मर्कूस 9
9
1येशूकी थोरूमोङ “ङा ख्योकोनला दि बादोङ साला ज्य्वाक्यो। च्यि सासीन ख्योकोन नाङ कोई कोईचेन परमेश्वरगी छ्येज्यीक शक्तिकी राज्य खिताला स्यूबाते थोङलाकामा स्यिइओ,” सिन सिदुक।
येशूला छ्येताङ झिलिमिली गाला थोङाते
(मत्ती १७:१-१३; लूका ९:२८-३६)
2दि बात सानामेई ङीमा ठुक तिरी पत्रुस थेमे याकूबताङ यूहन्नाला टीकीन येशू थोम्बोज्यीक बोमदु गाल्सुङ। थेरू ज्येन मि सुङ मेतान। थेमे थेरू तेइन तेइनलाराङ थेबा सुमबोकी येशू झिलिमिली गालाते थोङसुङ। 3थेकी खोन्दाते खोलाकोङ मिगी ताराङ मुथुप्च्या आउदी कार्मु गाल्सुङ। थोक कार्मु डोच्या खालानी खापाङ सुङगीङ खोलाकराङ ठुता मुथुबो। 4थेमे परमेश्वर बात खित्कान्ते मोशाताङ एलिया थेरू वाकीन येशूताङ बात खिन ओतातेङ थेबेकी थोङसुङ। 5थोक थोङजीन पत्रुसकी “ओहो गुरू, ङुरूङला दुरूराङ देता लेमु दुका। ङ्योकोन गुरू खोल्ला, मोशाला थेमे एलियाला देते लाईदु पली रेरे ज्वामीन,” सिन सिदुक। 6पत्रुसला थे खोरोङगी फिजे बात च्योक खाबाप सिन छ्या मेतान। थेत्ताङ ज्येन चेला ङिबोचेन ज्यीबेकी थरावरी गाला ओतान। 7पत्रुसकी बात खिन खिनलाराङ मुक्पा वाकीन थेबा गाङेला उप्सुङ। थेमे थे मुक्पे नाङदुकीराङ “दि ङे फुज्युङ ईन। ङा दिला आउदी ङिङज्ये खिओ। दिकी साबाते बात ङेन,” सिन सिरा थेबेकी थोसुङ। 8थेमे थेबा सुमबोकी फार छुर गाङेपा ताजीन येशूकामा थेरूराङ ओता थोङसुङ।
9थेमे थेबा बोमनेकी थुल्ला फाप्सुङ। थेनेकी ओङजीन येशूकी थेबा सुमबोला “ख्योकोनगी आनाङ थोङाते अचम्बते बात परमेश्वर ओत्सादुई वाबाते मि ङा स्यिसादुकी सोम्बो मालोकथुपचेन सुङलाङ मालाःबा,” सिन कोत्सुङ। 10साबा च्योकराङ खाईन थेबेकीङ थे बात सुङलाङ मालाःप्सुङ। ईन्सीनोङ खोपरोङ सुमबो नाङचेन दि स्यिसादुकी सोम्बो लोक्च्येते साबाते च्यि ईन्ताका, चुक ओङगीताका सिन बात खासुङ। 11थेमे थेबेकी थेला “गुरू, परमेश्वरगी तोङगो साबाते ख्रीष्ट ओङा भन्दा गोमा याङराङ एलिया ओङा फाप्क्यो सिन धर्मे गुरूओनगी च्यिला बात खिका याङ?” सिन ठिसुङ। 12थोक सिरजीन थेकी “ईन ईन, एलिया याङराङ दुरू ओङा फाप्च्येतेराङ ईन। थेमे दुरू वाला थेकी मिओनला परमेश्वर छ्य्वापा लै खि साला ख्रीष्ट ओङे लाईदु जेसुकै ठीक खिओ। थेमे परमेश्वर ओत्सादुई वाबाते मि ङाला चुक चुक ओङगीते सिन परमेश्वर बातला च्यि सिन टिबा ओते सासीन ङे आउदी खाला दुक्पा भोगे खिता फाप्क्यो थेमे मिओनगी ङाला विरोध खाला मेलेबा खिओ सिन साबा ओत। 13एलिया याङराङ ओङा फाप्क्यो सिरच्येते बातला ङा ख्योकोनला च्यि सिते सासीन एलियानी वाकीन सिन्दा ओत। थेमे मिओनगी थेला खोपरोङला सिरा सेम लाबाताङ खिता सेम लाबा लाबा खासुङ। थेला दोक खाला मेलेबा खिओ सिन परमेश्वर बातला गोमाकाराङ टिबा ओतान,” सिन सिदुक।
येशूकी फिजाला खोबाते ल्हन्डीक तेन्गीन ताङाते
