1 कुरिन्थियां 14
14
नेरीया भाषा ते भविष्यवाणी
1ऐवास्ते प्रेम चा सुभाव राखते हुले, आत्मिक वरदाना ची धोन्न मां रिहा, खास करती भविष्यवाणी चे वरदाना ची। 2जको नेरीया भाषा मां बाता करे ऊं इन्साना लारे ना पर नरीकारा लारे बाता करे। ओचीया बाता कुई ना समझी, कांकि ओ भेद चा बाता पवित्र आत्मा मां हुती कर ब़ोले। 3पर वे जको भविष्यवाणी करे, लौका ची आत्मिक बढोतरी शाबासी ते सब्रा नु उग़ते बधावे। 4वे जको नेरीया भाषा मां बाता करे, वे आपणी बढोतरी करी। पर जको भविष्यवाणीया करी, ओ कलीसिया ची बढोतरी करी। 5मैं चाहवे कि तम्ही सारे नेरीया भाषा मां बाता करा, पर ज्यादा ईं चाहवे कि भविष्यवाणीया करा कांकि अगर नेरीया भाषा ब़ोलणे आले चा कुई अनुवाद ना करो, तां भविष्यवाणी चा फायदा कलीसिया ची बढोतरी वास्ते ओकनु बढ़ती कर छै।
6ऐवास्ते, हे माये भऊ, अगर मैं तम्चे गोढु आती कर नेरी भाषा मां बाता करे, ते प्रकाश, जा ज्ञान, जा भविष्यवाणी, जा उपदेश चीया बाता तम्हानु ना किहे तां माये कनु तम्हानु का फायदा हुवी? 7यूं करती अगर बेजान चीजा वी जाये कनु अवाज निकले जिंवे बन्सरी, जा बीन। अगर वांचे सुर्रा मां भेद ना हो तां जको फूकली ते बजाली जाये, वे किवें पिछाणलीया जाये? 8ते अगर तुरही ची अवाज साफ ना हो तां कूण योद्ध वास्ते तियारी करी?
9यूंही तम्ही वी अगर जुबानी लारे साफ बाता नी किहा, तां जको कोच्छ केहले जाये ऊं किवें समझले जई? तम्ही तां हवाई लारे बाता करने आले बणती जावा। 10संसारा मां कितने ही तरह ची भाषा कां ना हो, पर वांचे महु कुई वी बिना मतलब चे नी हुवी। 11ऐवास्ते अगर मैं कुई भाषा चा मतलब ना समझी, तां ब़ोलणे आले ची नजरी मां प्रदेसी बणती जई ते ब़ोलणे आला माई नजरी मां प्रदेसी बणती जई। 12ऐवास्ते तम्ही वी जब आत्मिक वरदाना ची धोन्न मां छिवा, तां इसड़ा यतन करा कि तम्चे वरदाना ची बढोतरी लारे कलीसिया ची आत्मिक बढोतरी हो।
13ऐवास्ते जको नेरीया भाषा मां बाता करी तां वे प्राथना करो, कि वे भाषा चा मतलब वी बावड़ सग़ो। 14ऐवास्ते अगर मैं नेरीया भाषा मां प्राथना करे तां माई आत्मा प्राथना करे, पर माई समझ काम ना ङी। 15तां सही का छै? ईं कि, मैं आपणी आत्मा लारे वी प्राथना करी, ते समझ लारे वी प्राथना करी, मैं आपणी आत्मा लारे गांवी, ते समझ लारे वी गांवी। 16ना तां अगर तु आत्मा ही लारे धन्यवाद करे, तां बल्ति अणजाण बन्दे दुधे धन्यवाद चे अन्त मां इसड़े ही हो कां किही, कांकि ओ तां ना जाणी, कि तु का किही पला? 17तु तां आच्छी तरह धन्यवाद करी, पर ङुजा ची बढोतरी ना हुवी।
18मैं आपणे नरीकारा चा धन्यवाद करे, कि मैं तम्हा सबकनु ज्यादा नेरीया भाषा मां बाता करे। 19पर कलीसिया मां नेरीया भाषा मां ङस हजार बाता केहणे कनु ईं मैं होर वी आच्छे समझे, कि नेरा नु सिखावणे वास्ते समझी लारे पाँच बाता किहे।
20हे माये भऊ, तम्ही समझदारी मां ब़ाले ना बणा। बल्ति वी बुराई मां तां ब़ाले रिहा, पर समझदारी मां सियाणे बणा। 21पवित्रशास्त्र मां लिखले आले छै कि,
