ഈ ബൊക്കുന പറ്റി സ്‌ന്ന ഒന്റു സേദി
മന്‌സാനായി നമ്മ് പട്ട്‌ല് പെ്ളേത്ത എന്നാല്‌ക്ക്‌മ് ഇര്‌ക്കുവ സാമി സൊല്ലുസുലാക്ക ആന ഏസ്സ്‌ന പറ്റിത്തെ ഓഗന്നാന് എ്ള്‌ദ്‌ന നല്ല സേദില് സൊല്ലിര്‌ക്കുവാദ്. ഏസ്സ് സാമിമഗാന് ക്‌റ്‌സ്‌ത്ത് എന്റ് നിമ്മ നമ്പ്യാമ് അത്തെ നമ്പി അയാള് പേര്‌ല് നിമാക്ക് ഉജുരു കെ്ഡേക്ക്യാമ് ബേ്ണ്ടിത്തെ ഈ കാര്യഗാള്‌ന എ്ള്‌ദിര്‌ക്കുവാദ് എന്റ് ഈ സേദില് താനെ എ്ള്‌ദിര്‌ക്ക്‌ന്റ് (20:31).
ഏസ്സ്‌ത്തെ എന്നാല്‌ക്ക്‌മ് ഇര്‌ക്കുവ സാമി സൊല്ലുസുലാക്ക എന്റ് സേദി എ്ള്‌ദ്‌ന്റവാന് മുദാല് താനെ സൊല്ലിര്‌ക്ക്‌ന്റാന്. അദ്‌ക്ക് പ്‌റ സൊല്ലി ബ്‌ഡ്‌വെ എന്റ് സാമി ബാക്ക് കൊഡുത്ത കാപാറ്റ്‌ന്റവാന്‌ത്തെ സാമിമഗാന് ഏസ്സ് എന്റ് കാട്ടി തരുവ പല ദിന്‌സ് അദിസ്യഗാള്‌നാത്തെ എ്ള്‌ദിര്‌ക്കുവാദ്. ഈ അദിസ്യഗാള് എന്ത്‌ന കാട്ടി തന്റൊ അദ്‌നാത്തെ പ്‌റ ഈ സേദില് എ്ള്‌ദിര്‌ക്കുവാദ്. ഈ കാര്യഗാള് സൊല്ലിര്‌ക്കുവാദോഡൊപ്പ താനെ ലേസ ആള്‌ഗാള് എത്തെ ഏസ്സ്‌ന നമ്പി അയാള് സൊല്ലുപഡി നഡാക്ക്‌ന്റവാര് ആനാര് എന്റ്‌മ് ബേ്റെ ലേസ ആള്‌ഗാള് എത്തെ അയാളോഡ മുട്ടിനോഡുന്റവാരായി അയാള്‌ന നമ്പുവാദ്‌ന തള്ള്‌നാര് എന്റ്‌മ് എ്ള്‌ദിര്‌ക്ക്‌ന്റ്. 13-17 അദ്ദ്യായഗാള് മാട്ട്‌ക്ക് ഏസ്സ്‌ന പട്ടളഗാറാര് പ്‌ഡിക്കുവ ജാമാത്ത്‌ല് ഏസ്സ് തന്ന് സൊല്ലുപഡി നഡാക്ക്‌ന്റവാരോഡ എത്ത്‌റ എ്ണേവു ബെത്ത്‌റ്‌ന്റാന് എന്നുവാദ്‌ന പറ്റിമ്, കുരുസുക്കു സേത്തി ആണി അഡിക്കുവാദ്‌ക്ക് മുദാല് നാള് അയാള് ഓസണെ എ്ഡ്‌ത്ത് സൊല്ലുവ നായഗാള്‌ന പറ്റിമ് സൊല്ലുപഡി നഡാക്ക്‌ന്റവാര്‌ന അയാള് ദയിരപഡുസുവാദ്‌ന പറ്റിമ് എ്ള്‌ദിര്‌ക്ക്‌ന്റാന്. കഡേഗല അദ്ദ്യായഗാള്‌ല് പട്ടളഗാറാര് ഏസ്സ്‌ന പ്‌ഡിക്കുവാദ്‌നാമ്, അയാള് കുറ്റഗാറാന അല്ലാഗ എന്റ് കേ്ള്‌ക്കുവാദ്‌നാമ്, കുരുസുക്കു സേത്തി ആണി അഡിക്കുവാദ്‌നാമ്, ഉജുര്‌ളാഗുവാദ്‌നാമ്, ഉജുര്‌ളാഗ്‌ന പ്‌റ അയാള് സൊല്ലുപഡി നഡാക്ക്‌ന്റവാര് കണ്ണ്‌ക്ക് കാട്ടുവാദ്‌നാമ് പറ്റി എ്ള്‌ദിര്‌ക്ക്‌ന്റാന്.