(मत्ती १७:१४-२१; लूका ९:३७-४३)
14येशूताङ थे चेला सुमबो ज्येन चेलातेबा ओत्सामा लेप्जीन थेरू थेबे फेरो खाङ आउदी काल्बेई मि जम्मा ओङा ओताते थोङसुङ। थेबे नाङ कोई कोई धर्मे गुरूङ ओतान। थेबाचेन येशू चेलाओनताङ टेकाटेउरी खिन ओतान। 15येशू थेरू लेपाईताङ मि गाङेराङ उ येशू वादुक सिन गा खासुङ। थेमे छ्य्वाकीन गाल्गीन मान खिन थेला नमस्ते खासुङ। 16थेमे येशूकी चेलातेबाला “ख्योकोनगी धर्मे गुरूओनताङ च्यि टेकाटेउरी खाबे?” सिन ठिसुङ। 17थे बेलालाराङ थेबे नाङ मिज्यीगी दोन्दु वाकीन थेला “गुरू, ठाक्पा खाला नाङ सिराप सिन ङे फुज्युङला खो ओत्सादु खुलाबाप। ल्हन्डीक खोबेकी दि लाटा गाल्ला दुक। 18थे ल्हन्डीककी बेला बेलाला दिला साला थाप देप्कीदुक। थोक खानामेई दि फिजेकी खानामा बावा देन्गीदुक, सा च्योइदुक थेमे कक्रक कुक्रुक गाल्ला स्येन्दे ग्रेगे डुइदुक। ङे थे ल्हन्डीक तेन्ला नाङ सिन खुई चेलाओनला साबाप। तर थेबेकी थोक खिता माथुप्सुङ,” सिन सिदुक।
19थोक सिरजीन येशूकी थेला “ख्योकोन था समय मिओन परमेश्वरला विश्वास खितराङ मिक्किकान्ते ईन। परमेश्वरताङ छ्येज्यीक शक्ति ओत सिरच्येते बात था ख्योकोनगी नामचेन खोच्ये? थेमे था थोईसाक ङा दोक्ते काम खिन ख्योकोनताङ देत्च्ये? थे फिजाला दुरू खोरच्योक,” सिन सिदुक। 20थेमे थेबेकी थे फिजाला येशू दोन्दु क्याल्सुङ। थे ल्हन्डीककी येशूला थोङाईताङ थे फिजाला जा लाङसुङ। थेमे थे फिजा साला ज्याङे रिल्गीन छ्या ठेकीन क्युराते च्योक बेटेक बेटेक खासुङ। थेकी खानामा बावाङ तेन्सुङ। 21थेमे येशूकी आबातेला “दोक खाबाते नामनामेई ईन्दे?” सिरजीन थेकी “टेक्टेमेईराङ ईन। 22काल्बा च्योक्ते थेला मेताङ छ्युला लुक्ला सेता छोल्गीदुक। गुरू खुई ठाक्पा खिता थुप्सीन खुई दयेकी ठाक्पा खाला नाङ,” सिन सिदुक। 23थोक सिरजीन थेकी “खो च्यिला ठाक्पा खिता थुप्सीन सिते? परमेश्वरगी जेङ खिता थुप्क्यो सिन थेला विश्वास खासीन थेकी जस्तो कामोङ खिओ,” सिन सिदुक। 24थेकी थोक सानामेई थे मिकी “गुरू, ङा परमेश्वरला विश्वास मिक्किच्येते मेन। ईन्सीनोङ परमेश्वरगी जस्तो कामोङ खिता थुप्क्यो सिरच्येते बात ङाला ईन्दा मेन्दा सिराच्योक लाङगीदुक। खुई ङाला छ्याःङ शंका मिक्किता खाला परमेश्वरला विश्वास खित्कान्ते मि जो,” सिन सिदुक।
25थेमे मि गाङेराङ छ्य्वाकीन वाकीन थेरूराङ ह्रुप रूपा थोङगीन येशूकी थे ल्हन्डीकला “खुई दि फिजे नामज्योक ओन च्युत्कीन दिला लाटा जोला दुक। खो दि फिजादुकी थेन्ला ग्युक। थेमे याङराङ नोमुङ दि फिजाला मादो,” सिन कोत्सुङ। 26थेकी थोक सानामेई थे ल्हन्डीक कस्स्ये खाईन छेरा खासुङ। थेमे थे फिजाला आउदी मेलेबा खाईन जा लाङगीन कक्रक कुक्रुक जोकीन थेन्गीन गाल्सुङ। थेमे थे फिजा स्याप च्योकराङ गाल्सुङ। थोक थोङगीन गाङेकी “ला, थे स्यिदुक,” सिदुक। 27तर येशूकी थेला लाक्पाला जुम्गीन लाङसुङ। थेमे थे फिजा लासुङ।
