Makətūbə̄ yā Amos 5

Pā yo kógə̄ḿ kə́ tām̄ yā ngán Israel gə̄ tə́

1*Israel gə̄, ōōī kum pā yo ń m-ə̄nī m-ā m̄-nōońsí toō:

2*Israel to tītə̄ ngōmandə

kə́ oy kɔ̄ɔ́ beē.

Ni teē əsō ba ḭḭ dɔɔ́ to̰ alé.

Ni to nang tə́ kem ɓē yān tə́,

ba de kə́ yā kunən dɔɔ́ gətóo!

3Tɔdɔ̄ yá̰á̰ ń Kɔ́ɔ̄ɓē Nə́ɓā əda

dɔ ngán *Israel gə̄ tə́ ní n toó:

Ɓē bo ń əla kə de kə́ dəngam gēé

dūbú ta rɔ̄ɔ̄ tə́ ní,

gotədə́ ń a na̰y yā kadə̄ ni-tél a ənge ní,

i ɓú kógə̄ḿ ngóy ō,

ngōn̄ ɓē ń a əla sedə́ i ɓú kógə̄ḿ ní,

a tél a ənge i kutə kógə̄ḿ ngóy ō.

Ɓār̄ ɓār̄ kə́ no kum mbang kə́ gō gogə́ tə́

4Najə̄ ń Kɔ́ɔ̄ɓē əda

ngán *Israel gə̄ ní n toó:

Ré ī-gḛyiī ndi kə kumsí anī,

i mā n majə kadə̄ ī-sāāmī ní.

5Banī ī-lōōī sāām̄ kem kújə

yā Kɔ́ɔ̄ɓē kə́ Betel tə́ tə́.

Loo kə́ yā ɓōĺ gidə kə́ Gilgal tə́ ní,

ī-lōōī kudə tū tə́.

Ī-lōōī kaw̄ nge kə́ Beer Seba tə́ tə́.

A̰á̰ā̰, a ɔyn̄ de kə́ Gilgal gə̄

yā kaw̄ sedə́ dɔ ɓē kə́ rang tə́ ō,

Betel ń i kújə yā Nə́ɓā ní,

a tél kújə yā nə́ɓā kə́ rɔ̄kum aĺ gə̄ ō.

6Ré ī-gḛyiī ndi kə kumsí anī,

i Kɔ́ɔ̄ɓē n majə kadə̄ ī-sāāin̄ ní.

Ré i beé aĺ anī, ni a reē dɔ kojə

yā *Jəjep tə́ i tītə̄ hor beé.

Ni a o̰o̰ yá̰a̰ malang kə́ Betel ō,

de kə́ kadə̄ asə tɔ̄l̄ hor ní a gətóo ō.

7Ajá! yá̰á̰ kə́ súmūú tél

i yá̰á̰ kə́ atə̄ kárárá ō,

ndɔ́rə̄n̄ yá̰a̰ rāā kə́ gōtə́ nang tə́ ō.

8I ni n rāā ɓūtə̄ tə́yō̰ gə̄ ní:

Adə̄ i ngáń ngé rāā kār̄ gə̄ ō,

dɔgə́ loo tīī ō.

Ni tūr̄ loo kə́ risə til nding

adə̄ tél loo kə́ unjə̄ kow kə́ dəloí ō,

ɓɔ̄ɔ̄ loo kə́ kadaá yā kadə̄ loo kə́ ndɔ̄ɔ́ teēń ō.

Ni ɓāŕ man̄ bā bo

ba ɓōkə́n dɔ nang tə́.

Rīn na i Kɔ́ɔ̄ɓē.

9Ni-adə̄ ta róbə kadə̄ ənīn̄

de kə́ dəngam kə́ ngan̄g rɔ̄ɔ̄ ō,

adə̄ ta róbə kadə̄ nujən̄ ɓē bo

kə́ ngɔ̄mə̄n̄ majə ngá̰ý ō.

10Nge gɔŕyɔ̄ ngé rāā sarya gə̄ ní,

nel̄sí sḭḭ̄ seneé aĺ ngá̰ý ō,

nge kəda najə̄ kə́ rɔ̄kum ní,

nel̄sí seneé aĺ ō.

11Sḭḭ̄ ī-rējī nge ndoō

kə yá̰a̰ rāāsí kə́ gōtə́ aĺ ō,

ī-taāī núsə kōō yān dɔ gúú tə́ ō.

