मत्ती 19
19
थाक्पा च्येच्ये मेहयोहङगे माएँगी तेहन्दाला लोप्च्युङ
(मर्क १०:१-१२)
1येशूगी दि केच्याया़ सुङ छार फान्ज्यो येशू गालीलले फेप्ती यहूदीया लुहङबागी यर्दन चाङबुकी फार्केन देपकी ग्या़ला फेप नाङसीन। 2मिह मिह-माहङ येशूला ताहदा क्याहप्ती ओहङसीन ओहले येशूगी खुङया़ला टा़ह-च्यू़ नाङसीन।
3ओहले लाहला फरिसीया़ येशूसाला ओहङदी येशूला खोक्पा कोर्ते टी़हसीन, “सुज्यीगी च्यिॱआङ तेहन्दागी पेहती राहङ पी़हमी ङ्याम्बु खा फ़ेज्ये ओहङगे नि मेहयोहङगे?” 4येशूगी खुङया़ला सुङ नाङसीन, “च्यि ख्याया़गी सुङरापला टा़हदी म़ेहबा? तोहङस्यो किन्ज्योगी मिहला क्येप-ख्योवा दाङ पी़हमी-पेहजा ज़ो नाङसीन।#उत १:२७; ५:२ 5‘ओ़ह सोङबे क्येप-ख्योवागी राहङगी आबा-आमाला क्युर ज़्या़दी राहङगी पी़हमी ङ्याम्बुराङ तेहकें ओहले खुङ ङ्यी़दी ज़ुबु च्यी़राङ ओहङगे।’#उत २:२४ 6ता़ह खुङ ङ्यी़, ङ्यी़ मिहम्बा, यिहॱनाङ ज़ुबु च्यी़राङ ओहङगे। ओ़ह सोङबे किन्ज्योगी का़हन्दीला ङ्याम्बुराङ जोम च्य़ूदी येहबा, ओ़हदीला सु मिहगीॱआङ खा माहफ़ेज्यु।”
7फरिसीया़गी येशूला टी़हसीन, “ओ़ह ल़ेहमु यिहन्सीमानानी मोशागी च्यिबे थाक्पा च्येकेमु यिहगी प्री़हदी च्यी़राङ पी़हमीला क्युर्च्यु म़ेदी माक्यो ले?”#व्य २४:१-४; मत्ती ५:३१ 8येशूगी सुङ नाङसीन, “ख्याया़गी सेम सान्दी येहकें सोङगोराङ मोशागी पी़हमी क्युर ख़ूएँ म़ेदी माक्यो यिहम्बा। यिहॱनाङ तोहङलेनी ओ़ह ल़ेहमु म़ेहबा येहकें। 9त़ेदोङ, ङाह ख्याया़ला माएँ, छ्येउ-छ्येंमुगी तेहन्दाले मिहम्बा लेहमेन तेहन्दागी पी़हमीला क्युर्ते राहङसा पी़हमीला पा़हमा पेहकें क्येप-ख्योवागी छ्येउ-छ्येंमुॱराङ पेहकें। ओहले का़हन्दीगी ओ़ह क्युरक्यो पी़हमीला पा़हमा पेहकें ओ़हदीगीॱआङ छ्येउ-छ्येंमु पेहकें।”#मत्ती ५:३२; १ कोर ७:१०,११
10येशूकी स्याहप्च्यीया़गी मासीन, “ख्योवा-पी़हमीगी ता़हनाङ-ताहम्जी ओ़ह ल़ेहमुराङ ओहङज्ये येहसीमानानी पा़हमा मेहबेगेनॱराङ या़हबु।” 11येशूगी सुङ नाङसीन, “ङाहगी माज्ये छोल्ग्योगी दि ताम खुङया़गी च्यी़राङ ल़ेहन ख़ूएँ, का़हन्दीला किन्ज्योगी नाङगेन। 12पा़हमा मेहबेकें केच्याया़ लेहमेन लेहमेनॱराङ ओहङगे च्यिबेमाना काहजे मिहया़नी क्येएँ यिहन्ज्युराङ ङुहरुम ओहङगे, लाहलाला लेहमेन मिहया़गी ङुहरुम जे तेरक्यो ओहङगे ओहले लाहलादी किन्ज्योगी क्याहल्सीगी तेहन्दाला पा़हमा मेहबेकेनया़ॱआङ ओहङगे। ता़ह ची़ ख़ूएँया़गीदी दि ताम ची़ज्यु।”
पेहजा फेमाया़ला मेलाम
(मर्क १०:१३-१६; लूक १८:१५-१७)
13ओ़ह ती़हजीला येशूगी राहङगी छ्या़ ज़्या़दी सोल्वाङ ताप नाङज्यु म़ेदी मिहया़गी राहङगी पेहजाया़ला येशूसाला ख्योङसीन। दि थोङदी स्याहप्च्यीया़गी ओ़ह मिहया़ला बार्ता लाङसीन। 14यिहॱनाङ येशूगी सुङ नाङसीन, “पेहजाया़ला ङाहसाला ओहङ च्य़ूदोङ, खुङया़ला मा़हका! च्यिबेमाना स्यिहङगामगी क्याहल्सीनी दि ल़ेहमुया़गी तेहन्दालाराङ यिहम्बा।”
15ओहले येशूगी पेहजाया़गी थो़ला छ्या़ ज़्या़दी मेलाम नाङदी ओहलेगी फेप नाङसीन।
मिह छ्युक्पु
(मर्क १०:१७-३१; लूक १८:१८-३०)
16लेहमा च्यी़ मिह च्यी़गी येशूसाला ओहङदी टी़हसीन, “लोबेन लाह, नाहमॱआङ मिहस्यीएँगी मिहली ज़ाङबु ज्योर्च्येला ङाहगी च्यि या़हबु ल़ेह पेह कोहकें?”
