PATADA 26
26
1Ewa uja ri turo mporeme, pai ewa yondu ri tempo ngkaramedanya,
ewanceʼe seʼe peunde ri tau tengo anu bareʼe sintinaja.
2Ewa tonci moyoko moyano-yano ri raoa,
ewanceʼe petusaki bareʼe da kono ri tau anu bareʼe masala.
3Kalide sangaya-ngaya da ndapatakaka sama, pai nyara sangaya-ngaya da ndatabasi,
ewanceʼe seʼe tau tengo sangaya-ngaya da ndaboembi.
4Tau anu masono pompeoasi ntau tengo,
siwiamo katengonya pai tau setu.
5Pompeoasi anu tengo sangaya da ndasonoka woʼu sononya anu tengo,
da naka anu mompeoasi narata ndaya kasiʼanya sambaʼa tau tengo.
6Mampokau sambaʼa tau tengo da mampakatu bambari,
siwiamo pai mampuʼasi witi ngkalio pai mampepali rugi.
7Da ewa tau pungku mampelinjaka witinya,
ewanceʼemo tau tengo da mampasowa patada.
8Mangaunde tau anu bereʼe loʼenya,
ewa mangkowa mainti-inti watu ri pondo.
9Ewa tau topoyangu-yangu majuʼi rui ungka ri palenya,
ewanceʼemo tau tengo mampasowa patada.
10Isema anu mampapotetala tau anu tengo bara tau kakindonya,
da mampakarugi sondo tau.
11 #
2 Ptr. 2:22
Ewa asu anu mampewalilisi luanya,
ewanceʼemo tau tengo mangawali mpowia woʼu katengonya.
12Moruana tau anu maʼai katengonya,
painaka tau anu mangaepe koronya loʼe.
13Tau anu malose napokono maroo-roo ri banua;
maka natoʼo, “Reʼe singa ri sambalikunya, boi nasoko yaku ri yae njaya.”
14Ewa dampo mbombo anu meyoro,
ewanceʼemo tau anu malose mekokolika ri langka ngkayorenya.
15Reʼe tau anu maʼai kojo kalosenya;
sako mangangkaku kinaʼa da nawunca ri nganganya malente rayanya.
16I malose naepe koronya maʼai ngkaloʼe,
meruu ri tau papitu anu mawai pesono anu monco.
17Tau anu mampesuaki popaiso ntau anu bereʼe pokentanya pai siʼa,
siwiamo pai tau anu mantangkandoo asu yopo ri talinganya.
18-19Tau anu mombamba, nepa natoʼo, “Yaku podo mowuti-wuti,” siwiamo pai tau wando anu mampogeleka parewa mpoʼiwali anu da napomarugi.
20Ane pumpurimo kaju, da matemo apu;
ane bemoreʼe tau anu joke jila da meʼontomo popaiso.
21Ewa wuri pai kaju anu mampakareka apu;
ewanceʼemo tau anu bampaiso mampareʼe kaʼase.
22Petuluri setu mawongi ndaepe;
napokono ntau mangaomo.
23Ewa potaʼa ngkura tana anu ndaparadaka salaka,
ewanceʼemo tau anu momi paunya, paikanya rayanya majaʼa.
24Tau anu basina momi waʼa mpaunya
paikanya ri rayanya buke pombamba.
25Mau ndakita siʼa madago raya, neʼe boi nupoaya monco,
maka sina ndaya anu mangkuasai rayanya.
26Mau napesambunika kasina ndayanya,
pura-pura tau da mangangkita kajaʼanya.
27Isema anu mangkae tilombu da naka manawu tau ntaninya,
siʼa da manawu ri rayanya.
Isema anu mangaduli watu da napampere tau ntaninya,
siʼa ngkalionya anu da napere mbatu setu.
28Mambambasi tau siwia pai mampobanciika siʼa.
Pai anu momi mampareʼe karugi.
