1 कुरिन्थियां 8
8
चढ़ावे चे खाणे
1हमा मूर्तिया नु चढ़ाली आली चीजा चे बारे मां जाणु कि, “अम्हा सब नु ज्ञान छै।” ज्ञान अम्हानु घमण्डी बणावे पर प्रेम लारे बढोतरी हुवे। 2अगर कुई ईं समझे कि, “मैं कोच्छ जाणे,” तां वास्तव मां ओ हमा तक उसड़े जाण ही ना सग़ला जिसड़े जाणने ओचे वास्ते जरुरी छै। 3पर अगर कुई नरीकारा लारे प्रेम राखे, तां ओनु नरीकार पिछाणती गिहे।
4तां मूर्तिया चे सामणे बलि करली हुलीया चीजा नु खाणे चे बारे मां अम्ही जाणु कि सारे संसारा मां किठी वी मूर्तिया नरीकार कोनी ते हेक चे अलावा नेरा कुई नरीकार कोनी छै। 5जबकि आसमान ते धरती चे उपर ब़ोहत सारे ईश्वर ते प्रभु किहवावी। 6पर अम्चे गोढु तां हेक ही नरीकार छै यानि ब़ा जेह्णे सब कोच्छ रचले ते अम्ही ओचे वास्ते छिऊं। ते हेक ही प्रभु छै, यानि ईशु मसीह जाये जरिये सारीया चीजा हुलीया ते ओचे जरिये अम्ही जिऊं।
7पर सब नु हा ज्ञान कोनी। पर कई लौक हमा तक मूर्ति नु ईश्वर समझती कर बलि ची चीज नु खई, तां वे सोची अम्ही अशुद्ध हुती गेले कांकि वांचा विवेक कमजोर छै। 8खाणे अम्हानु नरीकारा चे गोढु ना पुचावी। अगर अम्ही ना खऊं तां अम्चे कुई नुकसान कोनी, ते अगर खऊं तां कोच्छ फायदा कोनी।
9पर चौकस रिहा। इसड़े ना हो कि तम्ची हा आजादी किठी कमजोरा वास्ते ठोकर ची वजह ना बणती जाओ। 10अगर काया विवेक कमजोर छै ते ऊं तम्चे जिसड़े ज्ञानी इन्सान नु मूर्तिया चे मन्दरा मां चढ़ावा खाते ङेखती गिहो तां का ओनु वी मूर्ति नु चढ़ाली चीजा खाणे ची हिम्मत नी मिली? 11ऐचे मां तम्चे ज्ञानी हुवणे ओचे नाश ची वजह हुती गेली, जाये वास्ते मसीह ईशु ने आपणी जान ङिली। 12तां तम्ही भावां चे विरोध पाप करने लारे वांचे कमजोर विवेक नु सट्ट मारा यूं करने लारे तम्ही मसीह चे विरोध पाप करा। 13ऐवास्ते अगर खाणे काये वास्ते ठोकर ची वजह बणे, तां मैं मीट चे खाणे कङी वी नी खई, कि मैं आपणे भावां ची ठोकर ची वजह बणे।
Seçili Olanlar:
1 कुरिन्थियां 8: ODR
Vurgu
Kopyala
Karşılaştır
Paylaş
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
CC BY-NC-ND 4.0