यहुन्ना 20

खाली कबर

1हपता का पेले दन दितवार ने मरियम मगदलीनी भाग-फाट्याँईं कबर पे अई अन कबर का मुण्डाऊँ भाटा ने छेटी हरक्यो तको देक्यो। 2तद्याँ वा दोड़न समोन पतरस अन दूजाँ चेला के नके, ज्यो लाड़लो केवातो हो, वटे आन क्यो, “वीं परबू ने कबरऊँ काड़न ले पराग्या हे अन माँ ने जाणा के, वींने कटे राक मेल्यो हे।”

3तद्याँ पतरस अन दूज्यो चेलो कबर का आड़ी चाल पड़्या। 4वाँ दुई लारे-लारे दोड़रिया हा पण, दूज्यो चेलो पतरसऊँ आगे निकळन कबर पे पेल्याँ पूग्यो। 5अन रेटे जुकन कापळा का गाबा पड़्या तका देक्या। पण वो कबर का मयने ने ग्यो। 6तद्याँ समोन पतरस वाँका पाच्छे आग्यो अन कबर का मयने जान कापळा का गाबा पड़्या तका देक्या। 7अन ज्यो हसताड़ो वाँका माता पे बन्दयो तको हो। कापळा की लारे पड़्यो तको ने हो, पण दूजी जगाँ हामटन मेल्यो तको हो। 8तद्याँ दूज्यो चेलो भी ज्यो कबर पे पेल्या पोंछ्यो हो, मयने ग्यो अन ओ देकन विस्वास किदो। 9वीं अबाणू तईं भी सास्तर की आ बात ने हमजता हा के, वींको मरन पाछो जीवतो वणो पको हे। 10तद्याँ वीं चेला पाच्छा आपणाँ-आपणाँ घरे पराग्या।

मरियम मगदलीनी ने ईसू को दरसावो

11पण, मरियम रोती तकी कबर के नके बारणे ऊबी वेगी अन रोती तकी जुकन कबर का मयने नाळरी ही। 12अन जटे ईसू की लास मेली ही, वटे दो हरग-दुताँ ने चमकण्या गाबा पेरया तका एक ने तो हराणे अन दूजाँ ने पगात्याँ बेटा देक्या। 13वाँकाणी वींने क्यो, “ए लुगई, थूँ काँ रोवे हे?”

वणी क्यो, “वीं मारा परबू ने ले पराग्या हे अन मूँ ने जाणूँ हूँ के, वींने कटे मेल्यो हे?”

14ओ केन वा पाच्छी फरी अन ईसू ने ऊबा तका देक्या, पण वाँ वाँने ओळक ने सकी के, वीं ईसू हे।

15ईसू वींने क्यो, “ए लुगई, थूँ काँ रोवे हे? किंने होदरी हे?”

वाँ वींने माळी हमजन क्यो, “ओ बासा, थाँ वींने लेग्या वो तो मने बतावो के, वींने कटे मेल राक्यो हे। ताँके मूँ वींने ले जवूँ।”

16ईसू वींने क्यो, “मरियम।”

वाँ पाच्छी फरी अन वाँकाऊँ इबरानी भासा में क्यो, “रब्बुनी।” ईंको मतलब हे, “हे गरू।”

17ईसू वींने क्यो, “मारे हात मती लगा, काँके मूँ अबाणू बाप का नके ने ग्यो हूँ। पण, मारा भायाँ का नके जान वाँने के दे के, ‘मूँ मारा बाप अन थाँका बाप अन मारा परमेसर अन थाँका परमेसर का नके ऊपरे जारियो हूँ।’ ”

18मरियम मगदलीनी जान चेला ने आ बात बतई के, “में परबू ने देक्या हे।” ज्यो कई परबू वींने क्यो हो, वणी वो वाँने बतायो।

चेला ने ईसू को दरसावो

19हपता को पेला दन दितवार के हाजकाँ वींका चेला यहूदी अदिकारियाँ की दरपऊँ कमाड़ बन्द करन घर में बेटा हा। वीं टेम ईसू आया अन वाँका बचमें ऊबा वेन वाँकाऊँ क्यो, “थाँने सान्ती मले।” 20अन ओ केन वणा आपणाँ हात अन आपणी पाँळी का घाव बताया। तद्याँ चेला परबू ने देकन राजी व्या।

21ईसू पाछो वाँकाऊँ क्यो, “थाँने सान्ती मले। जस्यान बाप मने खन्दायो हे, वस्यानीस मूँ थाँने खन्दावूँ हूँ।” 22ओ केन वाँ वाँपे फूँक लगई अन क्यो, “पुवितर आत्माने गरण करो। 23#मत्ती 16:19; 18:18ज्याँका पाप थाँ माप करो, वाँका पाप माप किदा जाई। ज्याँने थाँ माप ने करो, वीं माप ने करया जाई।”

ईसू अन थोमो

24पण बाराई चेला मेंऊँ एक थोमो, ज्यो जोडलो केवातो हो जदी ईसू वटे आया, तो वाँकी लारे ने हो। 25जदी दूजाँ चेला वाँकाऊँ केबा लागा, “माँ परबू ने देक्याँ हे।”

तद्याँ वणी वींकाऊँ क्यो, “जद्याँ तईं मूँ वाँका हाताँ में खीलाँ का निस्याण में आँगळी ने गोड़ूँ अन वाँकी पाँळी में आपणो हात ने गालूँ तद्याँ तईं मूँ विस्वास ने करूँ।”

26आट दनाँ केड़े वाँका चेला घर मेंईस हा अन थोमो वाँका लारे हो अन कमाड़ जड़्यो तको हो। तद्याँ ईसू आया अन वाँका बचमें ऊबा वेन क्यो, “थाँने सान्ती मले।” 27तद्याँ ईसू ने थोमाऊँ क्यो, “आपणी आँगळी लगान मारा हाताँ ने देक अन आपणो हात पाळा में गाल। विस्वास मती छोड़, पण विस्वासवाळो बण।”

28ओ हुणन थोमा जबाव दिदो, “ओ मारा परबू, ओ मारा परमेसर।”

29ईसू वींने क्यो, “थें मने देक्यो हे, ईं वाते विस्वास किदो हे। पण धन्न हे वीं मनक जणा मने बनाई देक्या विस्वास किदो।”

ईं किताब को मकसद

30ईसू ओरी नरई परच्या चेला का हामे बताया। ज्यो ईं किताब में ने लिक्या ग्या हे। 31पण, ईं वाते लिक्या ग्या हे के, थाँ विस्वास करो के, ईसूइस परमेसर को पूत मसी हे अन विस्वास करन वाँका नामऊँ जीवन पावो।

Поточний вибір:

यहुन्ना 20: एम टी आर

Позначайте

Поділитись

Копіювати