मरकुस 1

यूहन्ना बपतिस्मा दिण आले रा प्रचारा

1परमेश्वरा रअ शोहरू यीशु मसीहा रै सुसमाचारा री शुरुआत होई। 2जेड़ा यशायाह भविष्यद्वक्ता री कताबा में लीखु दा साहा,

हेर, हाऊं आपणे ऐकु दूता ताह जेह भेजा,

जासू थारी बात सुधारणी।

3बूणे एकी बोलण आले रअ शब्द शुणन्दअ लागअ दअ साहा, कि परमेश्वरा री बाता त्यार करा, तेऊरी सड़का सीधी करा।

4यूहन्ना आउअ, जोह बूणे बपतिस्मा दीन्दा, होर पापा री क्षमा री तणी मन फिराव होर बपतिस्मा रा प्रचार करदा। 5सारी यहूदिया प्रदेशा रै होर यरूशलेमा रे सभी रहण आले निख्लिकरे तेऊ सेटा नाठे, होर आपणे पाप मनीकरे यरदना नइ में तेऊका आपणा बपतिस्मा लऊ। 6यूहन्ना ऊंटा रै शरयाला रै झिकड़े होर चामड़े री गाची बांन्दा थी होर टिडिया होर जंगली खमीर खान्दा थी। 7होर एड़ा प्रचार करदा थी, महा बाद सह इहणे आलअ साहा दअ, हांऊ एता लाईक नांई आंदअ कि ऊटे होई करे तेऊरे बूटा रै तसमे खोलू। 8मांये तो तमावै पांणी का बपतिस्मा दीना, पर तेऊ तमावै पवित्र आत्मा रा बपतिस्मा दीणा।

यीशु रा बपतिस्मा होर तेऊरी परीक्षा

9त्या धयाडी यीशु गलीला रे नासरत का इच्छी करे यरदना नइ में यूहन्ना का बपतिस्मा लऊ। 10होर यीशु बपतिस्मा लई करे जेबरे सह पाणी का उझे निकतअ तेबा तेवरी तेऊये सरग खुलुदअ हेरु, होर परमेश्वरा री आत्मा कबूतरा साही आपू प्रेन्धे पवित्र आत्मा मे ईन्दी हेरी। 11होर स्वर्गा का यह आकाशवाणी होई, तूह मेरअ प्यारअ शोहरू साहा दअ, ताका हाँऊ खुश साहा दअ। 12तेबा पवित्र आत्मा यीशु बूणा बे नीऊं। 13बूणे सह चाहल़ी धियाडी तणी शैताने तेऊरी परीक्षा लई; होर सह बूणे जगली पशु संघे रहूं, होर स्वर्गदूत तेऊरी सेवा करदे रही।

यीशु रे सेवा रे कामा री शुरुआत

(मत्ती 4.12-17; लूका 4.14,15)

14यूहन्ना जेला मे रहणे बाद यीशु गलीला प्रदेशा वै ईछी करे परमेश्वरा रे राज्य रे सुसमाचारा रा प्रचार करु, 15होर बोलू, वक्त पूरा होऊ, स्वर्गा रा राज्य नेड़ आऊआ; मन फेरा होर परमेश्वरा रे सुसमाचार प्रेंदे बुशाह करा।

माच्छी ढाकण आले शादणे

(मत्ती 4.18-22; लूका 5.1-11)

16गलीला री झीला रे किनारे नांदे बक्ते, तेऊये सिमोन होर तेऊरे भाई अन्द्रियास नई में जाले फेकते हेरी; किवकि त्या माच्छी ढाकण आले थी। 17यीशुये त्या वै बोलू महा पीछे इच्छा, महा तमा मणशा ढाकण आले बणाऊणे 18त्या तेभरी जाल़े छाडी करे तेऊ पीछे नाठे। 19त्या तखा का जेंह नाहीं करे, यीशु जब्दी रअ शोहरू याकूब, होर तेऊरअ भाई यूहन्ना वै, किस्ती परेन्दे ज़ाल़े ठीक करदे हेरी। 20तेऊ तेभरी त्या शदाई, होर त्या आपणे बापू जब्दी रे नोकरे संघे किस्ती प्रेंदे छाडी करे, तेऊ पीछे नाठे।

दुष्टात्मा में फसूदअ मणश ठीक करणअं

(लूका 4.31-37)

