मत्ती 27
27
पिलातुस का समणि यीशु
(मर 15:1; लूका 23:1,2; यूहन्ना 18:28-32)
1अर सुबेर होन्दी यहूदियों का सब मुख्य पुरोहित अर अध्यक्ष लोग मिली के यीशु तैं मरवौण की सला बणौण लगि गैनी। 2तब ऊ वेतैं बान्धि के लि गैनी, अर रोमी गवर्नर पिलातुस का हाथ मा सौंप दिनी।
यहूदा की फांस
(खास चे 1:18-19)
3अर यीशु तैं धोखा से पकड़वौण वळा यहूदा इस्करियोती न जब इन सुणी, कि न्याय करण वळो न वेतैं मौत की सजा सुणैयालि, त उ भौत पछतै, इलै उ मुख्य पुरोहितों अर अध्यक्ष लोगु का पास चांदी का ऊं तीस सिक्कों तैं लेके गै। 4अर वेन ऊंकू बोलि, “मिन एक निरदोष मनखि की मौत खुणि वेका दगड़ा मा बिस्वासघात कैरिके पाप कैरियाली,” पर ऊंन वेकू बोलि, “हमतै ईं बात से कुई भि मतलब नि च, तू खुद ही निस्तारि ले।” 5तब यहूदा न चांदी का सिक्कों तैं मन्दिर मा ढोळि दिनी अर उख बटि चलि गै, अर जैके फांस खै दिनी। 6तब मुख्य पुरोहितों न चांदी का ऊं सिक्कों तैं उठे अर बोलि, “यों सिक्कों तैं मन्दिर की दान-पेटि मा रखण ठिक नि च, किलैकि कै की मौत खुणि येको इस्तेमाल किये गै।” 7इलै ऊं लोगु न मिली के ऊं सिक्कों से माटा का भाँडा तैं बणौण वळा का पुंगड़ा तैं खरीदी, ताकि परदेसी लोगु का मुरण का बाद ऊंतैं उख दफनये जै सैको। 8इलै वे पुंगड़ों तैं आज का दिन तक “ल्वे को पुंगड़ा” बुले जान्दु। 9अर इन त इलै ह्वे, ताकि उ वचन पूरु ह्वे जौ जु कि परमेस्वर का रैबर्या यिर्मयाह न बोलि छौ, अर उ इन च कि, #यिर्म 32:6-9; जकर्या 11:12,13“ऊंन चांदी का तीस सिक्का लिनी, इस्राएली लोगु न वेकी जान की कीमत या ही ठैरै। 10अर ऊंन यू सिक्का माटा का भाँडा बणौण वळा तैं पुंगड़े की कीमत मा दे दिनी, ठिक जन प्रभु न मितैं आज्ञा दे छै।”
रोमी गवर्नर पिलातुस का यीशु से परसन
(मर 14:2-5; लूका 23:3-5; यूहन्ना 18:33-38)
11अर जब यीशु तैं रोमी गवर्नर पिलातुस का समणि लये गै, त वेन वेसे पूछी, “क्या तू यहूदियों को राजा छैई?” यीशु न वेतैं जबाब दिनी, “तुम अफि बोन्ना छाँ।” 12मगर जब मुख्य पुरोहित अर ऊंका अध्यक्ष लोग वे पर इळजाम लगौणा छा, त वेन कुई जबाब नि दिनी। 13तब रोमी गवर्नर न वेकू बोलि, “क्या त्वेतै सुन्यौणु नि च कि यू लोग तेरा खिलाप इथगा माप इळजाम लगौणा छिन?” 14पर यीशु न वेतैं कै भि बात को जबाब नि दिनी, अर यू देखि के रोमी गवर्नर तैं बड़ु ताजुब ह्वे।
यीशु तैं मौत की सजा दिये जाण
(मर 15:6-15; लूका 23:13-25; यूहन्ना 18:39—19:16)
15अर फसह का त्योवार पर हर साल इन रिवाज छौ, कि जै कैदी तैं लोग गवर्नर बटि मंगदा छा, वु ऊं लोगु खुणि वे कैदी तैं छोड़ि देन्दु छौ। 16अर ऊं दिनों मा बरअब्बा नौ को एक भौत बदनाम मनखि ऊंका इख कैदी छौ। 17अर जब भीड़ इकट्ठा ह्वे गै, त पिलातुस न ऊं बटि पूछी, “तुम क्या चन्द्यां, कि मि तुम खुणि कैतैं छोड़ द्यूं, बरअब्बा तैं या यीशु तैं जैकू मसीह बुले जान्दु?” 18किलैकि पिलातुस जणदु छौ कि यों लोगु न यीशु तैं जलन रखण की वजै से पकड़वै।
