मरकुस 5
5
दुष्टात्मा आल़अ मणश ठीक करु
(मत्ती 8.28-34; लूका 8.26)
1त्याह झीला रे पार गिरासनियों रे देश पूजै, 2जेबा सह किस्ती में का निकतअ तेबा तेवरी एक मणश ज़ासु में दुष्टात्मा थी, सह मौल्थनी में रहंदा, तेऊ मिल्दअ आऊअ। 3सह कब्ररा में रहंदा थी, होर कोहे भी तेऊ शांगली संघे नांई बानी सकते थी, 4किबेकी सह कई बारी शांगली होर हथकड़ी संघे बानू, पर तेऊये शंगला चोड़ी पाई होर हथकड़ी रे टुकड़े-टुकड़े करी, होर सह एतरा प्रचण्ड थी कि कोहे भी तेऊ वशा में नांई करी सकतअ थी । 5सह लागातार राची धिहाड़ी मलथनी में होर ज़ोता हाले पाऊन्दअ होर आपणे आपु वै पाथरे संघे घायल करदा थी।
6सह यीशु दूरा का भाल़ी करे ही ठूरु, तेऊवै नमस्ते करी, 7होर बोलू, हे यीशु, महान परमप्रधान परमेश्वरा रे शोहरू महा ताहका कैह काम? हाऊं ताहवै परमेश्वरा री स्कंदी खांदा की महा वै दुःख नांई दे। 8किबेकी तेऊये तेऊवै बोलू, हे दुष्टात्मा, एउ मणशा का पोहरी निखल! 9यीशु सह पूछू, तेरा ना कैह? तेऊ बोलू, मेंरा ना सैना साहा, किबेकी हामें खासे साहा दे। 10होर तेऊये खासी अर्ज करी की, हामा इऊ देशा का बागे नांई भेजे। 11तखे ज़ोता एक सूरा रअ बड़अ छूंऊड चरदअ लागदअ दअ थी। 12त्याहे तेऊका अर्ज करी करे बोलू, हामा याह सूरा में भेज़ की हा याह मीतर नाहणे दे। 13तेबा तेऊये त्याह वै हूक्म दीना होर दुष्टात्मा निख्ली करे सूरा मीतर नाठी होर ज़ो छुंड, जोह की दस हज़ार, नई रे किनारे का ठुरदे-ठुरदे नई जांद्र पड़ी होर डूबी करे मूयं। 14त्याहे गुआले ठुरी करे आपणे शहर होर ग्रायं यह खबर खोजी, जोह होऊ थी, लोका तेता भाल़े आउये। 15यीशु सेटा इच्छी करे यह हेरी करे डरी की सह जासु शाता दा थी, जासु में दुष्टात्मा री सैना थी, सह बेठदअ आसा होर तेऊये झिकड़े बानी दे आसा, होर सह एबा ठीक आसा। 16होर भाल़ण आले तेऊरा पूरा हाल चाल त्याह वै शुणाऊ जासूमे दुष्टात्मा थी, होर सूरा रे बारे मे पुरा हाल शूणाऊ। 17तेबा त्या तेऊका बिनती करी करे बोलदे लागे की महारी सीमा का नाश। 18जेबरे सह किस्ती में चड़दअ लागअ तेबा सह जासु में दुष्टात्मा थी, सह अर्जा करदअ लागअ, महा आपु संघे रहणे दे। 19पर तेऊ आपु संघे ईहंणे री आज्ञा नांई दिनी, होर तेऊका बोलू, आपणे घरे नाशिकरे आपणे लोका वै खोज़ की परमेश्वर केई साबे दया करी करे बड़े-बड़े काम करी। 20सह नाशि करे दिकापुलिसा में याह गल्ला खोजी की यीशु केई साबे बड़े काम करी; होर सारे लोका हेरान हुंदा थी।
याइरा री मुइदी शोहरी होर एक बीमार बेटड़ी
(मत्ती 9.18-26; लूका 8.40-56)