28थेरूई येशू खोपरोङ देत्च्येते खाम्बादु स्यूसुङ। थेमे नाङने खोपरोङकामा ओते बेलाला चेलातेबेकी थेला “गुरू, ङ्योकोनगीचेन च्यिला थे ल्हन्डीक तेन्गीन तोङा माथुप्ताका?” सिन ठिसुङ। 29थेमे थेकी थेबाला “दोक खोक्पो खाला दुक्पा तेरकान्ते ल्हन्डीकचेन परमेश्वरताङ प्रार्थना खालाकामा तेन्ला तोङा थुप्क्यो,” सिन सिदुक।
येशूकी लोईन थे खोरोङ स्यिच्येते बात खाबाते
(मत्ती १७:२२-२३; लूका ९:४३-४५)
30थेमे येशूताङ थे चेलाओन थेरूकी ख्याम्सुङ। थेबा गालील अञ्चल नाङपा खाला डुइन ओतान। ज्येनगी थेबा खोपरोङ खापा दुका सिन छ्या मेस्येस्यीत सिन थे थोक खाईन ख्याम्बा ओतान। 31च्यिला सासीन थेकी चेलातेबाला थोरूमोङ बात लोपा फाप्च्या ओतान। दोक खाला डुइन डुइन थेकी चेलातेबाला “था परमेश्वर ओत्सादुई वाबाते मि ङाला मिज्यीगी धोका बिन्ला ज्येन मि लाःक्तु सोम्पे खिओ। थेमे थेबेकी ङाला सेत्क्यो। तर ङीमा सुम तिरी ङा सोम्बो लोइओ,” सिन सिदुक। 32थेकी थोक सिरजीन च्यि साबाते ईन्ताका सिन चेलातेबेकी छ्याःङ माखोसुङ। थेमे थेबेकीङ ज्यीबेकी खित्सादु गुरू खुई दि च्यि साबाते ईन्दे सिन थेला माठिसुङ।
येशूकी सु छ्येते ईन्दे सिन साबाते
(मत्ती १८:१-५; लूका ९:४६-५०)
33थेमे येशूताङ थे चेलाओन कफर्नहुमपा लेप्कीन सधैँ देत्च्येते खाम्बादु स्यूसुङ। खाम्बादु लेप्नामेई थेकी चेलातेबाला “ख्योकोनगी आनाङ लामला थोक खाईन च्यि बात खाबे?” सिन ठिसुङ। 34ठिजीन थेबाबरी खाराक्पा खाराक्पा देत्सुङ। च्यिला सासीन लामला ओङजीन खोपरोङ नाङ सु छ्येते ईन्दे सिरच्येते बातला थेबेते थोम्मु स्योरा ओतान। 35थेबा गाङे खाराक्पा देता थोङनामेई येशू साला देत्सुङ। थेमे थेबा मेन्दा च्युन्ङी गाङेला दोन्दु स्योक सिन काताङगीन “ख्योकोन नाङ छ्ये ओङा छोल्कान्तेकी चुक खिता फाप्कीते सासीन थे खोरोङराङ ज्येनगी कोताते ङेन्कान्ते च्योक ओङा फाप्क्यो। थेमे सुइँदे खाम्बादु काम खित्कान्ते मि च्योक ओङला काम खिता फाप्क्यो,” सिन सिदुक। 36थेमे थेकी फिजाज्यीकला थेबे दोन्दु क्याल्सुङ। थेमे थे फिजाला फाङबा ताप्कीन 37“लो दि फिजाला तो। खोपरोङ ङे मि ईन्देकी होदोक्ते फिजाज्यीकला लेमु खित्कान्ते मिकी ङालाराङ मान खाबाते ईन। ङाला मान खित्कान्तेकीचेन ङालाकामा मेन, ङाला दुरू तोङकान्तेलाङ मान खाबाते ईन,” सिन सिदुक।
38थेमे यूहन्नेकी थेला “गुरू, मिज्यीगी खुई मिन लाला मिओनला खोबाते ल्हन्डीक तेन्ला तोङगीन ओता ङ्योकोनगी थोङसुङ। थे ङुरूङताङ ख्याम्कान्ते मि मेन्देकी ङ्योकोनगी थेला येशू मिन लाला खुई थोक खिता मेङेदो सिन ङाराप,” सिन सिदुक। 39थोक सिरजीन थेकी थेला “थोक्ते मिला ख्योकोनगी थोक माकेत सिन मासेर। च्यिला सासीन ङे मिन लाला अचम्बते काम खित्कान्ते मिकी होत्ता ङे विरोध खितराङ मिक्किओ। 40ङुरूङला मेलेबा मिक्किकान्ते मिचेन ङुरूङताङ डिक्कान्तेराङ ईन। 41थेमे ङा ख्योकोनला दि बादोङ सिओ। च्यि सासीन सुइँदेकी ख्योकोनला दि ख्रीष्टला विश्वास खित्कान्ते मि दुका सिन छ्यु मुठी खाङकामा थुङा बिन्सीनोङ थोक खित्कान्ते मिला परमेश्वरगी इनाम तेरग्यो।
