मरकुस 9
9
1तेऊ त्याहबे बोलू, हाऊं तमा का सच बोला कि जोह लोका अखे खड़े साहा दे, त्याह में कोई-कोई एड़े साहा दे जेबरे तक त्या परमेश्वरा रे राज्य सामर्था संघे इंहदअ नांई हेरे, तेवरे तक मरने रा स्वाद कधी नांई परेखाणा।
यीशु रा रुपान्तर्ण
(मत्ती 17.1-13; लूका 9.28-36)
2छहा धिहाड़ी बाद यीशुये पतरस होर याकूब, यूहन्ना आपु संघे एकी एकान्ता उछटे पहाड़ा में नी तखे त्याहरे सामने तेऊरा रूप बदलू, 3होर तेऊरे झिकड़े एडे चमकदे लागे होर एडा प्रियाषा होऊ, कि धरती पैंदे कोहे झिकड़े धोऊण आले तेडे झिकड़े नांई धोऊदे। 4होर त्याहे मूसा संघे एलिय्याह हेरु; यीशु संघे गला करदे त्या हेरी 5ऐता पैंदे पतरसे यीशु वै बोलू, हे गुरु, महारा अखे रहणा ठीक साहा, तेबा हामा चिण तांबू बणउणे एक ताहवै, एक मूसा वै, होर एक एलिय्याह वै। 6किबेकी सह नांई जान्दअ, कि उतर कैह दिणा, तेबा त्या बहू डरी दे थी। 7तेबा सह एकी बादले ढकु, होर तेऊ बादला का यह शब्द निकत, यह मेरअ प्यारअ शोहरू साहा दअ, एउरी शुणा। 8तेबा त्याहे एकी-एकी सभी आपु फेर हेरू होर यीशु छाडी करे आपु संघे होर कोहे नांई हेरु।
9जोहता का इहंदे वक्तते तेऊए त्याह वै आज्ञा दिनी कि जेबरे तणी मणशा रअ शोहरू मरी करे जिऊंदअ नांई होऊ, तेवरे तणी तमे जोह हेरु तेता कासी का जेह नांई बोले। 10त्याहे याह गला याद डाही; होर आपु में गला करदे लागे, मरी करे जिउणे रा कह मतलव साहा? 11होर त्याहे सह पुछु, शास्त्री किबे बोला कि एलिय्याह रा पहिले इछणा जरूरी साहा? 12यीशुये उतर दिना, जरुरी एलिय्याह पहिले इच्छी करे सबे साह ठीक करणा, पर मणशा रे शोहरू रे बारे यह किवै लिखूदा कि तेऊ बखे दुःख चुआकणा, होर सह तुच्छ गिणनअ? 13पर हांऊ तमा का बोला, कि एलिय्याह इच्छी मूक्दअ होर जेहड़ा तेऊरे बारे में लिखुदा साहा, त्याहये जोह चाहु सह तेऊ संघे करु।
एकी शोहरू का दुष्टात्मा काहडणी
(मत्ती 17.14-21; लूका 9.37-43)
14जेबा सह चेले सेटा वै आउअ, त्याहे हेरू कि तेऊ सेटा वखे भीड़ साहा होर शास्त्री तेऊ संघे वकबासा करदे लागे। 15तेता हेरी करे सबे हेरान हुंदे लागे, होर तेऊ सेटा वै ठुरी करे यीशु बे नमस्ते करी। 16तेऊ त्याह का पुछु, तमे याह कैह वकबास लाइदे करणे? 17भीड़ा मेंजा का एकी उतर दिना, हे गुरू, मांई आपणे शोहरू, जासू में दुष्टात्मा शातीदी साहा, ताह सेटा वै आणू दअ। 18तेऊमें एक काली आत्मा साहा जन्दे कन्धे तेऊ सह ढाका होर शोटी दिंदा, होर सह मूहां में शेफा भरदा, होर दांदा चाबा होर सह शुकदअ लागा। माई तेरे चेले वै बोलू कि त्याह तेसा काहडे, पर त्या तेता नांई काहडी सके। 19ऐता शुणी करे तेऊ त्याहवै उतर देई करे बोलू, हे अबिश्बासी लोको, महा केव्रे तणी तमा संघे रहणा? होर केव्रे तणी महा तमे सहन करने? तेऊ शोहरू महा सेटा वै आणा। 20तेबा सह त्याहे तेऊ सेटा वै आणू, होर जेवा सह तेऊए हेरू, तेबरी तेसा दुष्टात्मा सह मरोडू; होर सह जमीना में पडू, होर मूहा का थूक काहडी करे सह जमीना में पड़दअ लागअ।
21तेऊए तेऊरे वापु का पुछु, एउरी यह हालत कदा ओरी साहा? तेऊये बोलू, वचपना का। 22तेसा यह खत्म करणे री तणी केबरे यह आगि में, होर केबरे पाणी में भी फेकू; पर जेबा तूह कैह करी सका तेबा, हामा पैंदे दया करी करे महारी सहायता कर। 23यीशु तेऊबे बोलू, जेबा तूह करी सका? यह कैह गला साहा, बुशाह करने आले वै सभे सा होई सका 24शोहरू रे वापु तेबरी जोरे सगे बोलू, हे परमेश्वर, हाऊं बुशाह करा, मेरा नांई अबिश्बासा रे करने री तणी मेरी सहायता कर। 25जेवा यीशु हेरी कि लोके भीड़ लाई बणाउणी, तेबा तेउये दुष्टात्मा वै क्रेरी करे बोलू, हे काली होर टोउणी करणे आली आत्मा एउ शोहरू का निखल, हाऊं ताहवै आज्ञा दिंदा होर दूजी वारी कदी नाँई इछे । 26तेबा सह तेऊ मरोड़ी करे होर क्ररीगा लाई करे निकदी, होर शोहरू मुएदे साही होऊ, अखे तणी की एखे लोके बोलू की यह मूंअ। 27पर यीशु तेऊरअ हाथ ढाकी करे चुआकू, होर सह खडअ होऊ। 28जेबा सह घरा वै आउअ, तेबा तेऊरे चेले सह कराणे मे पुछु, हामे तेता किबे नांई काहडी सकी? 29एता पैंदे यीशु बोलू एडी दुष्टात्मा बिना प्रार्थना वागे नांई काहडी सकदे।
