2 SEMUELI 2
2
I Daudi ndalanti mewali mokole nto Yahuda
2:1-7
1Ungka lairia meoasi i Daudi ri Pue, natoʼo, “mPue, bara nditinako ndaya yaku da njoʼu mamparenta waʼa ngkota nto Yahuda?”
Mesono i Pue, ndatoʼo, “Io.”
Meoasi woʼu i Daudi, natoʼo, “Kota anu mbeʼi?”
Mesono i Pue, ndatoʼo, “Heberoni.” 2#1 Sem. 25:42-43 Inceʼe painaka njoʼumo i Daudi ri kota Heberoni, napoyunu rongonya radua i Ahinoa to Yisirieli pai i Abigai bemba i Naba to Karameli. 3Ewanceʼe seʼe waʼa ntaunya sangkani pai waʼa ncomborinya sambaʼa-sambaʼa seʼe malulu malulu i Daudi, maroo-roo tau seʼe ri Heberoni pai lipu anu sampotenginya. 4#1 Sem. 31:11-13 Ungka lairia, ratamo waʼa nto Yahuda mangalanti i Daudi mewali mokole ntau seʼe.
Butu nadonge i Daudi kabuya ndaya nto Yabesi ri Gilea, madayo wata ngkoro i Saulu, 5napokau tau njoʼu ri Gilea, mamparata patuunya ewaseʼi natoʼo, “Mbolimo i Pue da mangadonco komi ua ndipampakoroka wata ngkoroa. 6Inceʼe painaka i Pue da mampatongawa towe pai puru ndayaa ri komi. Yaku woʼu da mangantuju kapande ndayaku ri komi ua powiami anu madago setu. 7Ndipakarosomo rayami pai ndiponggalemo ewa powia ntau makoje! I Saulu mokolemi lawi matemo, paikanya to Yahuda roomo malanti yaku mewali mokole ntau seʼe.”
Isibose ndapapewali mokole nto Isaraeli
2:8-11
8Tadulako ncurodado i Ncaulu, inceʼemo i Abineri ana i Neri, moloncomo sangkani-ngkani pai Isibose ana i Ncaulu njoʼu ri Mahanai ri sambote ngKoro Yarade. 9Njairia i Abineri mangalanti Isibose mewali mokole ri waʼa wilaya Gilea, Asuri, Yisirieli, Eparai pai Benyami, tesuamo samalele Isaraeli. 10Isibose tinuwu aopo mpuyu ntaʼu ri pewalinya mokole nto Isaraeli, pai siʼa moparenta radua ntaʼu kasaenya.
Paikanya lemba i Yahuda todo ri Daudi, 11pai i Daudi moparenta ri Heberoni ri to Yahuda papitu ntaʼu santongo kasaenya.
Poʼiwali nto Isaraeli pai to Yahuda
2:12–3:1
12Ri anu sandeme i Abineri malai ungka Mahanai njoʼu ri kota Gibeo, nayunuki waʼa ntau Isibose. 13I Yoabi woʼu (inenya mampotoʼo i Seruya), sangkani-ngkani pai waʼa ntau i Daudi da njoʼu woʼu ri kota setu. Radua ntibura anu da moʼiwali setu mombe tango-tango mampoyo limbo Gibeo: I Abineri pai waʼa ntaunya ri sambote seʼi, i Yoabi pai waʼa ntaunya ri sambote njau. 14Ungka lairia meboomo i Abineri ri Yoabi, natoʼo, “Yoabi, da tapokau bara tesangkuja tauta da tasawu mombeluku!”
Mesono i Yoabi, natoʼo, “Madago.”
15Mesuwumo sampuyu pai radua to Benyami, sarungkoro Isibose, mesuwu woʼu sampuyu pai radua tau i Daudi. 16Ungka lairia mombelukumo tua rua mpuyu pai aopo setu, mombenoʼo ri wuyua, mombejalo-jalo rantani mate sangkani-ngkani tau seʼe. Inceʼe painaka tana santongo setu, ndapapotoʼoka, “Bonde mPenai”.
