PAIMBA 28
28
Panyomba anu da ndawianaka sandeme-sandeme
28:1-8
(Pa. 29:38-46)
1-2Ndapokau i mPue i Musa mamparataka to Isaraeli da naparindaya kojo ntau seʼe, da naka ri waʼa ntempo anu roo ndapakanoto, da ndapanyombaka waʼa mpanyomba anu motaʼa pangkoni anu da mampakawongko raya i mPue.
3Seʼimo panyomba anu sangaya-ngaya da ndapanyombaka ri Pue: Tila mpanyomba sandeme-sandeme, radua ana bimba laki anu nepa santaʼu tinuwunya pai bereʼe posarinya, 4anu sambaʼa ndapanyombaka ri mowuro, pai anu sambaʼa woʼu ndapanyombaka ri ngkinowia. 5Sangkani-ngkani pai ana bimba setu sangaya-ngaya da ndapanyombaka sambaʼa kilo tarigu ndagaloka sambaʼa literi lana saitu anu madago kojo. 6Incetumo panyomba anu ndaʼombasi sandeme-sandeme anu kaʼisa ngkaninya ndapanyombaka ri Buyu Sinai. Wau mpasoanya mampakawongko raya i mPue. 7Sangkani-ngkani pai ana bimba setu sangaya-ngaya da ndapanyombaka woʼu sambaʼa literi anggoro anu ndabubusika lampaʼani. 8Ana bimba anu ndapanyombaka ri ngkinowia siwia pai cara ndapampanyombaka panyomba ri mpowuro, sangkani pai ue anggoro. Wau mpasoa mpanyomba anu ndaʼombasi setu mampakawongko raya i mPue.
Panyomba ri eo Umapo
28:9-10
9 #
Mat. 12:5
Ri eo Umapo da ndapanyombaka radua ana bimba laki anu nepa santaʼu tinuwunya pai bereʼe posarinya, radua kila tarigu ndagaloka lana saitu, tila mpanyomba anu motaʼa pangkoni pai panyomba ue anggoro. 10Panyomba anu ndaʼombasi setu sangaya-ngaya da ndapanyombaka sangkani-sangkani eo Umapo, mewali pondangani ri panyomba anu ndawianaka sandeme-sandeme sangkani-ngkani pai panyomba ue anggoronya.
Panyomba ri sambaʼa eo mbuya
28:11-15
11Ri pontepuʼu eo mbuya sambuya-sambuya seʼe sangaya-ngaya da ndapanyombaka ri Pue panyomba anu ndaʼombasi, inceʼemo radua japi laki anu mangurapa, sambaʼa bimba laki, papitu ana bimba laki anu nepa santaʼu tinuwunya, pura-pura anu bereʼe posarinya. 12Panyomba anu motaʼa pangkoni sangaya-ngaya da ndapanyombaka tarigu anu ndagaloka lana saitu; sambaʼa japi laki da tatogo kilo tarigu, sambaʼa bimba laki da radua kilo tarigu, 13pai sambaʼa ana bimba laki da sambaʼa kilo tarigu. Panyomba anu ndaʼombasi setu motaʼa panyomba pangkoni, wau mpasoanya mampakawongko raya i mPue. 14Sangkani-ngkani pai panyomba anu ndaʼombasi setu, sangaya-ngaya da ndapanyombaka woʼu panyomba ue anggoro, sambaʼa japi laki da radua literi ue anggoro, sambaʼa bimba laki da sambaʼa pai santongo literi ue anggoro, sambaʼa ana bimba laki da sambaʼa literi ue anggoro. Inceʼemo padika kono panyomba anu ndaʼombasi anu sangaya-ngaya da ndapanyombaka ri sambaʼa eo mbuya wungka-wungka wuya santaʼu seʼe. 15Rangani mpanyomba anu ndaʼombasi anu roo ndapakanoto pai panyomba ue anggoronya, sangaya-ngaya da ndipanyombaka woʼu sambaʼa mbula laki mewali panyomba ngkabareʼenya ndakitanaka salaa.
