TADUMPANYOMBA 2
2
Pangkoni anu ndapanyombaka
2:1-16
1Ane reʼe sambaʼa tau anu mampanyombaka pangkoni ri Pue, panyombanya setu da motaʼa ri tarigu anu madago kojo anu ndagaloka lana saitu pai ndadikaka dupa ri wawonya. 2Da nakeni panyomba setu ri waʼa ntadu mpanyomba muli i Haruni. Tadu mpanyomba anu mamporiokoi setu da mantima sangkaku tarigu pai lana saitunya pai pura-pura dupanya, nepa natunju ri wawo lampaʼani, da mewali tanda kapura-puranya setu roomo ndapanyombaka ri Pue. Wau mpangkoni anu ndapanyombaka setu mampakawongko raya raya i mPue. 3Waʼa yabi mpanyomba setu inceʼemo tila waʼa ntadu mpanyomba. Pombai setu magali mpodago maka ndatima ungka ri pombai anu roomo ndapanyombaka ri Pue.
4Ane anu ndapanyombaka setu roti anu ndapakananamo ri kareʼe pampowia roti, roti setu da neʼe ndadikaka ragi. Roti setu maya makumba, ndapowia ungka ri tarigu anu maʼalusu kojo ndagalo pai lana saitu, madago woʼu kukisi anu ndaleroka lana saitu.
5Ane anu ndapanyombaka setu roti anu ndatunu ri kareʼe mpantunu roti, roti setu da ndapowia ungka ri tarigu anu maʼalusu kojo, ndagalo pai lana saitu pai bareʼe maya mampake ragi. 6Roti anu ndapanyombaka setu sangaya-ngaya da ndabira-bira nepa ndabubusika lana saitu.
7Ane anu ndapanyombaka setu roti anu ndakukusi ri kawali, roti setu da ndapowia ungka ri tarigu anu maʼalusu kojo pai lana saitu. 8Roti anu ewanceʼe pampowia da ndapanyombaka ri Pue pai da ndapepombaika ri tadu mpanyomba anu da mangkeni ri lampaʼani. 9Tadu mpanyomba setu da mantima santila roti setu nepa naʼombasi ri wawo lampaʼani, mewali tanda kapura-puranya roomo ndapanyombaka ri Pue. Waunya mampakawongko raya i mPue. 10Yabi mpanyomba setu inceʼe tila waʼa ntadu mpanyomba. Roti setu magali mpodago maka ndatima ungka ri pangkoni anu roomo ndapanyombaka ri Pue.
11Panyomba pangkoni anu ndapanyombaka ri Pue, bareʼe maya ndagaloka juyu bara ragi, maka juyu pairagi bareʼe maya ndatunju ndapanyombaka ri Pue. 12Ungka ri uyu mbua bangani njamaami santaʼu-santaʼu, santila sangaya-ngaya da ndipanyombaka ri Pue, paikanya bareʼe maya ndatunju ri wawo lampaʼani. 13Pura-pura panyomba anu motaʼa pangkoni sangaya-ngaya da ndidikaka bure, inceʼe petondoni pojanji i mPue Ala pai komi. Mewali pura-pura panyomba da ndadikaka bure. 14Ane komi mampanyombaka gandu uyu mpotami, ndikenimo gandu dawoʼu anu roo ndatuja mewalimo tarigu bara anu roo ndatunu. 15Gandu setu sangaya-ngaya da ndagaloka lana saitu pai da ndadikaka dupa ri wawonya. 16I Tadumpayomba sangaya-ngaya da maʼombasi santila ungka ri gandu pai lana setu sangkani pai pura-pura dupa, mewali petondoni kapura-puranya roomo ndapanyombaka ri Pue.
