-नंगर दे लोगो मुँझी फूट पढ़ियों; दो गुट बंणें कुछ लोग यहूदी के ढबे अरह् कुछ लोग प्रभू यीशू के खास-चैले के ढबे हऐ गुऐ। 5जबे गऐर-यहूदियों अरह् यहूदियों के हाक्में ऐ मीलियों खास-चैले की गईलो बुरा बर्ताव करणाँ, अरह् तिनू गाशी पथराव कर्णों की कोशिष करी। 6परह् जेई संत्त-पौलुस अरह् संत्त-बरनबास कैई ईयों बातो का पता लागा; तेई से तेथै शे लुकाउनिया के लुस्त्रा अरह् दिरबे जैष्णें नंगरोंह् शे उडे-पुडे के ईलाके दे भागियों बंची गुऐ। 7तेथै भे से खुषख्बरी का प्रचार कर्दे गुऐ।
संत्त-पौलुस अरह् संत्त-बरनबास लुस्रा अरह् दिरबे दे
8लुस्त्रा नंगर दा ऐक आदमी बईठा अंदा थिया, जेस्की बाँगणी शूक्की रंही थी, से तेष्णा ही पय्दा हुआ थिया, अरह् से हाँड्णों के तअ सार भे जाँणों ने थिया। 9तेने आदमी ऐ संत्त-पौलुस कैई शे बचन शुँणी लुऐ थिऐ, तबे संत्त-पौलुस ऐ तेस्की ढबे निजाऐयों देखो के ऐस्के मंन दा चाँग्गै हणों का बिश्वाष असो। 10संत्त-पौलुस ऐ जूराल़ो बुलो, “आप्णी बाँगणी के सहारे सीधा खह्ड़ा हों” से ऊष्टियों आप्णी बाँगणीं के सहारे खह्ड़ा हुआ, अरह् ऊडा-पुडा हाँडा। 11जबे लोगे ऐं ऐजो देखो, तअ से आप्णीं लुकाउनिया भाषा दो जुराल़ों बुल्दे लागे; “देखो, कुँऐं देव्ता अमाँरे बीच दा आदमी के रूप-भेंषों दा आऐ रूवा।” 12सेजे लोग संत्त-बरनबास खे ज्यूस, अरह् संत्त-पौलुस खे हिरमेस बुल्दे लागे, (संत्त-पौलुस खे हिरमेस ईन्देंखे बुला, के से मुँख्या बखाँण कर्णो वाल़ा थिया।) 13नंगर शी बाँऐडी दाँई ज्यूस देव्त्ते के देऊँठी थी, अरह् तेथै का पुज्जगी फुलों की माँल़ा लई बाकरा#14:13 बोल़द आँणियों काट्णों खे तेथै पंह्ईचा, साथी आँणियों फाट्क खल़ी कैई पंह्ईचा; से तिनू बैजाऐ बै-शुमाँर लोगों की भीड़ आरी तिनखे बल़ी चड़ाँणी चहाँव थिया; 14परह् जबे तिनू खास-चैले बरनबास अरह् पौलुस ऐ ऐजो शुँणों, तिन्ऐं पंण्मिश्वर की निदया कर्णों के बिरूध दे आप्णे खट्णों ऊपाड़े अरह् लोगो की भीड़ो मुँझी घुसरियों जूराल़ो बुल्दे लागे, 15“ओ, प्यारे दोस्त्तो! तुँऐं ऐजो का करी लो? आँमें भे तअ तुँओं ही जेष्णें सुख्ह-दु:ख्ह भोगणों वाल़े आदमी असो: ईथै आँमें तुँओं कैई शे खुषख्बरी शुँणाँदे आऐ रूऐ, के तुँऐं ईनू बै-कार की बातो शे पाछू फीरियों तेसी जींऊँदे पंण्मिश्वर के ढबे फिरो; जेने स्वर्ग, धर्ती, संमुन्द्र, अरह् ईन्दों जुण्जो किऐ असो ऐ सेजो सब-कुछ आप्णे ही हाथै बादो बंणाँऐ थुओं। 16तेने पुराँणें ज़ूगौ दी बादी जात्तियों खे आप्णी-आप्णी बाटो दी ज़ाणों दिती। 