ROMANS 2
2
Isor Laga Dharmik Bichar
1Eitu nimite, oh! bicharok, apuni kon pora dusera ke bichar kori ase, apunikhan nijor bhi bachabole naparibo; kilemane apuni bhi eitu eke kam tu he kori ase; aru dusera ke bichar kora homoi te tumi nijor ke bhi ninda kori ase. 2Eneka kam kora manuh khan upor te Isor laga hosa bichar kora thik ahhi jabo eitu amikhan pora jani ase. 3Oh manuh—apuni, kon pora dusera ke bichar kori ase, kintu apuni nijor pora bhi eitu eke kore—apuni nijor Isor laga khong pora bachabo eneka bhabi ase neki? 4Nahole Isor laga doya dekhai diya tu apunar mon ghurai anibo nimite ase eneka najani kene, tar laga doya dhorjo aru dery kori kene rukhi thaka tu hisap nakore neki? 5Kintu apuni laga tan aru ghurabo itcha nakora mon pora Isor laga khong, ki tar pora hosa bichar kora din te dekhai dibole ase eitu din laga khong nijor upor te jama kori ase.
6Tar pora sob manuh ke nijor kam hisap te dibo: 7Kon pora bhall kam kora te dhorjo kori kene mahima aru sonman aru namora jivon bisare, taikhan logot te tar pora ananta jivon dibo; 8kintu kon manuh nijor nimite te he bhabna kore aru hosa kotha namani kene odharmik phale he mani loi, tarkhan karne khong aru ghusa thakibo. 9Paap kam kora manuh khan sob nimite tarona aru kosto thakibo, prothom te Jews aru eitu pasote Greek khan hobo, 10kintu kon pora bhall kam kori ase taikhan nimite mahima, sonman aru anando thakibo, prothom te Jews khan aru eitu pasote Greek khan thakibo. 11Kilemane Isor pora kon ke bhi bhagsak nakori.
Isor Laga Bichar Aru Kanoon
12Kilemane kanoon najani kene kiman jon pora paap korise taikhan eneka he harai jabo, aru kiman jon kanoon jani kene paap korise taikhan eitu kanoon pora bichar koribo. 13Kilemane kanoon huna pora Isor aage te dharmik nahoi, kintu kanoon chola pora he taikhan dharmikota hobo. 14Kilemane porjati khan ketiya kanoon thaka nai, niyom te taikhan pora kanoon te ki koi ase eitu korise, taikhan kanoon nathakile bhi kanoon tu taikhan nijor he thakise. 15Taikhan laga niyom pora kanoon te ki hukum dekhai ase eitu mon te likhi kene ase eneka dekhai ase. Kilemane nijor bibek pora bhi eitu thik ase eneka sakhi di ase, kilemane taikhan mon pora ketiyaba galti diye aru ketiyaba thik ase eneka koi 16eitu din te moi ki Susamachar koi ase eitu pora Isor he Jisu Khrista darai manuh khan laga lukai thaka sob bichar koribo.
17Kintu jodi apuni nijor pora Jews eneka koi kene kanoon te akha kori ase aru Isor laga manuh eneka mon dangor kori ase 18aru andha manuh khan raasta te loi jua manuh ase eneka apuni hosa pora janile, aru andhera te thaka khan karne puhor ase eneka janile; 19aru apuni hosa bhi andha khan ke chola manuh ase eneka janile, nahole andhera te thaka khan nimite puhor ase eneka janile, 20Kanoon te thaka gyan aru hosa kotha thik pora jani kene ase eneka janile, okora khan ke sikha manuh ase eneka janile, aru bacha khan laga guru ase eneka kole— 21tetiya apuni, kon pora dusera ke sikhai ase, apuni nijor ke bhi nasikhai neki? Choor nakoribi eneka apuni sikhai di kene, nijor pora choor kori ase neki? 22Biyobichar nakoribi eneka apuni koi kene nijor tu biyobichar kori ase neki? Apuni murti tu ghin kori ase kintu mondoli te choor kori ase neki? 23Apuni kon pora kanoon te akha kori ase, kanoon tu bhangai kene Isor ke sorom khilai ase neki? 24Kilemane hastro te eneka likhi kene ase, “Apunikhan nimite porjati majote Isor laga nam tu ninda kori ase.”
25Kilemane jodi apuni kanoon thik pora manile, sonot kora te lab ase, kintu jodi apuni kanoon tu bhangai ase, apuni sonot kora tu nakora nisna he ase. 26Eitu karne jodi manuh ekjon sonot kora nai kintu kanoon te thaka aigya manile, tar sonot nakora tu kora nisna nahobo neki? 27Eitu karne sonot nakora khan kon pora kanoon mani ase, taikhan pora apunikhan kon sonot korise aru kanoon bhi pai kene ase, kintu kanoon bhangai ase, apunikhan ke ninda koribo. 28Kilemane kon he asol Jews khan ase? Sonot kora khan neki? Khali bahar te sabole nimite gau mangso te sonot kora tu Jews nahoi. 29Asol Jews tu kitab te likhi thaka kanoon mani lua tu nahoi, kintu mon bhitor te sonot koribo lage, eitu stuti tu manuh laga nahoi kintu Isor pora pai.
© 2014, The Bible Society of India
All rights reserved.