1 कुरिन्थियां 10
10
इस्राएल चे इतिहास कनु चितावनी
1हे माये भऊ, मैं ना चाहवी कि तम्ही ये बाते कनु अणजाण रिहा, कि अम्चे पुरखे बदला ची छईं मां सफर करते रेहले, ते सब चे सब समुन्दरा चे आधे महु पार हुती गेले। 2ते सब ने बदला तले ते समुन्दरा मां हुती कर मूसे चे चैले हुवणे चा बपतिस्मा गेहला। 3ते सब ने हेक ही आत्मिक खाणे खाले, 4ते सारा ने हेक ही आत्मिक जल पीला, कांकि सारे वे आत्मिक चट्टानी महु पीते, जको वांचे लारे-लारे चलती रेहते, ते वा चट्टान मसीह हुता। 5पर नरीकार वांचे महु घणा कनु खौश कोनी हुता, ऐवास्ते ब्याबाना मां ही मरती गेले।
6ये सारीया बाता अम्चे वास्ते चितावनी छी अम्ही बुरीया चीजा ची इच्छा ना करु जिंवे अम्चे बुजर्गा ने करले हुते। 7ना ही तम्ही मूर्ति पुज़णे आले बणा जिंवे कि वांचे महु कितने बणती गेले हुते, जिंवे पवित्रशास्त्र मां लिखले आले छै, “वे ब़ेहले तां खाणे-पीणे वास्ते ते उठले तां मस्तीती गेले।” 8ते ना अम्ही व्यभिचार करु, जिंवे वांचे महु कईयां ने करला ते हेके ङिहां मां तरेवी हजार मरती गेले। 9ते ना अम्ही मसीह नु परखु जिंवे वांचे महु कईयां ने करले, ते नाग़ा चे खाणे लारे वे मरती गेले। 10ते ना तम्ही शिकायत करते रिहा जिंवे वांचे महु कईयां ने करली ते नाश करने आले दूता चे जरिये मारले गेले।
11वांचे उपर बितलीया आलीया ये घटना नमुना हुता जको अम्चे वास्ते चितावनी चे रूपा मां लिखलीया गेलीया कांकि अम्ही ओ युगा मां छिऊं, जको अन्त चे गोढु छै। 12ऐवास्ते ऊं जको ईं समझे कि, “मैं विश्वास मां मजबूत छै,” चौकस रिहो कि किठी विश्वास कनु भटकती ना जाओ। 13तम्ही कुई इसड़ी परीक्षा मां कोनी पड़ले, जको इन्साना चे सेहणे कनु ब़ाहर छै। ते नरीकार भरोसेमन्द छै ओ तम्हानु कुई इसड़ी परीक्षा मां नी पड़ु ङी, जको तम्चे सेहणे कनु पार हो। पर ओ परीक्षा चे लारे उपा वी करी कि तम्ही मजबूत रेह सग़ा।
14ऐवास्ते, हे माये प्यारे, तम्ही मूर्तिपूजा कनु बचले रिहा। 15मैं तम्हानु ब़ुध्दिमान जाणती कर तम्हानु किहे पला, जको मैं किहे पला ओनु तम्ही परखा। 16#मत्ती 26:26–28; मरकु 14:22–24; लूक 22:19,20ओ धन्यवाद चा मुंगर, जानु अम्ही धन्यवाद करु का ओ मसीह चे लुहींया मां अम्ची भईवाली कोनी? वा रोटी, जको अम्ही आपस मां भान्ती कर बांटु का मसीह चे शरीरा मां अम्ची भईवाली कोनी? 17ऐवास्ते, कि हेक ही रोटी छै तां अम्ही वी जको घणे छिऊं, हेक शरीर छिऊं, कांकि अम्ही सारे वे हेक रोटी मां भईवाल छिऊं।
18वां इस्राएलीया चे बारे मां सोचा जको वेदी उपर चढ़ाली आली बलि खई। का ऐचे जरिये वेदी चे भईवाल ना हुती जई? 19का छै माये केहणे चा मतलब? का मूर्ति नु चढ़ाली आली चीजे कुई महत्व छै जा वे मूर्ति चा कुई महत्व छै? 20बेलकोल ना, माये मनणे तां ईं छै, कि जको चीजा नेरीया जातिया बलिदान करी वे नरीकारा नु ना, पर दुष्टात्मा वास्ते बलिदान करी ते मैं ना चाहवी, कि तम्ही दुष्टात्मा चे लारे भईवाल हुवा। 21तम्ही प्रभु चे मुंगरा महु ते दुष्टात्मा चे मुंगरा ङुंहु महु ना पी सग़ा। तम्ही प्रभु ची मेज ते दुष्टात्मा ची मेज ङुंहु चे खाणे मां भईवाल ना हो सग़ा। 22का अम्ही प्रभु नु क्रोध ङिवाणे ची जुर्रत कर सग़ु? का अम्ही प्रभु कनु ज्यादा ताकतवार छिऊं?
मसीह आजादी
23 #
1 कुरि 6:12
मैं सब करने वास्ते आजाद छै पर सब कोच्छ भलाई वास्ते ना हुवी। मैं कोच्छ वी करने वास्ते आजाद छै पर सारीया चीजा लारे बढोतरी ना हुवी। 24तम्चे महु हर हेक आपणे भले चे ही ना पर ङुजा चे भले चा वी ध्यान राखो।
25जको कोच्छ कसाईयां चे इठे बिके ऊं खाओ ते विवेक ची वजह कनु कहीं ना पूछा। 26कांकि पवित्रशास्त्र मां लिखले आले छै कि, “धरती ते धरती चे उपर जको कोच्छ वी छै सब कोच्छ प्रभु चे ही छै।”
27अगर अविश्वासीया महु कुई तम्हानु छेड़ा ङियो, उठे तम्ही जाणे चाहवा, तां जको कोच्छ तम्चे सामणे मेहले जाओ ऊंही खावा ते विवेक ची वजह कनु कहीं ना पूछा। 28पर अगर कुई तम्हानु किहे, “हा तां मूर्ति नु चढ़ाली आली चीज छै,” तां विनु ना खाजा, जेह्णे तम्हानु ईं बावड़ले ओचे विवेक ची भलाई वास्ते। 29माया मतलब दुधे विवेक लारे कोनी, पर ओ ङुजे इन्साना चा विवेक लारे छै। माई आजादी भला कां ङुजे चे विवेक लारे परखली जाओ? 30अगर मैं नरीकारा चा धन्यवाद करती खाणे मां भईवाल हुवे तां जिसी चीजी उपर मैं धन्यवाद करे ओची वजह कनु माई बदनामी कां हो?
31ऐवास्ते तम्ही जको चाहवा खावा चाहे पीया चाहे जको कोच्छ करा, सब कोच्छ नरीकारा ची महिमा वास्ते करा। 32तम्ही ना यहूदिया वास्ते, ना नेरीया जातिया ते ना नरीकारा ची कलीसिया वास्ते ठोकर ची वजह बणा। 33ठीक जिंवे मैं वी सब बाता मां सब नु खौश राखे ते मैं आपणे भले ची ना। पर ङुजा चे भले चा ध्यान राखे कि वे उद्धार गे सग़ो।
Seçili Olanlar:
1 कुरिन्थियां 10: ODR
Vurgu
Kopyala
Karşılaştır
Paylaş
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
CC BY-NC-ND 4.0