17परह् तुँओं तेने आप्णी गुवाऐ-शाज़्त्त दिऐ बीना ने छुड़ी; किन्देंखे के तेने तुँवारी गईलो भलाऐ करी थंऐ; अरह् तुँओं खे तेने अस्माँनों शी बर्षा दिती, अरह् बख्त्तो-बख्त्तो दी तुवाँरी जिम्मी की शाख्ह खे बर्षा दिती, के तुवाँरे पेटो खे भोजन दियों, अरह् तुवाँरे मंन खुषी शे भरी दित्ते।” 18ऐजो बुलियों तिन्ऐं लोग बैजाऐ मुष्किल-कंठ्णाँई शे हट्ठीं रूके; के ऐजे लोग कोद्दी आँमों खे किऐ बल़ी ने चड़ाँव। 19परह् अन्ताकिया अरह् इकुनियुम शे कुछ़ यहूदी लोग तेथै आऐ, अरह् तेथै के लोग आप्णी गईलो मिलाऐं दित्ते; अरह् तिन्ऐ संत्त-पौलुस गाशी पथराच़ करी, अरह् तेसी मँरा अँदा जाँणियों नंगर शा झ़िड़ी-खींच़ियों बैरंईम्मीं शा ऊँदा बाईरी ऊँदा फैरकाऐ दिता। 20जबे चैले संत्त-पौलुस के चौऊँ ढबै कंट्ठै हुऐ, तअ से बादे झ़ुहणें हजों बीऊँजे अरह् तेसी नंगर दे हुटे; अरह् दुज़े के से बरनबास की गंईलो दिरबे खे हुटे।
सीरिया के अन्ताकिया खे पाछू आऐ,
21तिन्ऐ तेसी नंगर दे खुषख्बरी का प्रचार करा, अरह् तबे तेथै बैजाऐ भहित्ते चैले बंणाँऐं; अरह् तिन्दें पाछ़ी से लुस्त्रा अरह् इकुनियुस बाटी अन्ताकिया खे पाछ़ू आऐ। 22खास-चैले ओकी चैले के मंन पाक्कै कर्दें रंह् थिऐ, अरह् तिनखे से बिश्वाष दे बड़्णों खे हिमम्त्त दियों थिऐ; अरह् से बुलो थिऐ, के आँमों भाँव बैजाऐ दुंख्ह-कल़ेष संह्ऐन कर्णें पड़ले; तबे भे आँमें पंण्मिश्वर के राज्य दे जरूर ज़ाँदे। 23संत्त-पौलुस अरह् संत्त-बरनबास ऐ ऐक नाँम कलीसिया दे तिनखे बुड़े बुजूरग चूणें-छाँटे, अरह् बरत्त आरी प्रार्थना करियों तिनू प्रभू के हाथों दे देंऐ दिते, जिनका तिन्ऐं बिश्वाष करा थिया। 24तबे से पिसिदिया ईलाके बाटी से पंफूलिया ईलाके दे पंह्ईचें; 25अरह् पेरगे नंगर दे खुषख्बरी शुँणाँऐयों से अंत्तालिया नंगर दे आऐ, 26तेथै शे से पाँणी के जहाज दे बड़े नंगर अन्ताकिया खे हुटे, जेथै से तेसी काँम-काज़ खे जुण्जा तिन्ऐं पुरा करा थिया, तेथै से पंण्मिश्वर की कृपा दे दित्ते गुऐ। 27तेथै पंह्ऊँचियों तिन्ऐं कलीसिया के ऐक खुम्ल़ी बंईठाल़ी, अरह् बुलो; के पंण्मिश्वर ऐं तिनके जाँणें का-का करो, अरह् केष्णें तिन्ऐं गऐर-यहूदियों खे बिश्वाष का दुवार खुलो। 28अरह् से बैजाऐ बहित्ते देसो तोड़ी आप्णें चैले की गईलो रूऐ।
Поточний вибір:
खास-चैले के काँम 14: sri
Позначайте
Копіювати
Порівняти
Поділитись
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 2022, Wycliffe Bible Translators, Inc. All rights reserved.