21जेबरे यीशु भी किस्ती में पारा फेरा वे नाठअ, तेबा एक बड़ी भीड़ कठे होई। सह सौरा रे किनारे ही, थी 22याईरा ना रअ एक प्रार्थना घरा रे मुख्य मेंझा कअ आउय, होर तेऊ हेरी करे तेऊरे पइरे पड़ू, 23होर यह बोली करे तेऊ कै बहू अर्ज करी की, मेरी होछी शोहरी मरणे आली साहा, तूह इच्छी करे तेसा पैंदे हाथ डाहे की सह शोहरी ठीक होई करे जिऊंदी रहे। 24तेऊकी सह तेऊ पीछे हांडू; होर बड़ी भीड़ तेऊ पीछे होई, अखे तणी की लोका तेऊ पैंदे पड़दे लागे। 25एक बेटड़ी, तेसा बाहरा साल कै लोहू बहणे री बीमारी थी। 26सह बहू बईदा सेटा इलाजा करी करे दुखी होई, होर आपणे सारे ढबै खरच करी करे भी किछे फाईदा नांई होऊ। 27तेसे यीशु री चर्चा शुणिकरे भीड़ा में तेऊ पीछे आई होर तेऊरे झिकड़े छूंई, 28किबेकी सह एडा बोल्दा थी, जेबा हाउ झिकड़े भी छूली, तेवा हाउ ठीक हूणी। 29होर तेवरी तेसका लोहू बहणा बंद होऊ होर तेसा आपणे शरीरा में जाणु की हाऊं एसा बीमारी का ठीक होई। 30यीशु ये तेवरी जाणु की महा का सामर्थ्य निकदी, होर भीड़ा में पीछे फिरी करे पूछू, मेरे झिकड़े कूणे छूंई? 31तेऊरे चेले बोलू, तूह हेरा की भीड़ ता पैंदे पड़दी लागी दी, होर तूह बोला मेरे झिकड़े कूणे छूंई? 32जूणी एडा करू थी तेऊ भाल़णे री तणी की यह काम कुणे करु, चऊ तरफा हेरू। 33तेऊकी सह बेटड़ी यह जाणी करे की मेरी केहड़ी भलाई होई, डरदे होर कामदे-कामदे आई, होर तेऊरे पईरे पड़ी करे होर सच-सच बोलू। 34तेऊये तेसा वै बोलू, शोहरी, तेरे बुशाहे तुह ठीक करी। कुशल होई करे नाश, होर आपणी एसा बीमारी का बचती रह।
35सह ऐड़ा बोलदअ, लागअ की प्रार्थना घरा रे मुखिए रे घरा का लोके इच्छी करे बोलू, तेरी शोहरी मुई, एबा गुरु वै दुःख किबे लागअ दीनदअ? 36जासु गला त्याह, लागदे थी, तेता ना शुणी करे, प्रार्थना घरा रे मुख्या वै यीशु बोलू, नांई डरे, बुशाहा डाह। 37होर तेऊये पतरस होर याकूब, होर याकूबा रे भाई यूहन्ना छाडी करे, होर कासी भी आंपु संघे नांई दीना इहंणे। 38प्रार्थना घरा रे मुखिए रे घरे पूज़िकरे, तेऊये लोका लेरदे चिखदे हेरी। 39तेऊकी तेऊये मीतर नाशी करे त्याह का बोलू, तमा किवै हाले पाउदे होर लेरदे लागे दे? यह शोहरी मूई नांई, पर सूतिदी साहा। 40त्याहे सह हासणे वै करु, पर तेऊये सवै बागे काड़ी करे शोहरी री माँ-बाब होर आपणे संघी मीतर, जखे सह शोहरी, तेऊ कमरे, नाठअ। 41होर तेसा शोरी रअ हाथ डाकी करे तेसा वै बोलू, तलीता कूमी! एताका मतलब सा, हे शोरी ये, हाऊ तमावै बोला, उठ! 42होर शोरी तेवरी उठी करे हांडदी फिरदी लागी; किबेकी सह बारह बर्षा री थी। एता भाणी करे लोका बखे हेरान होई। 43तेऊकी यीशु त्याह वै बोलू की एतके बारे कासी बे पता नांई लागा लोडी होर बोलू, एसा वै कुछ खाणे वै देया।
Seçili Olanlar:
मरकुस 5: ISJNT
Vurgu
Kopyala
Karşılaştır
Paylaş
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
Inner Seraji (ईनर सराजी) Bible by The Love Fellowship is licensed under Creative Commons Attribution-ShareAlike 4.0 License.