ഒരുത്താനോഡ ഉറാങ്കികൊണ്ട് ഇര്‌ക്കാട്ടി പ്‌ഡിത്ത ഒന്റൊരുത്തിന പറ്റി എ്ള്‌ദിര്‌ക്കുവാദ് (8:1–11) മുദാല് എ്ള്‌ദ്‌നാദ്‌ന നോഡി എ്ള്‌ദ്‌ന പാദി കായിദഗാള്‌ല് എ്ള്‌ദാദെ തള്ളിര്‌ന്റാര്. ആന ബേ്റെ ലേസ കായിദഗാള്‌ല് ഇദ്‌ന സേത്തി എ്ള്‌ദിര്‌ന്റാര്.
ബട്ടേമ് സത്ത്യാമ് ഉജുരുമു ആയിര്‌ക്കുവ ഏസ്സ്‌ന നമ്പ്‌ന്റവാര്‌ക്ക് ഏസ്സ്‌നാലെ കെ്ഡേക്കുവ സാഗാത്ത ഉജുരുന പറ്റിത്തെ ഈ സേദി എ്ള്‌ദ്‌ന്റവാന് മുക്ക്യമായി സൊല്ലുവാദ്. നീര്, അഡെ, ബെ്ള്‌സ, മാട്ട്യാന്‌മ് തന്ന് കൊറ്യാഡ്‌മ്, മുന്തിരി കൊഡിമ് പഗാമ് എന്നുവ ഒപ്പ കാണുവ കാര്യഗാള്‌ന ബെത്ത് മ്‌ഗ്‌ന്ത സത്ത്യഗാള്‌ന പഡിസ്യ ബേ്ണ്ടി എ്ണേത്ത് സൊല്ലിര്‌ക്കുവാദ്‌മ് ഈ നല്ല സേദില് കാണ്യ മുഡിമ്.
ഈ ബൊക്കുലു അഡാങ്കിര്‌ക്കുവാദ്
തുഡാക്ക 1:1–18
നീര്‌ക്ക് മുളുഗുസുവ ഓഗന്നാന്‌മ് മുദാല് ഏസ്സ് സൊല്ലുപഡി നഡാന്തവാര്‌മ് 1:19–51
ഏസ്സ് എദ്‌ക്ക ഗേന്ത ഗിലാസഗാള് 2:1—12:50
ഏസ്സ് സാവാദ്‌ക്ക് മുദാല് എര്‌സലേമ് പട്ടണാത്ത്‌ല്‌മ് അദ്‌ക്ക് ബെ്ളിഗേമ് 13:1—19:42
ആണ്ടവാന് ഉജുര്‌ളാഗുവാദ്‌മ് കണ്ണ്‌ക്ക് കാട്ടുവാദ്‌മ് 20:1–31
കഡേഗല ഗലീലാല് ബെത്ത് കണ്ണ്‌ക്ക് കാട്ടുവാദ് 21:1–25

Слухайте ഓഗന്നാന് ഈ ബൊക്കുന പറ്റി സ്‌ന്ന ഒന്റു സേദി