PATADA 3
3
Patada tila ntau mangura
3:1-35
1Neʼe kojo boi nukalingani nunjaa anu roomo kupaguruka siko anaku. Da nuendo-endo kojo songkaku, 2da naka marate tinuwumu pai da uono katuwumu. 3Mbolimo siko da todo ri peaya ndaya ri Pue Ala pai ri kasitaumu. Inceʼe da nuendo-endo pai da nuparindaya kojo, 4#Luk. 2:52 da naka ndapokawongko, ndaunde i mPue Ala pai tolino siko.
5Peayamo ri Pue ri kaliogu ndayamu, pai neʼe mampobangke-bangkeka parata ndayamu ngkaliomu. 6Da nutanjemo i Pue ri mpengaya-ngaya anu nuwianaka, da naka Sira mantujuka siko jaya ngkatuwu anu madago. 7#Rom. 12:16 Neʼe meruu nupampekiundeka kaloʼemu; pepoʼinayamo ri Pue pai tilawangimo anu majaʼa. 8Powiamu anu ewanceʼe da mewali pakuli ri siko anu da mampakaʼosa juʼa ngkoromu pai da mampakadonge rayamu. 9Tubunakamo i Pue ri pampanyombakamu ri Sira nunjaa anu ri wawo ngkadago ungka ri waʼa aga-aga anu nupotumpu pai ungka ri wua mpojamaamu, 10inceʼe painaka da buke waʼa bandala gandumu, ue anggoromu da maʼai ngkarianya painaka bareʼe gana tampa da ndapadika.
11 #
Ayu. 5:17
#Ib. 12:5-6 Ane ndaboembi i mPue siko, da nusabe inceʼe ewa sambaʼa patiendo, pai neʼe boi malente rayamu ua pompagurua setu. 12#Pepat. 3:19 Maka i Pue maboembi tau anu ndapomawo, ewa sambaʼa papa maboembi ananya anu napokapuru. 13Bangke porasi ntau anu mewali loʼe pai marata parata ndaya. 14Porasinya seʼe meruu olinya ungka ri salaka pai wuyawa. 15Loʼe ndaya meruu olinya ungka ri watu inta; bareʼe da siwia pai pura-pura anu nupodaraya. 16Kaloʼe ndaya mampakarate tinuwumu, mawai kakoreʼe pai katetubunaka. 17Kaloʼe ndaya mampakadago pai mampakaʼuono katuwumu. 18Tau anu metingkeni maroso ri kaloʼe ndaya da mangarata katuwu anu monco pai kalindo ndaya.
19Maka ua kaloʼe i mPue mampapewali lino;
kagana ngkaloʼea
Sira mangantale yangi ri kareʼenya.
20Ua pangaincania Sira mangabuntasi waʼa mata ue ri raya ntana mebete painaka moilimo uenya.
Sangkani pai limu ri yangi mampatudu ue ri lino.
21Inceʼe painaka, kekeni maroso kaloʼe ndaya pai ponawa-nawa anu manasa kojo ee anaku! Neʼe boi nurengkasaka, 22ane ewanceʼe da uono katuwumu – meawa pai ndapokawongko. 23Pelinjamu da uono pai bareʼe da torarambe witiku. 24Bareʼe da maeka rayamu ane da yore siko pai da lintu kayoremu mposambengi. 25Neʼe nupokaeka karugi anu da merampe ncoroba ewa lompiu anu da mangarumpa waʼa ntau majaʼa. 26I Pue mangajagai siko. Bareʼe da ndapapaliuka siko da tepalambunca ri raya mpatambo.
27Ane rapanya reʼe pangkotomu da mampowia anu madago ri tau ntaninya anu merapi petulungi ri siko, neʼe boi bareʼe nupokono mampowia incetu. 28Neʼe nupokau kasiyunumu da mopea-rantani bangke reme, ane seʼi seʼe nukoto da mantulungi siʼa. 29Neʼe nunawa-nawa nunjaa anu da mampakarugi kasiyunumu anu maroo-roo mosu pai siko, pai nasarumaka kojo siko. 30Neʼe nupopaisoka tau anu bereʼe powianya majaʼa ri siko. 31Neʼe boi masina rayamu ri tau anu masii, pai neʼe nusue poʼengko ntau seʼe. 32Maka i Pue mampobanciika tau anu mowia majaʼa, paikanya Sira mampokapuru tau anu mayoa rayanya ri katuwunya. 33I Pue mantusaki banua ntau majaʼa paikanya mangadonco banua ntau anu mepoʼinaya ri Sira. 34#Yak. 4:6, 1 Ptr. 5:5 I Pue mampobanciika tau anumobangke-bangke, paikanya mangadonco tau anu lauka rayanya. 35Tau anu loʼe da kakolese-lese katebambari ntoʼonya, tau anu tengo da terangani pamposari.