पाप खिता लेमु मेन
(मत्ती १८:६-९; लूका १७:१-२)
42थेमे ङाला विश्वास खित्कान्ते उदि फिजा च्योक्तेबे नाङ दोक्पोईलाकामा सुइँदेकी मेलेबाते काम खित च्युत्कीन ङे छ्य्वापेई टाल्सुङ सासीन थोक खित्कान्ते मिकी आउदी ज्यीबा लाङच्या मेलेबा काम खाबाते ईन। सुइँदाला ङे छ्य्वापेई डेला भन्दा गोमाराङ थोक खित्कान्ते मिलानी सुइँदेकी ज्यीङबामा आउदी जोदाई लाकोर दो काल्गीन नुप्ला स्यिरस्यीत सिन समुन्द्रे नाङमा युकीन क्युरा ईन्सीन लेमु ओङच्या ओतान।
43थेमे ख्योकोनगी खेराङ लाक्पेकी खित्सादु मेलेबाते काम खासुङ सासीन थे लाक्पा तुप्ला क्युर। थोक माक्यासुङ सासीन ख्योकोननी नरककुण्डमा मे नाङमा स्यूइओ। नरककुण्डमा सधैँ बारगीन देत्च्येते मे नाङ स्यूक्पा भन्दानी ठुटे डुँरे गाल्ला नोमुङ मिसिन्च्येते जुनी ङेत्ला स्वर्गने देता काल्बेई लेमु ईन। 44थेमा स्यूक्कान्ते मिला साकान्ते बु नोमुङ मिस्यिओ, थेमा बारगीन ओताते मेङ नोमुङ मिस्यिओ। 45थेमे ख्योकोनगी खेराङ काम्बेकी खित्सादु मेलेबाते काम खासुङ सासीन थे काम्बाराङ तुप्ला क्युर। थे काम्बेकी खित्सादु नरककुण्डमा स्यूक्पा भन्दानी बरू ख्योकोन ठुटे डुँरे गाल्ला नोमुङ मिसिन्च्येते जुनी ङेत्ला स्वर्गने देता काल्बेई लेमु ईन। 46थेमा स्यूक्कान्ते मिला साकान्ते बु नोमुङ मिस्यिओ, थेमा बारगीन ओताते मेङ नोमुङ मिस्यिओ। 47थोकराङ खाला मिगी तासादु खेराङगी पाप खासुङ सासीन थे मिकराङ थेन्ला क्युर। थे मिकज्यीगी खित्सादु नरककुण्डमा स्यूक्पा भन्दानी बरू ख्योकोन काने गाल्ला परमेश्वर राज्यने स्यूला देता काल्बेई लेमु ईन। 48थेमा स्यूक्कान्ते मिला साकान्ते बु नोमुङ मिस्यिओ, थेमा बाराते मेङ नोमुङ मिस्यिओ।
49ख्योकोन पूरो खाला पापदुकी ठाल्स्यीत सिन ख्योकोनला आउदी दुक्पा ओङगो। थोक ओङजीन ख्योकोनला मेकी छिक्पा छेतराङ दुक्पा ओङगो। परमेश्वरला मन परे खित्च्या ज्वाप्ला थेला चढे खित्च्येते अन्नला छा लुबा फापा च्योकराङ ख्योकोनलाङ थोक्ते दुक्पा ओङा फाप्क्यो। 50थेमे छा छाप्टो ओत्सीन लेमुराङ ईन। छेते छाप्टो तोरसुङ सासीन थे छेते च्यि काम? याङराङ च्यिकी थे छा छाप्टो जोच्ये? ख्योकोनचेन छाप्टो तोराते छा च्योक ओङा मेङगो। ख्योकोन खेराङ नाङ डिक्ला थुन्ला देत,” सिन सिदुक।
Seçili Olanlar:
मर्कूस 9: JUL
Vurgu
Kopyala
Karşılaştır
Paylaş
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© 1992 Wycliffe Bible Translators Inc. All rights reserved.