19अर जब पिलातुस न्याय आसन पर बैठयूं छौ, त वेकी घरवळी न वेका पास इन रैबार भेजि कि, “तुम वे धरमी मनखि का मामला मा हाथ नि डलयां, किलैकि ब्याळि राति मिन वेका बारा मा सुपन्या देखि, अर वेकी वजै से आज मि भौत दुख झेली।”
20अर मुख्य पुरोहितों न अर यहूदी अध्यक्ष लोगु न भीड़ का लोगु तैं उकसै, कि ऊ बरअब्बा तैं आजाद करण की, अर यीशु तैं जान से मरण की मांग कैरा। 21तब रोमी गवर्नर पिलातुस न लोगु बटि पूछी, “तुम क्या चन्द्यां, कि यों दुईयों मा बटि मि तुम खुणि कैतैं आजाद कैरुं?” अर ऊंन बोलि, “बरअब्बा तैं छोड़ि द्या।” 22अर वेन ऊंकू बोलि, “त फिर मि यीशु का दगड़ा क्या कैरुं, जैकू मसीह बुले जान्दु?” तब ऊं सभ्यों न बोलि, “वेतैं क्रूस पर चड़ै द्या, वेतैं क्रूस पर चड़ै द्या।” 23वेन ऊंकू बोलि, “किलै, वेन क्या अपराध कैरी?” पर लोग और भि चिल्लै-चिल्लै के बोन्न लगि गैनी, “वेतैं क्रूस पर चड़ै द्या, वेतैं क्रूस पर चड़ै द्या।” 24जब पिलातुस न देखि कि कुई फैदा नि होणु, बल्किन मा हल्ला और भि जादा होणु च, त वेन पाणि ले अर भीड़ का समणि अपणा हाथ ध्वेके बोलि, “ये निरदोष मनखि का ल्वे मा मेरु कुई हाथ नि च येका बारा मा तुम ही जाणा।” 25तब लोगु न वेकू बोलि, “येका ल्वे को हिसाब-किताब हमरा अर हमरि औलादों बटि लिये जौ।” 26तब पिलातुस न ऊंकी मांग का मुताबिक बरअब्बा तैं छोड़ दिनी, अर यीशु तैं कोड़ा लगवैनि अर क्रूस पर चड़ौणु खुणि ऊंका हाथों मा सौंप दिनी।
सिपयों द्वारा यीशु को अपमान
(मर 15:16-20; यूहन्ना 19:2,3)
27अर येका बाद रोमी गवर्नर पिलातुस का सिपै यीशु तैं राजमहल मा लि गैनी, अर उख सिपयों की पूरि पलटण वेका चौतरफि इकट्ठा ह्वे गै। 28अर उख ऊंन वेका कपड़ा उतारि के वेतैं बैंगनि रंग को चोळा पैरै, 29अर कांडों को एक मुकुट बूणी के वेका मुण्ड़ मा पेनै, अर वेका दैंणा हाथ मा निगुंलो को एक जांठु दिनी। अर वेका अगनै घुंडा टेकी के वेको मजाक उड़ै के बोलि, “हे यहूदियों का राजा तेरी जै हो।” 30अर ऊंन वे पर थूकि, अर निगुंला का वे जांठा तैं लेके वेका मुण्ड़ पर मरण लगि गैनी। 31अर जब ऊंन यीशु को खूब मजाक बणै दिनी, तब ऊंन वे चोळा तैं उतारि के फिर से वेका कपड़ा वेतैं पेनै दिनी। अर वेतैं क्रूस पर चड़ौणु कू लि गैनी।
यीशु तैं क्रूस पर चड़ये जाण
(मर 15:21-32; लूका 23:26-43; यूहन्ना 19:17-27)
