1 कुरिन्थियों 13
13
पियार सोभी शो जादा आछो असो
1जे हाँव आदमी अरह् स्वर्गदूत्तो की बुली बुलू, परह् पियार ने करू, तअ हाँव ठंणठणाँदों पीतल, अरह् छण-छणाँदी खाँजरी असो। 2अरह् जे हाँव बरंम्बाणीं करी सकू, अरह् बादे भैद् अरह् साँत-भाँते ज्ञाँन जाँणू सम्झू, अरह् मुँह ऐथै तोड़ी पुरा बिश्वाष हों, के हाँव धार-टिम्बड़ी भे हटाऐ देऊँ, अरह् हाँव पियार ने करू, तअ हाँव किऐ ने आथी। 3जे हाँव आप्णी बादी घरोवची कंगाल-गरीबो कैई शी खियाऐं देऊँ, के आप्णी देह्-शरीर जल़ाणों खे देऐ देऊँ, अरह् पियार ने करू, तअ मेरा किऐ फाय्दा ने आथी।
4पियार सबैर असो, अरह् कृपा कर्णो वाल़ा असो; पियार डाह्-जल़्ण ने करदा; पियार आप्णी बड़ियाऐं ने करदा, अरह् शियाँगिन्दा ने आथी, 5से गलत चाल ने चाल्दा, से आप्णी भलाऐ ने चहाँदा, से घिप्दा-काँणिंदा ने, से बुरो ने माँन्दा। 6पियार की खुशी कू-कर्म दी नें, परह् सच्चाई दी असो। 7से बाद्दी बातो सऐन करह्, सोभी बातो का बिश्वाष अरह् सोभी वातो का भोर्षा करह्, अरह् सोभी बातो दा सबैर मारो।
8पियार कद्दी-कद्दी भे टल़्दो ने; भर्मबाँणी हों, तअ से खत्त्म हंदी; भाषा हों, तअ से भे ज़ाँदी रंह्दी; अरह् जे ज्ञाँन हों, तअ से भे मिटी ज़ाँदा। 9किन्देंखे के अमाँरा ज्ञाँन आधा-अ-धुरा असो, अरह् अमाँरी, बरंम्बाणीं भे आधी-अ-धुरी असो;
10परह् जबे सर्वसिद्ध आले, तअ आधो-अ-धुरो सब पुरो-शुरो हंदो। 11जबे हाँव बालक थिया, तअ हाँव बालक जिया बुलाँऊ थिया, मेरा बालक का जिया मंन थिया, मेरी बालक की जेऐ संम्झ थी; परह् जबे हाँव बड़ा हऐ गुआ, तबे मेरी बालक की जेऐ आद्त छुटी गई। 12हेभी अमाँरे सीसे दो झाँमंरो दे:खियों, परह् तेसी बख्ते आँम्णें-सहाँम्णें दे:ख्दे: ऐसी बख्ते मेरा ज्ञाँन आधा-अ; धुरा असो, परह् तेसी बख्ते सुवाँ करियों पछ़याँणुबा, जेष्णाँ मुँह पछ़याँणा गुवा। 13परह् ऐबे बिश्वाष, भूर्षा, अरह् पियार, ऐजे चींन्ने अट्ल़ असो, परह् ईन्दों सोभी शो जादा पियार बोढ़ो असो।
Поточний вибір:
1 कुरिन्थियों 13: sri
Позначайте
Копіювати
Порівняти
Поділитись
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 2022, Wycliffe Bible Translators, Inc. All rights reserved.