2 TESALONIKA 3
3
Ndipekakaimo tila mami
3:1-5
1Kapusanya ee waʼa ngkasangkompo, ndipekakaimo tila mami. Ndipekakaika da naka nuntu ungka ri Pue, da maliga katebambarinya, pai da nasabe mpodago ntau, ewa pewalinya ri komi owi. 2Ndipekakaika da naka i Pue Ala mancorepaka kami ungka ri pale ntau anu bareʼe tumoro pai majaʼa. Maka bareʼe pura-pura tau da maaya nuntu ungka ri Pue Ala seʼe.
3Paikanya i Pue todo pai bareʼe mangumbali. Sira da mampakaroso pai da mangkantawi komi ri suara i Majaʼa. 4Pai kami kaaya kojo i Pue kakononya komi, kakominya ntongo mawianaka pai da mawianaka mpaliu nunjaa anu roomo kapokauka komi.
5Mbolimo i Pue da mamponinika komi da naka kakoteranga-rangani parata ndayami kakononya i Pue Ala mampotowe komi pai kaʼi Kerisitu mawai katodo ri komi.
Pampari-mpari tetala
3:6-15
6Ee waʼa ngkasangkompo, ri raya ngkuasa i Yesu Kerisitu, kasongka komi da naka nditilawangi katuwu waʼa ntau anu podo molose-lose, pai bareʼe malulu waʼa anu roo kapaguruka tau seʼe. 7Ndiincanimo ewambeʼi da ndipalulu pandiri ngkatuwu mami. Kami bareʼe molose-lose ri katuwu mami ri oyomi. 8Kami bareʼe mangkoni pangkoni ntau ane bareʼe kabayari. Paikanya ri eo ri wengi kami motetala ri gori mpangkoto mami da naka neʼe reʼe tau kapakasusa ri oyomi; 9inceʼe banya posokinya kami bareʼe maya mamperapi komi da mantulungi kami, paikanya kami da mewali pandiri ri komi. 10Sindara kami ntongo reʼepa ri oyomi, kawaika komi songka seʼi, “Tau anu bareʼe napokono motetala, bareʼe maya mangkoni.”
11Inceʼe katoʼoka komi maka kadonge reʼe waʼa ntau ri oyomi anu tuwu podo molose-lose. Tau seʼe podo masalempori tetala ntau ntaninya, pai bereʼe bara nunjaa-njaa anu napotetalaka. 12Ri raya ngkuasa i Yesu Kerisitu kasongka pai kapatiendo waʼa ntau setu, da naka tau seʼe motetala mpodago mampepali anu da nakatuwuka ngkalionya.
13Mau ewanceʼe ee waʼa ngkasangkompo, neʼe boi pura rayami da mampowia anu madago. 14Bara da reʼe tau anu bareʼe napokono malulu nunjaa anu katoʼo ri raya ncura seʼi. Mewali da ndipatomata tau anu ewanceʼe, neʼe ndiposintuwuka tau setu da naka maea matanya. 15Paikanya neʼe ndipowia siʼa ewa iwali, paikanya da nditotoraka siʼa ewa sambaʼa kasangkompomi.
Totoraka kapusanya
3:16-18
16I Pue inceʼemo puʼu ngkalindo ndayata, mbolimo Sira bareʼe bali-bali mawaika komi karodo ndaya ri mpengaya-ngaya. Mbolimo i Pue da sangkani-ngkani komi pura-pura.
17Tabea ungka ri yaku, i Paulu. Tila kapusanya seʼi yaku ngkalioku anu maʼuki. Inceʼimo bate mpaleku ri pura-pura suraku.
18Mbolimo Pueta i Yesu Kerisitu da mangadonco komi pura-pura.
Petubunaka ungka ri kami, Paulu