Beé ɓáa, tām̄ najə̄ ń noō tə́ ní,

kújə́ kə́ rāā kə mbal̄ kə́ tɔ́sə̄ kadə gēé ń

ī-rāāī ní, ā ī-ndiī kemeé aĺ ō,

ndɔr̄ *kāgə̄ nduú

kə́ majə gə̄ ń ə́hɔī ní,

ā ā̰yī kasən aĺ ō.

12A̰á̰ā̰, m̄-ger̄ kadə̄

yá̰a̰ rāāsí kə́ majaĺ ngá̰ý gə̄ i ngá̰ý ō,

yá̰a̰ rāāsí kə́ gōtə́ aĺ gə̄ boon̄ ngá̰ý ō,

de gə̄ ń najə̄ gətóo dɔdə́ tə́ ní,

sḭḭ̄ i madə̄ ba̰ā̰də́ gə̄ ō,

yá̰a̰ kəndā nja kə́ gōtə́ aĺ gə̄ ɓáa,

sḭḭ̄ ī-taāī ō,

loo sarya tə́ ɓáa,

ɔ̄gī kadə̄ gāngə̄n̄ sarya

yā ngé ndoō gə̄ kə gōó ō.

13Kum mbang ń toō i kum mbang

yā yá̰á̰ kə́ to kum kaȳ aĺ.

I tām̄ najə̄ ń toō tə́ n

nge kum kedə̄ ndi kə tan kə́ mbóó ní.

14Ī-sāāī ta róbə rāā yá̰á̰ kə́ majə

ba ī-lōōī rāā yá̰á̰ kə́ majaĺ.

Loo ń noō tə́ ā ī-ndiī kə kumsí ō,

Kɔ́ɔ̄ɓē ń i Nə́ɓā

kə́ kɔ́ɔ̄ dɔ rā̰ ō dɔ nang ō ní,

a ndi sesí rɔ̄kum tītə̄ ń ə́daiń ní.

15Yá̰á̰ ń i yá̰á̰ kə́ majaĺ ní,

ādī nel̄sí aĺ ngá̰ý ō,

yá̰á̰ ń i yá̰á̰ kə́ majə ní,

ādī nel̄sí ō.

Loo sarya tə́ ɓáa,

ī-rāāī ādə̄ de gə̄ ɓōlə́n̄ gidə yá̰á̰ kə́ súmūú ō.

Loo ń noō tə́ Kɔ́ɔ̄ɓē ń i Nə́ɓā

kə́ kɔ́ɔ̄ dɔ rā̰ ō dɔ nang ō ní, majanī kumən a o̰o̰n

kə de kə́ kem kojə yā *Jəjep tə́ gə̄ ń teēn̄ ta yo tə́ ní.

16I beé ní, Kɔ́ɔ̄ɓē Nə́ɓā,

Nə́ɓā kə́ kɔ́ɔ̄ dɔ rā̰ ō dɔ nang ō,

əda yá̰á̰ ń toō:

De gə̄ a oōn̄ kōō pā yo gə̄

kə̄ ndágə loo gə̄ malang kə́ kem ɓēé tə́ ō,

a ədan̄ kə̄ kum róbə

kɔsə gə̄ tə́ malang na:

Yá̰á̰ kə́ to kum kaȳ aĺ kə́ ba̰ý!

Yá̰á̰ kə́ to kum kaȳ aĺ kə́ ba̰ý ō!

A ɓārə́n̄ de kə́ kem ɓēé gə̄

kadə̄ aw̄n̄ yo tə́ ō,

a ɓārə́n̄ dəyá̰ kə́ ngé nōō yo gə̄

kadə̄ aw̄ unən̄ pā yo gə̄ ō.

17Dan ń m-ā m̄-mān̄ dáńsí tə́ anī,

pā yo gə̄ a ɓārə̄n̄ kə̄ kem

ndɔr̄ *kāgə̄ nduú gə̄ tə́ malang.

I Kɔ́ɔ̄ɓē n əda najə̄ ń noō ní.

Ndɔ̄ yā Kɔ́ɔ̄ɓē

18Ngé gə̄ ń tə́gān̄ tadə́ sétə́ loo ngóō

ndɔ̄ yā Kɔ́ɔ̄ɓē tə́ ní,

yá̰á̰ kə́ to kum kaȳ aĺ i tām̄ yādə́ tə́!

