SETERI 9
9
Ponggale nto Yahudi maewa waʼa iwalinya
9:1-19
1Mewali ratamo kojo ri sampuyu pai tatogo eo mbuya Adari, inceʼemo eo anu ndapakanoto ri sura i datu kono to Yahudi. Eo setu lawi natanga-tangamo waʼa iwali nto Yahudi da napaleʼo mangkuasai to Yahudi. Paikanya tongawa to Yahudi anu manangi tau seʼe. 2Ri pura-pura kota to Yahudi mompasambaka pai sintuwu kojo mampoʼiwalika waʼa ntau anu majaʼa tinako ndayanya ri tau seʼe. Waʼa banca ri mbeʼi-mbeʼi ntano mampokaekamo tau seʼe painaka bereʼe mau sambaʼa tau anu mantaha mancuaraki tau seʼe. 3Pai pura-pura tau bangke ri poropinci, pai waʼa mpetoro waʼa bupati pai waʼa ntopoparenta ri pura-pura lemba mantulungi to Yahudi maka maeka raya ntau seʼe i Modekai. 4Maka samalele lemba anu naparenta i datu pura-pura tau mangaincani i Modekai setu ndapeʼuruki ri langkanae, pai kakobangke-bangke woʼu kakuasanya. 5Ewanceʼemo painaka naleʼo nto waʼa Yahudi mampowia waʼa iwalinya malulu pepokono ntau seʼe, tau seʼe mampake penai mampepate waʼa iwalinya.
6Ri Susani kareʼe mpotunda ngkamokole, napepate nto Yahudi 500 tau. 7-10Ri oyo ntau anu mate setu njau sampuyu ana tuama i Hamani ana i Hamedata iwali bangke nto Yahudi. Tau seʼe setu inceʼemo: i Parasandata, i Daliponi, i Asipata, i Porata, i Adaliya, i Aridata, i Paramasita, i Arisai, i Aridai pai i Waisata. Paikanya waʼa nto Yahudi setu bareʼe mamuru.
11Ri eo setu seʼe naparata ntau ri datu, imba ntau anu ndapepate ri kota Susani. 12Ndatoʼo i datu ri Datu Weʼa Seteri, “Nepa ri Susani seʼi napepatemo nto Yahudi 500 tau, tesuamo sampuyu ana i Hamani setu. Pagonya ri poropinci! Bara nunjaamo anu napowia ntau seʼe njairia! Mewali seʼi nunjaa woʼu anu nuperapi? Toʼomo sangaya-ngaya da kuwai!”
13Mesono i Seteri, natoʼo, “Ane mabuya rayami Datu, to Yahudi anu reʼe ri kota Susani seʼi, iraneo mowuro ntongo da ndawaika tempo da mawianaka ewa anu mewali ri sandeme seʼi, pai waʼa watangkoro ana i Hamani setu da ndaloeka ri nono mpoloeka.” 14Nepa nawai i datu songka da naka ndawianaka perapi i Seteri setu; sura mparenta podo tila ngkota Susani pai waʼa watangkoro ana i Hamani anu sampuyu tau setu ndaloeka ri nono mpoloeka. 15Mewali ri sampuyu pai aopo eo mbuya Adari, waʼa nto Yahudi ri kota Susana mompasambaka woʼu pai mampepate woʼu 300 tau ri kota setu. Pai ri sangkani seʼi woʼu tau seʼe bareʼe mamuru.
16Waʼa nto Yahudi anu reʼe ri poropinci mompasambaka woʼu majagai koronya. Naleʼo ntau seʼe manangi iwalinya napepate 75.000 tau anu mampobanciika tau seʼe. Pai tau seʼe bareʼe woʼu mamuru. 17Katepewalinya setu podo ri sampuyu pai tatogo eo mbuya Adari pai ri sampuyu pai aopo eo mbuya setu bemoreʼe tau anu napepate, paikanya tau seʼe mampareʼe posusa mampokawongko eo setu. 18Paikanya waʼa nto Yahudi ri kota Susana mamposusaka ri sampuyu pai alima eo mbuya ewa eo bangke, maka tau seʼe roo mampepate iwali ri sampuyu pai tatogo pai sampuyu pai aopo eo mbuya, nepa meʼonto ri sampuyu pai alima eo mbuya. 19Inceʼe puʼunya painaka waʼa nto Yahudi anu meari ri waʼa ngkota anu kodi mangaendo eo setu ri sampuyu pai aopo eo mbuya Adari, mewali eo kawongko ndaya, ri eo setu ndapareʼe posusa ngkawongko-wongko ndaya, mampombewaika pangkoni.