17Roo pombeluku ntau ndasawu setu, mombetotomo tau seʼe pura-pura, maʼai kojo kedoro mpombetoto setu painaka tetumba panangi i Abineri pai surodadonya nanangi waʼa ntau i Daudi. 18Tatogo ana i Seruya inceʼemo i Yoabi, i Abisai pai i Asaeli njau ri pombetoto setu. I Asaeli magasi molonco ndalanti-lantika ewa polonco lagiwa, 19inceʼe painaka naduduki mpaliu i Abineri. 20Meeli i Abineri, meoasi siʼa natoʼo, “Sikomo i Asaeli anu maduduki yaku?
Mesono i Asaeli, natoʼo, “Io, yaku!”
21Natoʼo i Abineri, “Neʼe nuʼilawu yaku! Koisa soko sambaʼa surodado sinjau nepa nutima parewa mpoʼiwalinya!” Paikanya bareʼe naaya i Asaeli, jana ilawu mpaliu i Abineri. 22Sangkani woʼu naseko i Abineri, natoʼo, “Neʼe nuʼilawu yaku! Boi da kupepate siko! Ane mate siko, ewambeʼi da kupasambunika lioku da momberata pai tukakamu i Yoabi?” 23Pai ua bareʼe napokono i Asaeli meʼonto maʼilawu i Abineri, inceʼe painaka napetasoka ntaliku i Abineri tawalanya kono kompo i Asaeli, polasi ri wawo atenya. Madungka i Asaeli liu-liu mate njairia. Pura-pura tau anu moliu njairia mangkita i Asaeli njau mombole-mbole mate, teʼonto njairia.
24Paikanya i Yoabi pai Abisari melinja mpaliu maduduki i Abineri. Butu soyomo reme ratamo tau seʼe ri Pongku ntana Ama, tondo ri pebetea Gia, simpontu pada bone Gibeo. 25Njairia mompasambaʼa-mbaʼa woʼu to Benyami pai Abineri, nepa nawali mpatimama muni waʼa ncurodadonya, ri pongku ntana setu. 26Meboomo i Abineri ri Yoabi ungka ri pongku ntana setu natoʼo, “Yoabi, ara da mombetoto mpaliu kita seʼi? Bara bareʼe nunawa-nawa poʼiwalita seʼi podo marangani kapari ngkatuwuta? Kami seʼi waʼa ngkasangkompomu anu sambaʼa-mbaʼa banca. Sangkuja ngkasae woʼu pampokonomu mopea nepa da nutoʼoka waʼa ncurodadomu da naka napeʼontoka maduduki kami?”
27Mesono i Yoabi, natoʼo, “Mamposabi i Pue Ala anu tuwu, ane bareʼe ronga meboo siko roo, lawi waʼa ntauku moiwomo da maduduki komi rantani bangke reme raneo.” 28Roo mompau ewanceʼe, natawuisi i Yoabi surupetanya, mewali petondoni da naka meʼonto waʼa ntaunya maduduki to Isaraeli, inceʼe painaka teʼontomo poʼiwali ntau seʼe.
29Inceʼe painaka malaimo i Abineri pai waʼa ncurodadonya melinja mpaliu sambengi setu maliu Rato Yarade, nepa mowote ri Koro Yarade, sandeme muntu woʼu pelinja ntau seʼe nepa rata ri Mahanai.
30Ungka lairia napasambakamo i Yoabi waʼa ncurodadonya pura-pura, naparesa, narata sampuyu pai sasio tau anu bareʼemo reʼe, bareʼepa tesua i Asaeli. 31Paikanya 360 tau to Isaraeli anu napoyunu i Abineri ungka ri to Benyami anu naleʼo ntau i Daudi mampepate. 32Nakenimo i Yoabi pai waʼa ntaunya watangkoro i Asaeli nepa nadayo ntau seʼe ri dayo panta ri Beteleme. Roo setu melinja mbengi tau seʼe njoʼu ri Heberoni, mosu reme nepa rata tau seʼe njairia.