Ndɔ̄ yā Kɔ́ɔ̄ɓē ngeé ń toō ní,

i rí tām̄ yāsí tə́?

I ndɔ̄ kə́ loo kə́ tū tə́ unjə̄ kow a?

I beé alé: I ndɔ̄ kə́

loo kə́ tū tə́ ndul ndí ndḭ́!

19Ndɔ̄ ní a to i tītə̄ deē kógə̄ḿ

kə́ a̰ȳ ɓɔl ba əsō ta

dā̰ kə́ rang kə́ majaĺ tə́ beē.

Gō tə́ anī, deē ní aw̄ udə kújú ɓēé,

ba əndā jīn kadə bɔr tə́,

anī lī kógə̄ḿ do̰o̰n!

20Ndɔ̄ yā Kɔ́ɔ̄ɓē ní,

i ndɔ̄ kə́ loo kə́ tū tə́ a unjə̄ kow a?

I beé alé, i ndɔ̄ kə́ loo kə́ tū tə́ risə til nding,

i ndɔ̄ kə́ loo kə́ tū tə́ ndul ndí ndḭ́,

i ndɔ̄ kə́ kanjə̄ loo kə́ unjə̄ kow.

Rāā kəla kadə̄ Nə́ɓā kə́ nel̄ deē aĺ ngá̰ý

21Njə̄rā mbā yāsí gə̄ kə́ yā kaw̄ń

loo gə̄ kə́ yā ɓōĺ gidə tə́ nelə̄m̄ aĺ ngá̰ý.

Nin̄ i yá̰á̰ kógə̄ḿ tām̄ yāḿ tə́ alé.

M-ásə́ tə́gā taḿ dɔ

kɔsə dɔ naā tə́ yāsí gə̄ tə́ to̰ alé.

22Dā̰ kə́ tɔ̄l̄ ba róō horoó

kə taá malang gə̄ ō,

kan̄ yá̰á̰ kə́ teē dɔ nang tə́ gə̄ ō

ń ī-ndējə̄mī ní, nelə̄m̄ alé.

Dā̰ kə́ yḛmbə yāsí gə̄ ń ī-tun̄ ādə̄mī ní,

ka̰a̰ kə kumḿ gē a m-á̰ā̰ alé.

23Pā yāsí gə̄ ń ə̄nī ngá̰ý

ta mbīḿ tə́ ní, ādī asəsí!

Pā yāsí gə̄ ń ā ə̄nī

kə kənde yāsí gēé ní,

m̄-gḛy koō to̰ alé.

24Banī ī-rāāī ādə̄ yá̰á̰ kə́ súmūú əɓa bup

tītə̄ man̄ kə́ əɓa nang tə́ beē ō,

ə́ya̰ī yá̰á̰ kə́ gōtə́ ādī nūgə́

tītə̄ man̄ kə́ teē kə̄ ndágá

kem kārə̄n tə́ beē ō!

25*Israel gə̄, ɓāl̄ kutə sɔ́ ń ī-rāāī dəla loo tə́ ní, sḭḭ̄ ī-ndējə̄mī yá̰á̰ kə́ tun̄ gə̄ aĺ ō, ādə̄mī yá̰á̰ kə́ ndējə̄ gə̄ aĺ ō. 26Ba ɓōólaā ɓáa, sḭḭ̄ ə̄tōī nge kə́ ī-tɔ́sī kum gotə Sakut ń i nə́ɓā kə́ mban̄g yāsí ō, sḭḭ̄ ə̄tōī nge kə́ ī-tɔ́sī kum gotə Kewan ń i nə́ɓā kə́ tə́yō̰ yāsí ō ní.

27I beé ní, m-ā m-ɔ́ýsí

ba m-ā m̄-mān̄ sesí

dɔ ɓē kə́ Damas tə́

yā kaw̄ sesí sa̰y.

I Kɔ́ɔ̄ɓē ń əda najə̄ ń noō ní.

Rīn na i Nə́ɓā kə́ kɔ́ɔ̄

dɔ rā̰ ō dɔ nang ō.

Seçili Olanlar:

Makətūbə̄ yā Amos 5: BS

Vurgu

Kopyala

Karşılaştır

Paylaş

Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın

Makətūbə̄ yā Amos 5