Posusa Purimi
9:20-23
20Roo setu naʼuki i Modekai pura-pura anu mewali setu nepa napakatu sura ri pura-pura to Yahudi anu reʼe ri lemba mpoparenta Parisia anu lawa bara mosu. 21Bangani ncura setu inceʼe songka da naka santaʼu-santaʼu da ndapareʼe posusa ri sampuyu pai aopo pai sampuyu pai alima eo mbuya Adari. 22Maka ri eo-eo setumo panganangi ntau seʼe waʼa iwali ntau seʼe, painaka kasusa pai kapari ndaya tebalisaka mewali kawongko ndaya pai kalindo ndaya. Inceʼe painaka tau seʼe sangaya-ngaya da mamposusaka waʼa eo setu, ri posusa pai polimbu mangkoni mampombewaika pangkoni pai mampotilaka kabuya ndaya ri waʼa ntau kaasi-asi. 23Nalulu nto Yahudi songka i Modekai setu, ewanceʼemo pewalinya posusa setu mewali ada anu ndapobiasamo santaʼu-santaʼu.
Anu mewali setu ane ndapakaʼede ewaseʼi tuntukanya
9:24-32
24 #
Set. 3:7
I Hamani ana i Hamedata setu muli i Agago, iwali bangke nto Yahudi, siʼa mantende dadu anu ndapapotoʼoka “Purimi” da mampakanoto eo da napalebatusaka waʼa nto Yahudi; inceʼe tinako ndayanya da maʼopisaka waʼa nto Yahudi. 25Paikanya i Seteri mencuara i datu, pai i datu mawai songka anu ndaʼuki, anu mayondoni tinako ndaya i Hamani setu jakono koronya ngkalionya, painaka siʼa sangkani pai waʼa ananya ndaloeka ri nono mpoloeka. 26Inceʼe painaka waʼa eo bangke setu ndapapotoʼoka Purimi. Sura i Modekai pai mpengaya-ngaya anu naepe nto Yahudi, 27mampapopuʼu tau seʼe mampareʼe podede ncongka tila ntau seʼe ngkalionya pai waʼa mulinya pai tila ntau pura-pura anu mewali tina nto Yahudi. Malulu podede ncongka setu santaʼu-santaʼu tau seʼe sangaya-ngaya da mamposusaka radua eo anu roo napakanoto i Modekai. 28Ndapakanoto woʼu rantani masae-sae waʼa eo Purimi sangaya-ngaya da naendo pai da nabangkei pura-pura sombori nto Yahudi popalapi-lapi tau ri pura-pura poropinci pai pura-pura kota.
29Simpoyunu pai sura i Modekai; i Datu Weʼa Seteri ana i Abihaili maʼuki sura anu karadua, anu mampakaroso bangani ncura i Modekai kono Purimi setu. 30Sura setu ndapakatu ri pura-pura to Yahudi, pai sura anu ndapampalimba sura setu ndapakatu ri 127 poropinci ri lemba mparenta Parisia. Sura setu nayunuki mpekakai mpekakai da naka waʼa nto Yahudi lindo pai maʼuono katuwunya. 31Sura setu woʼu maʼiowaka da naka tau seʼe pai waʼa mulinya mangaendo waʼa eo Purimi ri tempo anu ndapakanoto, da ewa napangaendo ntau seʼe posusa pai kapari ndaya. Inceʼemo bangani ncura i Modekai pai i Datu Weʼa Seteri. 32Songka i Seteri anu mampakanoto waʼa podede ncongka kono Purimi setu, pura-pura ndaʼuki.