“मैं नेरीया भाषा ब़ोलणे आला चे जरिये, ते पराये लौका चे मुँहा कनु,
यां लौका लारे बाता करी, तां वी वे माई नी सुणे।”
प्रभु इसड़े ही किहे।
22ऐवास्ते नेरीया भाषा विश्वासीया वास्ते चैन्ह कोनी, पर अविश्वासीया वास्ते चैन्ह छी, ते भविष्यवाणी अविश्वासीया वास्ते चैन्ह कोनी पर विश्वासीया वास्ते चैन्ह छी। 23तां अगर कलीसिया हेक जग़हा भेली हो, ते सब चे सब नेरीया भाषा ब़ोलो, ते ब़ाहरले जा अविश्वासी लौक भीतर आती जाओ तां का वे तम्हानु पाग़ल नी समझे? 24पर अगर सारे भविष्यवाणी करु लाग़ो, ते कुई अविश्वासी जा ब़ाहरले लौक भीतर आती जाओ, तां वा सुणती कर ओनु आपणे पापी हुवणे चे बारे मां एहसास हुती जई, ओ आपणे विवेक नु टटोली। 25ते ओचीया करतूत सामणे आती जई, ते तब ओ मुंधा हुती कर नरीकारा नु ङण्डवत करी, ते मनती गिही, कि सच्चमां नरीकार तम्चे आधे मां बसे पला।
कलीसिया वास्ते आज्ञा
26ऐवास्ते हे माये भऊ, का करने चाही छै? जिसे बेले तम्ही भेले हुवा, हर-हेक चे दिला मां भज़न, जा उपदेश, जा नेरीया भाषा, जा दर्शन, जा नेरीया भाषा चा मतलब बावड़ना रिहे सब कोच्छ आत्मिक बढोतरी वास्ते हुवणे चाही छै। 27अगर नेरी भाषा मां बाता करनीया हो, तां ङोन जणे जा ज्यादा हो तां तीन जणे बारी-बारी लारे ब़ोलो, ते हेक जणा मतलब बावड़ो। 28पर अगर अनुवाद करने आला ना हो तां नेरी भाषा ब़ोलणे आला कलीसिया मां शान्त रिहो, ते आपणे मना लारे ते नरीकारा लारे बाता करो।
29भविष्यवक्ता महु ङोन जा तीन ब़ोलो, ते बाकि लौक वांचे वचना नु परखो। 30अगर ओही बेले काये हेके उपर नरीकारा चे तरफु दर्शन हुती जाओ तां ओ, जको ओ बेले भविष्यवाणी करे पला, शान्त हुती जाओ ते ऐनू मौका ङियो। 31कांकि तम्ही सारे हेक-हेक करती भविष्यवाणी कर सग़ा कि सारे सिखो, ते सारे शान्ति गे सग़ो। 32ते भविष्यवक्ता ची आत्मा खौद्द चे वशा मां रिहे। 33कांकि नरीकार गड़बड़ी चा नरीकार कोनी, पर शान्ति चा दाता छै। जिंवे नरीकारा चे लौका ची सारी कलीसिया मां छै।
34असतरीया कलीसिया ची सभा मां चोप रिहो, कांकि वानु बाता करने ची इजाजत कोनी, पर अधीन रेहणे चाही छै जिंवे व्यवस्था मां लिखले वी पले। 35ते अगर कोच्छ सिखणे चाहवी, तां घरे आपणे आपणे मुणसा कनु पूछो, कांकि असतरी नु कलीसिया मां बाता करनीया शर्मलायक बात छै।
36का नरीकारा चा वचन तम्चे महु निकड़ला? जा सेर्फ तम्चे तक ही पुज़ला? 37अगर कुई इन्सान आपणे आप नु भविष्यवक्ता जा आत्मिक जन समझो, तां ईं जाणती गिहो, कि जको बाता मैं तम्हानु लिखे पला, वे प्रभु चीया आज्ञा छी। 38अगर कुई इन्सान ये सच्चाई नु ना मनी, तां ओनु तम्ही वी ना मना।
39ऐवास्ते हे माये भऊ, भविष्यवाणी करने ची धोन्न मां रिहा ते नेरीया भाषा ब़ोलणे वास्ते मना ना करा। 40पर सारीया बाता सभ्यता ते क्रमानुसार करलीया जाओ।
Seçili Olanlar:
1 कुरिन्थियां 14: ODR
Vurgu
Kopyala
Karşılaştır
Paylaş
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
CC BY-NC-ND 4.0