17येशूगी खोला सुङ नाङसीन, “ल़ेह या़हबुगी तेहन्दाला ख्ये ङाहला च्यिबे टी़हगे? या़हस्योनी च्यी़राङ ज़्य़ू नाङदी येहबा। ख्येला नाहमॱआङ मिहस्यीएँगी मिहली ज़ाङबु ज्योर्च्ये सेम्बा येहसीमाना किन्ज्योगी काया़ला ची़नाङ डुप्तोङ।”
18ओहले खोगी, “का़हन्दी काया़ सुङ नाङग्यो यिहम्बा लाह?” म़ेदी स्युहसीन। येशूगी सुङ नाङसीन, “मिह माहसे, छ्येउ-छ्येंमु माहबे, कुमेन माहक्याहप, स्योप क्याहप्ती पाङबु माहतेर।”#प्रस २०:१३; व्य ५:१७; प्रस २०:१४; व्य ५:१८; प्रस २०:१५; व्य ५:१९; प्रस २०:१६; व्य ५:२०
19 “आबा-आमाला ची़नाङ पेहतोङ ओहले राहङगी ख्यिम्जीला राहङला ल़ेहमुराङ चेवा पेहतोङ।” #
प्रस २०:१२; व्य ५:१६; लेवी १९:१८
20ओहले ओ़ह स्यारा मिहगी मासीन, “दि थाम्ज्यी काया़नी ङाहगी ची़देॱराङ ओहङदी येह। लेहमेन च्यि पेह कोहकें ले?” म़ेदी स्युहसीन।
21येशूगी खोला सुङ नाङसीन, “ख्ये थाम्ज्यीराङ से़हया़ला टाहङबु डोज्ये सेम येहसीमाना, काहल्दी ख्ये ङ्याम्बु का़ह येहकेन्दी थाम्ज्यीराङ क्युहया़ चोङदी ओहङग्योगी टाङगाया़ प्राङबुया़ला तेर, ओहले ख्येगी स्यिहङगामला क्युह ज्योर्च्ये येह, ओहले ओहङदी ङाहला ताहदा क्याहप्ती स्यो।”
22दि ल़ेहमु स्याहल थ़े फान्ज्यो ओ़ह स्यारा मिह तोहङबा ना-स्यी़दी काहल्सीन च्यिबेमाना खो ङ्याम्बु क्युह-नोहर माहङबुराङ येहकें।
23ओ़ह तिङले येशूगी राहङगी स्याहप्च्यीया़ला सुङ नाङसीन, “तेहम्बाराङ ङाह ख्याया़ला माएँ, मिह छ्युक्पुला स्यिहङगामकी क्याहल्सी नाहङला स्य़ूहज्येला ज्यिबुराङ का़हबु येह। 24येहपाराङ ङाह ख्याया़ला माएँ, मिह छ्युक्पुला स्यिहङगामकी क्याहल्सीला स्य़ूहगे म़ेदीनी ङाबुङला खापकी मी़-ओङले स्य़ूहज्येला गा तेहमु ओहङडो।” 25स्याहप्च्यीया़गी ह्अ ल़ेहदी स्युहसीन, “ओ़ह ल़ेहमु यिहन्सीमानानी सुगी थार्पा ज्योर ख़ूएँ ले?” 26येशूगी खुङया़ला ज़ी़दी सुङ नाङसीन, “दि मिहया़ लाहमले ओहङॱराङ मी़हखुएँगी केच्या यिहम्बा, यिहॱनाङ किन्ज्यो लाहमले थाम्ज्यीराङ डुप ख़ूएँ।”
27ओ़ह तिङले पत्रुसगी स्युहसीन, “ज़ी़-नाङदोङ, ङ्यिहनी थाम्ज्यीराङ से़हया़ क्युर ज़्या़दी राहङला ताहदा क्याहप्ती ओहङसीन। ङ्यिहगी च्यि ज्योर्के ले?” 28येशूगी खुङया़ला सुङ नाङसीन, “तेहम्बाराङ ङाह ख्याया़ला माएँ, मिहगी स़ेबु ओ़ह साम्बा क्याहल्सीला ज़िज्यिदगी ज़्य़ू-ठिला ज़्य़ू नाङज्ये येह। ओ़ह ती़हजीला ङाहला ताहदा क्याहप्के ख्याया़ॱआङ राहङगी ज़्य़ू-ठि च्यिङ्यी़ला तेहच्ये येह ओहले इस्राएलकी छाङ च्यिङ्यी़ थो़ला ठिम ताङज्ये येह।#मत्ती २५:३१; लूक २२:३० 29ङाहगी तेहन्दाला राहङ खाङबागी आदा-नो़ह, आज्यी-नुहमु, आबा-आमा, पुह-पोहमो दाङ खाङसा-स्यिहङसा क्युर्केन्दीगी दि म़ेदी लेहमा क्याह च्यी़ ल्हाक्पु ज्योर्च्ये येह ओहले नाहमॱआङ मिहस्यीएँगी मिहली ज़ाङबु ज्योर्च्ये येह। 30यिहॱनाङ ताहन्दा तोहङला येहकेनया़ तिङला लिहच्ये येह ओहले ताहन्दा तिङला येहकेनया़दी तोहङले ओहङज्ये येह।”#मत्ती २०:१६; लूक १३:३०
Seçili Olanlar:
मत्ती 19: HYLM
Vurgu
Paylaş
Karşılaştır
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© 2023 (Active), Wycliffe Bible Translators, Inc. All rights reserved.