Panyomba ri Posusa Roti Bendaragi
28:16-25
(Tad. 23:5-14)
16 #
Pa. 12:1-13, Paw. 16:1-2 Ri sampuyu pai aopo eo mbuya kaʼisa, inceʼemo eo Pasa i mPue. 17#Pa. 12:14-20, 23:15, 34:18, Paw. 16:3-8 Bangke reme sampuyu pai alima eo mbuya, montepuʼumo Posusa Roti anu bareʼe Ndaragi, pai papitu eo kasaenya komi bareʼe maya mangkoni roti anu mampake ragi. 18Ri eo anu kaʼisa posusa setu komi sangaya-ngaya da mampareʼe potobu manyomba, pai bareʼe maya mawianaka tetala anu manee. 19Panyombakamo ri Pue panyomba anu ndaʼombasi, radua japi laki anu mangurapa, sambaʼa bimba laki, pai papitu ana bimba laki anu nepa santaʼu tinuwunya, pura-pura setu bereʼe posarinya. 20Panyombaka panyomba motaʼa pangkoni anu roo ndapakanoto, inceʼemo tarigu ndagaloka lana saitu: sambaʼa japi laki da tatogo kilo tarigu, sambaʼa bimba laki da radua kilo tarigu, 21sambaʼa ana bimba laki da sambaʼa kilo tarigu. 22Da ndipanyombaka woʼu sambaʼa mbula mewali panyomba ngkabareʼenya ndakitanaka salaa. Ewanceʼe da ndipawianaka upacara ngkatesompo salaa ntau sondo. 23Pura-puea panyomba setu mewali pondangani panyomba anu ndaʼombasi anu biasa ndawianaka sampowuro-sampowuro. 24Ri upacara mpanyomba setu sangaya-ngaya da ndiapnyombaka woʼu anu ndaʼombasi ri raya anu papitu ndeme. Panyomba setu mewali pondangani ri panyomba anu ndaʼombasi sandeme-sandeme pai panyomba ue anggoronya. Wau mpasoa mpanyomba setu mampakawongko raya i mPue. 25Ri eo anu kapapitu komi sangaya-ngaya da mawianaka potobu manyomba pai bareʼe maya mawianaka tetala manee.
Panyomba ri Posusa mPadungku
28:26-31
(Tad. 23:15-22)
26 #
Pa. 23:16, 34:22, Paw. 16:9-12 Ri eo anu kaʼisa Posusa mPadungku, inceʼemo posusa kaliunyamo papitu minggu, ungka ri tempo pampanyombakami gandu dawoʼu ri Pue, komi sangaya-ngaya da mampareʼe potobu manyomba, pai bareʼe maya mawianaka tetala manee. 27Panyombakamo ri Pue panyomba anu ndaʼombasi, inceʼemo radua japi laki, sambaʼa bimba laki anu mangurapa pai papitu ana bimba laki anu tinuwu santaʼu, pura-pura setu bereʼe posarinya. Wau mpasoa anu ndaʼombasi setu mampakawongko raya i mPue. 28Panyombakamo panyomba pangkoni anu ndapakanoto, inceʼemo tarigu ndagaloka lana saitu: sambaʼa japi laki da tatogo kilo tarigu, sambaʼa bimba laki da radua kilo tarigu, 29pai sambaʼa ana bimba da sambaʼa kilo tarigu. 30Panyombakamo woʼu sambaʼa mbula laki mewali panyomba ngkabareʼenya ndakitanaka salaa. Ewanceʼemo da ndipawianaka upacara ngkatesompo ncalaa ntau sondo. 31Waʼampanyomba setu sangkani pai panyomba anggoronya mewali pondangani ri panyomba anu ndaʼombasi sandeme-sandeme pai panyomba pangkoni.
