Makətūbə̄ yā Ojee 6

1Tā anī, sḭḭ̄ ə́daī na:

Ādə̄ jə-tél jə-reēī gogə́ rɔ̄ Kɔ́ɔ̄ɓē tə́.

I ni n adə̄jí do ní, ni a rāā do yājí kadə̄ a edə̄.

2Gō tə́ rāā ndɔ̄ jōó anī, ni a rāā kadə̄

j-a jə-tél jə-ndiī kə kumjí gogə́.

Kə ndɔ̄ kə́ nge ko̰ mətá anī,

ni a tél yā kunjí dɔɔ́ gogə́ ō,

j-a jə-ndiī kə kumjí ta kumən tə́ ō.

3Loo ń noō tə́ ní, ādə̄ j-a̰a̰ī jə-gerī kadə̄ Kɔ́ɔ̄ɓē i Nə́ɓā.

Ādə̄ jə-sāāī loo gerə̄n kə́ rɔ̄kum tə́.

Ni a reē rɔ̄kum tītə̄ ń loo a tīiń rɔ̄kum ní.

Ni a reē kə̄ rɔ̄jí tə́ i tītə̄ man̄ kə́ a edə beé,

i tītə̄ man̄ ta ɓāl̄ kə́ edə adə̄ dɔ nang sɔl̄ lum beé.

4Kɔ́ɔ̄ɓē tūr̄ ədasí na:

*Epəraim, yá̰á̰ ń kə m̄-rāā tām̄ yāí tə́ ní i rí?

Ba ḭ̄ *Juda, yāí ḭ̄ i rí ō?

Tár yāsí kə́ tām̄ yāḿ tə́ to i tītə̄ kil̄ man̄ kə́ dəloí beé,

i tītə̄ man̄ kə́ tə́sō ndɔ̄ɔ́ ba ḭḭ̄ kɔ̄ɔ́ kə̄ ta jī tə́ beé.

5I tām̄ najə̄ ń noō tə́ n m̄-rɔ̄ɔ̄sí

kə ta kūl̄ kəla kə *ngé koō ta gēé ní.

M-ə́la ɓōĺ kemsí tə́ kə ta kūl̄ kədasí na m-ā m̄-tɔ̄l̄sí.

Sarya gāngə̄ḿ teē tītə̄ loo kə́ unjə̄ kow beé.

6A̰á̰ā̰, m̄-gḛy i tár, ba i dā̰ kə́ tɔ̄l̄ ba tun̄ alé.

m̄-sāā i kadə̄ deē a̰a̰ gerə̄m̄ kadə̄ mā i Nə́ɓā,

ba i kadə̄ deē róō dā̰ dɔ *loo tun̄ yá̰á̰ tə́ alé.

Yá̰á̰ kə́ majaĺ ngá̰ý gə̄ kə́ Israel tə́

7Ba sḭḭ̄, kem ɓē kə́ Adam tə́ ní,

ī-ɓōlíī gidə *madə̄ naā yāḿ alé,

sḭḭ̄ ī-raī dɔ ndūsí tə́ seḿ alé.

8Galaad i ɓē yā de kə́ majaĺ gə̄,

gotə mósə́ kə́ ɓōkə́ nang tə́ gə̄ i ngá̰ý kemeé.

9Ɓūtə̄ *ngé tun̄ yá̰a̰ gə̄ kógə̄ḿ

a tɔ̄l̄ i de gə̄ dɔ róbə́ kə́ Sisem tə́,

tītə̄ ngé gān̄g róbə gə̄ kə́ ndin̄

dɔ rɔ̄də́ tə́ yā kənī rɔ̄ɔ̄ beé.

A̰á̰ā̰, nin̄ rāān̄ yá̰á̰ kə́ to rɔ̄sɔl̄ gə̄!

10M-á̰á̰ yá̰á̰ kə́ majaĺ ngá̰ý gə̄ kem ɓē kə́ *Israel tə́:

*Epəraim rāā ájə́ba i loo ń noō tə́.

A̰á̰ā̰, rāān̄ Israel adə̄ tél de kə́ yḛr

i najə̄ yá̰á̰ ń noō tə́.

11Ḭ̄ *Juda, kə́ tām̄ yāí ḭ̄ tə́ ō ní, sḛ́ý laā anī,

i kum mbang sāā kōō.

I dan ń m-ā m̄-rāā kadə̄ gír deē yāḿ gə̄

tél ndin̄ tītə̄ kə́ kété jóó ní.

Seçili Olanlar:

Makətūbə̄ yā Ojee 6: BS

Vurgu

Kopyala

Karşılaştır

Paylaş

Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın

Makətūbə̄ yā Ojee 6