Популярні біблійні вірші з Ioane 19

Поділитись

‘Ua talia le vineka e Iesu, ‘ona fetalai ane lea o ia, “‘Ua taunu‘u;” ‘ua fa‘agaugau lona ao, ‘ona tu‘uina atu lea o lona agaga.

Mulimuli ane ‘ua silafia e Iesu ‘ua uma ‘ona taunu‘u o mea uma, ‘ua ia fetalai ane (‘ina ‘ia taunu‘u ai le Tusi), “‘Ua ‘ou fia inu.”

‘Ua silasila atu Iesu i lona tinā, ma le so‘o ‘ua alofaina e ia, ‘ua tutū mai, ‘ona fetalai atu lea o ia i lona tinā, “Sena e, fa‘auta, o lau tama.” ‘Ua fa‘apea atu fo‘i o ia i lea so‘o, “Fa‘auta, o lou tinā,” Talu fo‘i lea itū aso ‘ua ‘ave o ia e lea so‘o i lona ‘āiga.

A ‘ua o‘o i latou ‘iā Iesu, ‘ua latou iloa ‘ua maliu lava o ia, ‘ona lē gauia ai lea o ona vae; a o le tasi tagata tau ‘ua tutu‘i lona itū i le tao; ‘ona sisina loa mai lea o le toto ma le vai.

Auā ‘ua faia ia mea ‘ia taunu‘u ai le Tusi, “E lē gauia sona ivi.” ‘Ua toe fa‘apea fo‘i le tasi Tusi, “E va‘ai atu i latou ‘iā te ia na latou tuia.”

‘Ona ‘ave lea o Iesu e i latou, ‘ua ta‘ita‘iina atu; ‘ua ‘ave e ia lona satauro, ‘ua maliu atu fo‘i i le mea e ta‘ua, o le mea o i ai le ulupo‘o, ‘ua igoa i le ‘upu Eperu, o Kolokota.

‘Ua ta‘ata‘ai fo‘i e fitafita o la‘au tuitui, ‘ua fai ai le pale, ‘ua fa‘ae‘e i lona ao, ‘ua fa‘a‘ofu fo‘i ‘iā te ia i le ‘ofu pāuli.