YESAYA 2
2
Kaʼuono anu bereʼe kapusanya
2:1-5
(Mi. 4:1-3)
1Seʼimo patiendo i mPue Ala kono Yahuda pai Yerusale anu natarima i Yesaya ana i Amosi:
2Ri reme-reme anu nepa da rata
pongku ntana kareʼe Banua i mPue meuntu-untu ndateka
pai toa mekakore
ri wawo waʼa buyu pai waʼa mpongku.
Mpengaya-ngaya banca mangguyu-ngguyu njoʼu njairia,
3tau seʼe pura-pura mangantoʼo,
“Maʼimo tapandake ri Pongku ntana i mPue,
njoʼu ri Banua mPue Ala pue nto Isaraeli.
Sira anu da mampaguruka kita
nunjaa anu da tawianaka.
Kita da mangalulu jaya-A,
maka pompaguru i mPue ungka ri Yerusale kamaʼinya,
Sira mompau ungka ri Sioni.”
4 #
Yo. 3:10, Mi. 4:3 Sira da mangabotusi ri oyo waʼa lemba,
pai mangabotusi kara-kara waʼa banca.
Penai da ndapalu mewali pajeko,
pai tawala da ndapapewali tibo.
Waʼa banca bareʼemo da moʼiwali,
pai bareʼemo da mampatikali da poʼiwali.
5Ee waʼa muli i Yako,
maʼimo tapelinja ri raya ndeme i mPue!
Tau mekiunde da ndapakagero
2:6-22
6Boo Pue Ala, Komi mampalaikamo waʼa ntaumi, muli i Yako! Maka samalele ri tana seʼi, waʼa ntau mampakemo sigawu anu ungka ri pebetenya pai ungka ri Pelisiti. Waʼa ntau mancuemo ada ntau mencua. 7Tananya buke salaka pai wuyawa, pai aga-aganya maʼai ngkasondo. Nyaranya maʼai ngkasondo, pai karetanya bareʼe ndaincani imbanya. 8Ri mbeʼi-mbeʼi njau lamoa, pai tau seʼe mampanyomba waʼa nturuki anu napowia ntau seʼe ngkalionya.
9Sambaʼa-sambaʼa tau da ndapetikodi pai ndapasinggiri. Neʼe ndipokapuru tau seʼe boo Pue!
10 #
Pepat. 6:15, 2 Tes. 1:9 Tau seʼe da mampesuaki waʼa mbayau anu njau ri waʼa roka mbatu, bara mangkae wayau ri tana da napantambo karau ndaya i mPue pai ungka ri kuasaa anu bangke. 11Tau anu mobangke-bangke da ndapetikodi pai tau anu mekiunde da ndapapeʼuru. Podo i Pue ngkalioa anu da ndabangkei. 12Ri eo setu i Pue Anu Makuasa da mampapeʼuru pura-pura anu mobangke-bangke pai mekiunde. 13Waʼa ngkaju cemara anu malangkati ri Libano pai pura-pura nunu bangke ri Basani da ndagero. 14Waʼa buyu pai waʼa mpongku anu lese da ndapalene. 15Waʼa menara anu ndateka pai waʼa tembo bente da ndaruasi. 16Waʼa ngkapala apu anu bangke pai maʼai ngkadolidinya da ndapakalatu. 17Tau anu mekiunde da ndapetikodi, pai tau anu mobangke-bangke da ndapapeʼuru. Podo i Pue ngkalioa anu da ndabangkei. 18Waʼa lamoa pura-pura da ndapakapaya.
19-21Ri tempo mponggale i mPue manjuasi lino, tau da mesua ri raya mbayau ri roka-roka mbatu bara mangkae wayau ri tana da naka lapa ungka ri karau ndaya i mPue pai ungka ri kuasaa anu meawa. Pai ane rata ri eo setu, waʼa lamoa salaka pai wuyawa anu napowia pai napanyomba ntau seʼe setu da napalaika waseʼemo jamo da napeari mbalesu pai raupa.
22Mewali, neʼe boi ndisarumaka tolino anu podo awu ntana, maka siʼa bereʼe olinya.