आपणी माउता रै बारे मे यीशु री भविष्यवाणी
(मत्ती 17.22; 23; लूका 9.43-45)
30तेऊकी त्याह तखा का चली, होर त्याहे गलीला होई करे नाहदे लागे, सह नांई चाहदअ, कि ऐतका पता कासी भी नांई लागे। 31किबेकी सह आपणे चेले वै उपदेशा दिंदअ लागअ होर त्याहबे यह बोलदअ लागअ, मणशा रअ शोहरू मणशा रे हाथे ही धोखे संघे ढाकण होर त्याह सह मारणं होर मारणे बाद सह चिउणे धियाडे सह जीऊदअ हुणअ। 32पर त्याहे ऐसा गला नांई समझी सकी होर यीशु का पूछणे का डरा थी।
सभी का बडअ कुण
(मत्ती 18.1-5; लूका 9.46-48)
33तेबा त्याह कफरनहूमा बे आए; होर घरे पूजी करे त्याह का पुछू, बाता तमा कासु गला पीछे उलझी? 34त्याह चुप रही, किबेकी बाता त्याह ऐसा गला पीछे उलझी थी, की हामा में बढ़अ कुंण साहा। 35तेबा तेऊये वैशी करे बारहा चेले शादी होर त्याह वै बोलू, ज़ेबा कोई बडअ बणना चाहदा तेबा सह सबिका होच्छअ होर सेबक बणे। 36होर यीशु एक बालक आणी करे खड़अ करू होर तेऊ बालका कुमड़ी डाही करे त्याह वै बोलू, 37जोह कोई मेरे ना का एड़अ बालका साही मना, सह महा मना, होर जोह कोई महा मना सह महा नांई पर जूणी हाऊं भेज़ुदा साहा तेऊ मनदा।
जोह बिरोधा में नांई सह पक्षा में
(लूका 9.49,50)
38तेबा यूहन्ना तेऊबै बोलू, हे गुरु, हामे तेरे ना का एक मणशा दुष्टात्मा काहडद हेरू हामे तेऊवै मना करदे लागे किबेकी सह हामे संघे नांई थी। 39यीशु तेऊबै बोलू, तमे तेऊबै मना मत करदे एडा किछे नांई आन्धा की जोह कोई मेरे ना रे सामर्थ्य रै काम करे, होर छेकअ महाबे बुरा बोले 40किबेकी जोह मणश मेरे बिरोधा में नांई सह हामा संघे साहा दअ। 41जोह कोई मणश एक कटोरअ पाणी तमा वे तेबा पिलाए की तमे मसीहा में साहा तेबा हाऊं तमा का सची बोलदा त्याहे आपणा प्रतिफल कासी रीति संघे नांई खोउणा।
ठोकरा रा कारण बणना
(मत्ती 18.6-9; लूका 17.1-2)
42जोह कोई या होच्छे में का महा में बुशाह करलअ, कासु वै ठोकर दे तेबा तेऊवै भला यह साहा कि तेऊर गले चक्की रअ पाट लटकाऊण होर सह गाडा पाऊण। 43अगर तेरअ हाथ ताहबे पापा री बजाह बणा तेबा तेऊ काटी करे फेकी दे शोभला यह साहा की, तमे लूले होई करे जीबना रे महीतर इछे, किबेकी तेरे दुए हाथ हुंदे होए भी तूह नरका री आगि में नांई पडू लोडी जोह कधी नांई हिशती। 44जखे तेऊरे चिऊ नांई मरदे होर आग नांई हिश्ती 45अगर तेरी टांग भी ताहबे ठोकर दे तेसा काट। लंेगड़अ होई करे तेरा जीबन ठीक साहा किबेकी तेरी दुहे टांगा हूदे हूए भी तूह नरका वे नाहण। 46जखे तेऊरे चिऊ नांई मरदे होर आग नांई हिश्ती। 47अगर तेरी आछ ताहवै ठोकर दे तेसा काढ होर, शोभला यह साहा की, तमे काणे होई करे परमेश्वरा रे राज्य में नाहणे का ठीक साहा। किबेकी दुई आछी हूदे भी तूह नरका री आगि में नांई पडू लोडी। 48जखे तेऊरे चिऊ नांई मरदे होर आग नांई हिश्ती। 49किबेकी हर एक मणश आगि का लुणअ करणअ। 50लुण रामबडा साहा, पर अगर लूणा रा सुआद नाह्दा रहू सह कीजी करे लूँणा करना? आपु में लुण डाहा, होर आपु में मिली करे रहा।
Seçili Olanlar:
मरकुस 9: ISJNT
Vurgu
Kopyala
Karşılaştır
Paylaş
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
Inner Seraji (ईनर सराजी) Bible by The Love Fellowship is licensed under Creative Commons Attribution-ShareAlike 4.0 License.