32जब रोमी सिपै यीशु तैं लि जाणा छा। तब सिपयों न कुरेन नगर का रौण वळा शमौन तैं पकड़ी, अर वेतैं मजबूर कैरी कि उ यीशु की क्रूस तैं उठे के लि जौ। 33अर जब ऊ गुलगुता नौ की एक जगा पर पौंछिनी, अर ईं जगा कू खोपड़ि की जगा भि बुल्दिन। 34तब ऊंन यीशु तैं तीत मिल्यूं अंगूरों को रस पीणु खुणि दे, मगर वेन उ चखी के पीण नि चै। 35तब ऊंन वेतैं क्रूस पर चड़ै दिनी, अर #भजन 22:18पांसा डालि के वेका कपड़ा आपस मा बांट दिनी। 36अर उख बैठि के वेकी पैरेदारी करण लगि गैनी। 37अर वे पर लग्यां इळजाम तैं एक पाटि मा लिख्वे के क्रूस पर लगवै दिनी, अर वीं पाटि मा इन लिख्यूं छौ कि, “यू यहूदियों को राजा यीशु च।” 38अर यीशु का दगड़ा-दगड़ि दुई और #यशा 53:12डाकुओं तैं भि क्रूस पर चड़ये गै, एक तैं वेकी दैंणी तरफा अर दुसरा तैं वेकी बैं तरफा।
39अर जु लोग उख बटि औणा-जाणा छा वु वेकी बेजती कना छा, अर अपणु मुण्ड़ हिलै-हिलै के इन बोन्ना छा कि, 40#भजन 22:7; 109:25“हे मन्दिर का नास करण वळा, अर तीन दिन मा वेतैं बणौण वळा, अरे अब खुद तैं बचौ, अर अगर जु तू परमेस्वर को पुत्र छैई, त क्रूस बटि मूड़ी उतर।” 41अर ठिक इन्नि मुख्य पुरोहित, शास्त्री अर यहूदी अध्यक्ष लोग भि मजाक उड़ै के बोन्ना छा कि, 42#भजन 22:8“अरे येन दुसरो तैं बचै पर अब खुद तैं नि बचै सकणु रे, अर यू च ‘इस्राएल को राजा,’ अर अगर यू क्रूस बटि उतरि जौ त हम भि ये पर बिस्वास करुला। 43अरे, अगर यू परमेस्वर पर भरोसा रखदु, अर अगर जु पिता परमेस्वर भि चान्दु त अब उ येतैं बचौ, किलैकि यू त बुल्दु छौ कि ‘मि परमेस्वर को पुत्र छौं।’” 44अर ठिक इन्नि जु डाकु वेका दगड़ा क्रूस पर चड़ये गै छा, ऊंन भि वेको मजाक उड़ै।
यीशु की मौत
(मर 15:33-41; लूका 23:44-49; यूहन्ना 19:28-30)
45अर दुफरे की बारह बजी बटि लेके तीन बजी तक पूरा देस मा अन्धेरु होयुं रै। 46अर तीन बजी का करीब यीशु न ऊँची आवाज मा चिल्लै के बोलि, “एली, एली, लमा शबक्तनी?” ज्यां को मतलब इन च कि, #भजन 22:1“हे मेरा परमेस्वर, हे मेरा परमेस्वर, तुमुन मितैं किलै छोड़याली?” 47अर जु लोग उख खड़ा छा, ऊंन ईं बात तैं सुणी के बोलि कि, “यू त एलिय्याह तैं बुलाणु च।” 48तब तुरन्त सिपयों मा बटि एक भागी के गै अर वेन एक स्पंच तैं #भजन 69:21सिरका मा भिजे, अर निगुंला का जांठा पर रखी के वेका गिच्चा पर लगै। 49तब दुसरा लोगु न बोलि, “रुकी जा, दिखद्यां कि एलिय्याह येतैं बचौणु खुणि औन्दु च, कि ना।” 50अर यीशु एक बार फिर ऊँची आवाज मा चिल्लै, अर वेन अपणा पराण छोड़ि दिनी। 51अर वे ही बगत #निर्ग 26:31-33मन्दिर को परदा मथि बटि मूड़ी तक दुई हिस्सों मा फटी गै, अर एक बड़ु भ्वींचळु औण से धरती हिली गै, अर पौड़-पखाडो पर तिड़कवाल पोड़ि गै, 52अर इख तक की कबर खुलि गैनी, अर भौत सा परमेस्वर का पवित्र लोग जु मोरि गै छा, ऊ अपणा-अपणा सरील मा ज्यून्दा ह्वे गैनी। 