RUTI 3
3
Polangkai i Ruti
3:1-18
1Bareʼe masae ungka njairia, mompau i Naʼomi ri Ruti, natoʼo, “Sangaya-ngaya da kupari-pari mampepalika da naka ronga mosombori siko da naka uono katuwumu. 2Ara banya siko motetala sangkani-ngkani pai waʼa mbeʼa anu motetala ri bonde i Boasi? I Boasi setu kasangkompota. Mewali pedongeka da kupantoʼoka siko! Ri wengi seʼi i Boasi da njoʼu maʼii gandunya ri bondenya. 3Seʼi-seʼi pandiumo, pakemo waʼa lana wongi, pai pakemo rengkomu anu maʼai ngkadolidinya. Nepa njoʼu siko ri kareʼe mpotetala i Boasi maʼii gandunya. Popeamo njairia rantani roo mangkoni pai manginu siʼa, paikanya neʼe boi naincani kanjaunya siko njairia. 4Da nupatomata ri mbeʼi kanjoʼunya yore. Ane tekayoremo siʼa, njoʼumo siko ri kareʼe ngkayorenya, da nusungke kumunya, nepa moturu siko mosu ri powitinya. Nepa da natoʼoka siko nunjaa anu sangaya-ngaya da nupowia.”
5Mesono i Ruti, natoʼo, “Madago, Ine, da kuwianaka pura-pura anu nditoʼo setu Ine.”
6Njoʼumo kojo i Ruti ri kareʼe mpotetala ntau moʼii. Nawianaka kojo silulu pai anu roo natotoraka manianya. 7Roo mangkoni pai manginu i Boasi, mawongko rayanya pai osa rayanya. Njoʼumo siʼa moturu yore mosu ri kareʼe mpabuyunaka gandu. Najoyo-joyowi i Ruti njoʼu njairia, nasungke kumu i Boasi, nepa moturu siʼa mosu ri powitinya. 8Ntongo wengi, tingkarasaka tekiwoi i Boasi pai da meyoro kayorenya. Jingki rayanya mangkita seʼi sambaʼa weʼa yore ri powitinya. 9Meoasi siʼa, “Isema siko?” Mesono i Ruti, natoʼo, “Yaku tua! Komi tina mami anu mosupa, pai komi anu kamonconya da mampasilolongani katuwuku. Tuarapa da mabuya rayami da mamporongo yaku.”
10Natoʼo i Boasi, “Tuarapa i Pue anu da madonco siko anaku. Ane ndapasintolio pai nunjaa anu roo nuwianaka ri ine maniamu, mewali powiamu seʼi mantunju woʼu pepotowemu anu gana-gana. Kamonconya siko nukoto da mampepali langkaimu tau anu mangurapa ri oyo ntau anu koreʼe bara ri oyo ntau anu kaasi-asi, pai inceʼe bareʼe nuwianaka. 11Inceʼe painaka neʼe ipu rayamu Ruti. Pura-pura anu nuperapi setu da kuwianaka; maka pura-pura tau ri kota seʼi mangaʼaku kasikonya sambaʼa weʼa anu madago engkomu. 12#Rut. 2:20 Lawi monco kojo, yaku da mampasilolongani katuwumu, maka yaku kasangkompomu anu mosu. Paikanya ntongo reʼepa sambaʼa tau ntaninya anu da mampasilolongani katuwumu. Maka siʼa kasangkompomu anu mosu mpodago painaka yaku. 13Ri wengi seʼi mau maroo-roomo siko ireʼi, ireneo mowuro nepa da kupeoasi ri tau setu, bara da napokono da mawianaka anu sangaya-ngaya da nawianaka ri siko bara bareʼe, yaku mojanji mamposabi Toʼo i mPue Ala Anu Tuwu, yaku da mawianaka nunjaa anu ndapapakoyoka yaku da mawianaka incetu. Seʼi-seʼi kayoremo ireʼi nakarataka mowuro raneo.”
14Yoremo kojo i Ruti mosu ri powiti i Boasi. Bangke reme ntongo masasayamapa, membangumo i Ruti da naka neʼe nakita ntau. Maka bareʼe napokono i Boasi da naincani ntau kamaʼi i Ruti njairia. 15Natoʼo i Boasi ri Ruti, “Yali salendamu tale ireʼi.” Nayali i Ruti salendanya nepa natale. Nepa nabubu i Boasi gandu temponya radua mpuyu kilo ri salenda i Ruti setu. Nepa nasoʼo mpodago, roo setu naokotaka ri awaa i Ruti, roo setu nepa napokau i Ruti mewalili ri banuanya. Payamo i Ruti nepa malai i Boasi njoʼu ri kota.
16Karata i Ruti ri banua, meoasi ine manianya, natoʼo, “Ewambeʼi pewalinya anaku?”
Ungka lairia natuntumo i Ruti pura-pura anu napowia i Boasi ri siʼa. 17“Pai” natoʼo woʼu i Ruti, “siʼamo seʼe anu mawaika yaku gandu seʼi, maka natoʼo bareʼe maya siko da mewalili ri inemu podo soe-soe pale.”
18Natoʼo i Naʼomi ri Ruti, “Popeamo anaku, nepa da nukita bara ewambeʼi pewalinya ri kapusanya. Maka kuincani i Boasi, bareʼe da napeʼontoka mampasilolongani rantani rata ri karoonya sandeme seʼi seʼe.”
