Makətūbə̄ kə́ ta kəga dɔ ń Pol ndang adə̄ Tesalonik gə̄ ní 1
1
Pol rāā Tesalonik gə̄ lápə́ya
1I Pol nin̄ kə Silas ō, Silas ō, Timote ō n əlan̄ kə makətūbə̄ ń toō adə̄n̄ Egəlijə kə́ Tesalonik tə́ ń ɓoon̄ naā kə Bɔbə̄jí Nə́ɓāá ō, kə Kɔ́ɔ̄ɓē Jeju *Kərist ō ní.
Ādə̄ Nə́ɓā rāā kem majə sesí ō, sɔl̄ kemsí ō.
Ndi kə kumuú yā Tesalonik gə̄ ō, taā kem yādə́ ō
2Jə-ndadə̄ Nə́ɓā ngándáńg tām̄ yāsí tə́ malang, dan ń jə-gír̄ dɔsí tə́ kem ndɔ̄ȳ yājí tə́ ní. 3Tɔdɔ̄ əga kemjí dɔ kəla taā kem yāsí tə́ ō, dɔ kɔr ń ɔ́riī kə de gēé tə́ sɔɔ̄ń táŕ kə́ kemsí tə́ ní ō, dɔ kəndā kə́ ə̄ndāī kemsí dɔ Kɔ́ɔ̄ɓē yājí Jeju Kərist adə̄ ngan̄g tə́ ní ō, ta kum Bɔbə̄jí Nə́ɓā tə́. 4Sḭḭ̄ ngákó̰ó̰jí gə̄ ń Nə́ɓā táŕsí ní, i ni n gə̄rāsí ní. 5Tɔdɔ̄ kɔjə ń j-ɔjəsí Najə̄ kə́ Majə ní i kə najá ngóy alé, banī i kə tɔ́gə́ kə́ ngá̰ý ō, kə kəla rāā *Ndíĺ kə́ Táĺ ō, kanjə̄ kadə̄ kemjí tɔ́sə̄jí dɔ tə́ bátə́. Ī-gerī ké jḭḭ i de kə́ ba̰ý gə̄ tām̄ yāsí tə́ dan ń jə-ndiń sesí ní. 6Ba sḭḭ̄ ī-téliī ngé ndájə̄jí gə̄ ō, ngé ndájə̄ Kɔ́ɔ̄ɓē gə̄ ō, tām̄ ī-ndigiī najə̄ yā Nə́ɓā dan wur kɔl kə́ ngá̰ý tə́, kə ta kūl̄ rɔ̄nel̄ yā Ndíĺ kə́ Táĺ. 7Adə̄ ī-téliī yá̰á̰ ndájə̄ tām̄ yā ngé taā kem gə̄ malang kə́ Masedəwan tə́ ō, Akayi tə́ ō. 8Tɔdɔ̄ najə̄ yā Kɔ́ɔ̄ɓē ń ḭḭ loosí ní, ugə̄ i Masedəwan ō, Akayi ō, ngóy alé. Tām̄ de gə̄ oōn̄ najə̄ taā kem yāsí i kə̄ loo gə̄ tə́ malang, adə̄ j-a j-ɔr̄ najə̄n kə de gēé to̰ alé. 9Tɔdɔ̄ de gə̄ malang a ənīn̄ i gotə loo kəhɔ ń ə́hɔījí kə̄ rɔ̄sí tə́ dan ń j-aw̄ń loosí ní ō, loo kəya̰ ń ə́ya̰ī ɓesə̄ gə̄ kɔ̄ɔ́, ba ī-tūrī rɔ̄sí kə̄ rɔ̄ Nə́ɓā kə́ rɔ̄kum kə́ ndi kə kumneé tə́ yā rāań kəla yān, 10ba ngóoń Ngōnən ń a ḭḭ dɔ rā̰ tə́ yā reē ní ō. Adə̄ i Ngōnən Jeju ń oy á ni-ndólən ní. Sarya yā Nə́ɓā ń a reē ní, Ngōnən ngeé ń toō un dɔjí tə́ kɔ̄ɔ́.
Vurgu
Kopyala
Karşılaştır
Paylaş
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© 2006, 2010 Alliance Biblique du Tchad