लूका 2

यीशु रा जन्म

(मत्ती 1.18-25)

1त्या धयाडी में राजा औगुस्तुस कैसरा री तरफा कै यह आज्ञा निकती की सारे रोमी संसारा रै सभी लोका रै ना लिखे। 2यह पहिली तेऊ वक्ता री पहली ना लिखाई होई होर क्विरिनियुस सीरिया रअ हाकिम थी। 3सारे लोका आपणे ना लीखणे री तणी आपणे-आपणे नगरा वै नाठे। 4तेबा यूसुफ भी गलीला रे नासरता रे यहूदिया में दाऊदा रे नगरे बैतलहमा वै नाहठअ किबेकी सह दाऊदा रे घराने होर बंशा का थी; 5की आपणी मंगेतर मरियमे संगा ज़ो सूईन्दी थी ना लिखाऊ। 6तयारे तखे रहंदे-रहंदे तेसके सूईंणे रे धयाडे पुरे होई, 7होर तेसे आपणें पहिलौठे पुत्र वै जन्म दीना होर सह झिकड़े में लपेटी करे खुडआ में डाऊ; किबेकी तया वै सराये में जागा नांई थी।

स्वर्गदूता रा फुआला वै फयाड़ा

8होर तेऊ देशे केथरे फुआल थी जोह मेदाना में रहिकरे आपणे भेडा वे पहरा दीन्दा थी। 9होर परमेश्वरा रअ एक दूत तया सामने खड़अ होऊ, होर परमेश्वरा रे तेज तयारे चऊ तरफ चमकू, होर तया बखे डरी। 10तेबा स्वर्गदूते तया वै बोलू, डरा नाँई आंदे; किबेकी भाल़ा हाऊ तमावै एक बखे खुशी रा सुसमाचार शुनाऊंदा ज़ो सबी लोका वै हूणा 11की आज़ दाऊदा रे नगरे थारी तणी एक उद्धारकर्ता जन्मु, होर यह मसीह परमेश्वर साहा। 12होर एतका यह थारी तणी चिन्ह पता हूणा की तमा एक बालक झिकड़े में लपेटू दअ होर खुडआ में डाऊदअ भाल़ण। 13तेबा एकाएक तेऊ स्वर्गदूते संघे स्वर्गीय सेना परमेश्वरा री स्तुति करदे होर एड़ा बोलदे हेरी, 14स्वर्ग परमेश्वरा री महिमा होर धरती में तया मणशा में जासू कअ सह खुश साहा, शांति हो। 15जेवा स्वर्गदूत तया सेटा कअ स्वर्गा वै नाठे, फुआले आपु में बोलू, चाला हामा बैतलहमा में नाशिकरे याह गलआ ज़ो होई, होर परमेश्वरे हामा वै प्रचार खोज़ु भाले चाला। 16होर तया तेबरी नाशिकरे मरियम होर यूसुफ, होर खुडआ में सह बालक हेरु। 17एता भालिकरे तया यह गलअ ज़ो एऊ बालका रे बारे तया वै खोजी दी थी, प्रगट करी, 18होर सभी शूणने आले या गलआ कअ ज़ो फुआले तया वै खोज़ी बखे हेरान होई। 19पर मरियमे या गलआ आपणे मने डाई करे सोचती लागी। 20होर फुआले जेड़ा तया कअ बोलू, तेड़ा ही शूणी करे होर भालिकरे परमेश्वरा री महिमा होर स्तुति करदे फिरी आये।

यीशु रा ना करण

21जेबरे आठ धयाडी पूरी होई होर तेऊरा खतना करने रा समा आउया, तेबा तेऊरा ना यीशु डाऊ जोह स्वर्गदूते तेऊरे पेटा में ईंण का पहिले बोलू दा थी।

मंदिरे यीशु रा अर्पण

22ज़ेवा मूसा री व्यवस्था रे साबे तयारे शुद्ध हूणे रे धियाड़े पुरे होई, तेबा तया सह यरूशलेमा वै नीउँ की परमेश्वरा रे सामने आणी सके। 23(जेड़ा की परमेश्वरा रे नैमा री (व्यवस्था) में लिखू दा साहा की हर पहीलौठा परमेश्वरा री तणी पवित्र हूणंअ।) 24होर परमेश्वरा री व्यवस्था रे साबे, पंडूकों रअ एक ज़ोड़ा, या कबूतरा रे दूई बच्चे आणी करे बलि दे।

सिमोना री गीह

25यरूशलेमा में सिमोना ना रअ एक मन्श थी, होर सह मन्श धर्मी होर भक्त; होर इस्राएला री शांति री तणी निहालदअ रहंदा थी, होर पवित्र आत्मा तेऊ पैंदे थी। 26होर पवित्र आत्मा संघे तेऊवै एडा प्रकट होई की जेबरे तक सह प्रभु रअ मसीह नांई भालअ, तेबरे तणी तेऊ मौऊत वी नांई भालणी। 27सह पवित्र आत्मा रे सिखाणे का देहुरे में आऊअ; होर जेबरे माँ बाब तेऊ बच्चे यीशु मीहतरा वै आणे, की तेऊरी तणी व्यवस्था री रीति रे सावे करे, 28तेबा तेऊये सह आपणी कुमड़ी ब्शयागु होर परमेश्वरा रा धन्यवाद करी करे बोलू।