53अर यीशु का मौत मा बटि ज्यून्द होण का बाद, यू लोग भि कबर बटि भैर निकळि गैनी, अर पवित्र नगर यरूशलेम मा जैके भौत सा लोगु तैं दिखैनि। 54अर जु रोमी सुबेदार अर दुसरा सिपै यीशु की पैरेदारी कना छा, ये भ्वींचळा का औण से अर जु कुछ भि ह्वे वां से ऊ भौत डौऽरी गैनी। तब ऊंन बोलि, “सच्चि मा यू परमेस्वर को पुत्र छौ।”
55अर भौत सि जनानियां गलील बटि इख अईं छै, जु की यीशु की सेवा करदी छै, अर वेका पिछनै-पिछनै चलदि छै, अर यों सब बातों तैं यू दूर से दिखणी छै। 56अर ऊं जनानियों मा बटि एक मगदला गौं की मरियम, याकूब अर यूसुफ की माँ मरियम, अर जबदी की घरवळी भि छै।
यीशु तैं कबरुन्द रखै जाण
(मर 15:42-47; लूका 23:50-56; यूहन्ना 19:38-42)
57यूसुफ नौ को एक मनखि छौ, जु कि अरिमतिया नगर मा रौन्दु छौ। अर यू एक सेठ मनखि छौ, अर यू यीशु पर बिस्वास करदु छौ। अर जब रुमुक ह्वे, त यू रोमी गवर्नर पिलातुस का पास गै। 58अर जब उ पिलातुस का पास पौंछी, त वेन यीशु की लांश तैं गुलगुता नौ की जगा बटि लि जाण की मांग कैरी, तब पिलातुस न वेतैं लि जाण की आज्ञा दे दिनी। 59तब यूसुफ न यीशु की लांश तैं लेई, अर वेकी लांश तैं मखमल का एक साफ चदरा मा लपेटि दिनी। 60अर वेन यीशु की लांश तैं कबर मा रखी दिनी, अर ईं कबर का मुख पर वेन एक बड़ु डांग लगै दिनी। अर या एक नई कबर छै ज्वा कि वेन पाड़ पर खुदवै के अफ खुणि बणवईं छै। 61अर मगदला गौं की मरियम अर दुसरि मरियम कबर का समणि उखि बैठि छै।
यीशु की कबर पर सिपयों को पैरा
62अर दुसरा दिन, जु कि सब्त को दिन छौ, मुख्य पुरोहित अर फरीसी दल का लोग, रोमी गवर्नर पिलातुस का पास इकट्ठा ह्वेनि। 63अर ऊंन बोलि, “श्रीमान, हमतै याद च, कि ये झूठ्ठा मनखि न जब उ ज्यून्दु छौ, त वेन बोलि छौ, ‘मि तीन दिन बाद ज्यून्दु ह्वे जौलु।’ 64इलै तुम तीन दिन तक वेकी कबर पर पैरा देणु खुणि आज्ञा दे द्या, कखि इन नि हो कि वेका चेला ऐके वेकी लांश तैं चुरै के लि जा, अर लोगु मा जैके बोला कि, ‘यीशु मुरदो मा बटि ज्यून्दु ह्वे गै।’ श्रीमान, अगर जु इन ह्वे जालु, त या झूठ्ठी बात पैले की झूठ्ठी बातों से और भि जादा फैली जालि, अर हालत जादा खराब ह्वे जाला।” 65तब पिलातुस न ऊंकू बोलि, “तुमरा पास त पैरेदार छैई छिन ऊंतैं ही लि जा, अर कबर की रखवळी करणु खुणि जन ठिक लगणु तुम उन्नि कैरा।” 66तब वु उख बटि गैनी, अर कबर पर मोर लगै के पैरादारों तैं पैरा देणु खुणि उख बैठे दिनी।
Seçili Olanlar:
मत्ती 27: GBM
Vurgu
Kopyala
Karşılaştır
Paylaş
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© (Active) Wycliffe Bible Translators, Inc. All rights reserved.