21तेबा त्या कफरनहूम वै आए, होर सह तेवरी सब्ता री धियाड़ी प्रार्थना घरा में नाशी करे प्रचारा करदअ लागअ। 22होर लोका तेऊरे प्रचारा शुणी करे हेरान होई; किबेकी सह तया शास्त्री जेड़ा नांई, पर अधिकारे संघा उपदेश दिंदा थी। 23तेवरी, त्या रे प्रार्थना घरा में एक मणश, जासू में दुष्टात्मा थी। 24तेऊये क्रींगा पाई करे बोलू, हे यीशु नासरी, हामा तेरा कैह काम? कैह तूह हामा नाश करदअ आऊअद साहा? हाऊं ताहा जाणा, तूह कुण साहा? परमेश्वरा रअ पवित्र मणश। 25यीशु ये तेऊबै डांटी करे बोलू, चुप रह; होर एउ में का निखल़। 26तेबा दुष्टात्मा तेऊ मारोड़ी करे, बखे ज़ोरे-ज़ोरे क्रिंग्गा लाई करे निख्दी। 27ऐता हेरी करे सबे हेरान होई तया आपू मेंजे गला करदे लागे, यह कह गल साहा? यह नई गल साहा। सह अधिकार संघे दुष्टात्मा वै आज्ञा दिन्दा, होर सह तेऊरी आज्ञा मना। 28होर तेऊरा ना तेवरी गलील रे ओरी पोरी सारे देशा में सारी जागहा फैलू।

बहु दाहु आले लोका ठीक करने

(मत्ती 8.14-17; लूका 4.38-41)

29सह प्रार्थना घरा का निखली करे, याकूब होर यूहन्ना संघे सिमोन होर अन्द्रियासा रे घरा वै आऊअ। 30सिमोना री शाशु ज़री दी थी, होर त्याहे तेवरी एतके बारे में तेऊवै खोज़ू। 31तेबा तेऊये नेड़ नाशी करे तेस्कअ हाथ ढाकी करे खड़ी चुआकी, होर तेस्कअ ज़र मुकअ, होर सह तेऊरी सेवा टहीला करदी लागी। 32ब्याल्के ज़ेबरे धिहाडअ डूबी मूकअ, लोका सारी दाहू आले होर जासू दुष्टात्मा शातादा थी, तेऊ सेटा आणी। 33होर सारा ग्रां तेऊरे दुआर सेटा कठे होउ। 34तेऊये खासे लोका जोह कई बीमारी का दुखी थी, त्या ठीक होर खासी दुष्टात्मा काहडी, होर ओपरे बोलणे नांई दिना, किबेकी त्या तेऊ जाणा थी।

यीशु रा कराणी जागा में प्रार्थना करना

(लूका 4.42-44)

35दोती धयाडे निख्लणे का खासे पहिले सह उठिकरे हांडदअ लागअ, होर एकी सुनसान ज़ागा प्रार्थना करदअ लागअ। 36तेबा सिमोन होर तेऊर संघे तेऊ लोड़े नाठे। 37जेबा सह भैटअ, त्याहे बोलू, सवै लोका तमा लोड़े लागदे। 38तेऊये त्या वै बोलू, इच्छा हामा ओरी पोरी कासु होरी ग्राये नाहणा, कि हाऊं तखे भी प्रचार करु, किवैकि हाऊ एतकी तणी निकत्दअ आसा। 39तेबा सारे गलीला में त्या रे प्रार्थना घरा में नाशिकरे प्रचारा करदअ रहू होर दुष्टात्मा काहड़दअ रहू।

कोढ़ी मणश ठीक करन

(मत्ती 8.1-4; लूका 5.12-16)

40एक कोढ़ी यीशु सेटा बे आउअ, तेऊये यीशु का अर्ज करी, होर तेऊरे सामाने झूकी करे बोलू, जेबा तूह चाहे तेबा हाऊ शुद्ध होई सका। 41तेयूये तेऊ प्रेंदे दया करी करे हाथ बड़ाऊ, होर तेऊ छुई करे बोलू, हाऊं चाहन्दा कि तूह शुद्ध हो। 42होर तेवरी तेऊरी, कोढ़ा री बीमारी नाह्दी लागी होर सह तेवरी शुद्ध होऊ। 43यीशु सह समाझाई करे तेवरी भेजू, 44होर तेऊये बोलू, हेर, कासी कै किछे नांई बोले, आपे नाशी करे याजका सेटा रिहाये होर आपणे शुद्ध हूणे रे बारे में जोह कुछ मूसा बलिदान चढ़ाई करे डाहुदा साहा तेउवे दान दे कि सह तेरे ठीक हुणे री गुआही त्या पेंदे होए। 45पर सह बागे नाशी करे भी लोका जांद्रे एता खोजदअ लागअ, तेऊ एतरा ज्यादा खोजू कि यीशु एयु ग्राए भी नांई नाही सकअ, पर बागे बूणे रहू, होर च़ौऊ तरफा का लोका तेऊ सेटा वे इंहदे रही।

Seçili Olanlar:

मरकुस 1: ISJNT

Vurgu

Kopyala

Karşılaştır

Paylaş