29हे मालक, एबा तूह आपणे नोकरा आपणे वचना रे साबे शांति संघे भेज्दा,

30किबेकी मेरी आछीये तेरा उद्धार भाली मुका,

31सह तांईऐ सभी देशा रे लोक रे सामने त्यार करू दा आसा,

32की सह अन्यजाति वै प्रयाषा हूणे वै ज्योति होर तेरे आपणे लोका इस्राएला री महिमा होए।

33तेऊरअ बाब होर तेऊरी आमा या गलआ कै ज़ो तेऊरे बारे बोलदा थी, हेरान हूंदा थी। 34तेबा सिमोने तेऊवै आशीष देई करे तेऊरी आमा मरियमा वै बोलू, भाल, सह इस्राएला में बहु पड़ने होर जी उठने री तणी, होर एड़अ चिन्ह हूणे री तणी ठहराऊदअ आसा, जासू रे बिरोधा में गलआ हूणी। 35बरन तेरा प्राण भी तलबारे संगा आर पार छिदण-एता संघे खासे दिला रे मना रे विचार प्रकट हूणे।

हन्नाह री गुआही

36हनाह ना री एक नबिया थी जो अशेरा रे गोत्र में का हन्नाह ना रे एक फनुयला री शोरी एक भविष्यवक्ता थी। सह खासी बुढली थी, होर वियाह बाद साता बर्षा तक सह आपणे मर्दे संघे जिऊंदी रही। 37सह चौरासी साला कअ बिधबा थी। होर मंदिरा मे सेवा करनी नांई छाड़दी थी, पर ब्रत होर प्रार्थना करी करे राच धयाड नमस्ते करदा थी। 38होर सह तेसा घड़ी तखे इछी करे परमेश्वरा रा धन्यवाद करदी लागी, होर तया सभी कअ, ज़ो यरूशलेमा छुटकारे री तणी निहालदे लागे दे थी, तेऊ बच्चे रे बारे गलआ करदी लागी।

नासरता वै बापिस ईणा

39जेवा प्रभु री व्यवस्था रे सावे सब कुछ पूरा करी मुके तेऊकी गलीला में आपणे नगरा नासरता वै भी नाठे। 40होर शोहरू बढ़द होर पाकअ हुन्दअ रहू होर बुद्धि आल़ हूंदअ रहू; होर परमेश्वरा रा अनुग्रह तेऊ पैंदे थी।

बालक यीशु देहुरे में

41तेऊरे माँ बाब हर साल फसह री जाचा री धयाडी यरूशलेमा वै नाए करदा थी। 42जेबा यीशु बाहरा साला रअ होऊ, तेबा तया जाचा री रीति रे सावे यरूशलेमा वै नाठे । 43जेबा त्या धयाडी पूरी करी करे इंदे लागे, तेबा बालक यीशु यरूशलेमा में रहू; होर तेऊरे माँ बाब नांई जानदे। 44तया एड़ा जाणु की सह होरी लोका संघे हुणअ, एकी धयाडी रअ पडाब मूकअ काड़ी होर तया तेऊ आपणे कुटुम्बियो में होर आपने जाणे पचाहना में लोड़दे लागे। 45पर जेबा नांई भेटअ, तो लोड़दे-लोड़दे भी यरूशलेमा वै नाठे, 46होर चीई धयाडी बाद तया सह देहुरे में शास्त्री बीचे बेठदअ, तयारी शुणदअ होर प्रश्ना करदअ भाल़ू। 47ज़ेथरे तेऊरी शुणी तया सभे तेऊरी समजा कअ होर तेऊरे उत्तरा कअ हेरान होई। 48तेबा तया तेऊ भालि करे हेरान होई होर तेऊरी आमा तेऊ कअ बोलू, हे पुत्र, तांए हामा संघे एड़ा किवे करू? हेर, तेरअ बापू होर हांउ ताहा लोड़दे लागे दे? 49तेऊ तया कअ बोलू की तमे महा किबे लोड़दा? तमें नाँई जानदे की महा आपणे बापू रे घरे रहना जरूरी साहा दा? 50पर ज़ो गला तेऊ बोली, तया सह नांई समजी। 51तेबा सह तया संघे नाठअ होर नासरत वै आउअ, होर तयारे बशा में रहू; होर तेऊरी आमा या सारी गलआ आपणे मने डाई। 52होर यीशु बुद्धि होर डील डौल में, होर परमेश्वर होर मन्शा रअ अनुग्रहा में बढ़दअ रहू।

Seçili Olanlar:

लूका 2: ISJNT

Vurgu

Kopyala

Karşılaştır

Paylaş