Wïlöölö 45
45
Kanya Ö Jocepi Na Caan Dëëre Jï Uutwänni
1Kanyøgøøni kär løny jï Jocep ki man mak cwïnye këët buut jøøa cuŋŋö buute, ni ö eni ni tïŋ dwøre maal døc ni kööe, «Beerra man aac jøwi buuta bëët.» Ni aac jiyi bëët, ni bäŋ dhaanhø mør mo dööŋ buute. Køøre dëëre acaane jï uutwänni. 2Ni jwöŋe ni dwøre ena maal døc, ni wïnynyi ya jø Ijepi, ni caani jï jø po Peerø.
3Ni kö Jocepi jï uutwänni, ni «Aana Jocep.» Ni kööe, ni «?Wära poot kwøw møn?» 'Ba bäŋ gïn mo løk uutwänni jïre, kiper geni cwïnyge abwøk nyïme.
4Køøre Jocep aköö jï uutwänni, «Nyänhnhu buuta kany.» Køøre gena nyiik buute. Ni kööe, ni «Aana owääu ma Jocep ŋata gathu na kïth Ijep. 5'Ba ennø, këël na bëëde naa you gathø, kär cwïnynyu pädhö ni gootu ki dëëtu keeru, kiper Jwøk aana jääŋŋe nyïmmu kiper nee jiy kwøwge ki køøra. 6Kiper meel atïmö ni dagø piny bäre ki cwiiyi na ariiø ii, ni poot da cwiiri ma abïïc mo poot no odööŋ ni bäŋ puur wala kac beel. 7'Ba Jwøk aana jääŋŋe nyïmmu kiper nou bøthu ni dööŋŋu nou kwøw bäät piny ki køør køny mare na dwøŋ. 8Kiper manøgø nø, paa uuni na jääŋ aani kany, 'ba beeye Jwøk, ni bee eni na tïïc aani kaamar wää Peerø, ni näga kwäärö yi paare bäre, ni tïïc aani ni aana kwäärö bäät ŋööm Ijep bäre.
9«Ennø, laaru ci baŋ wära ni caannu gø jïre, ni ‹Wäädï ma Jocep aköö, ni «Aana tïïc Jwøki na kwäärö yi Ijep bäre. Ö baŋa pööthi. Kärï ruu. 10Ïïno bëëdö yi ŋööm Göcën, ni karï cään ki aani, ïïni, ki nyïïï, ki nyïïkwaayï, ki dïëgï, ki dhäk moï, ki gïïa en jïrï bëët. 11Ni aani ïïno kønya kunöce, kiper poot da cwiic meel abïïc mo poot no odööŋ mo öö, niï ba tïmï niï can ki gïn cam, ïïni wala tuuŋu wala gïïa en jïrï bëët.» ›
12«Kawaane ajootu ki nyeŋŋu, ni jooti ya coka ma Benjamen ni beeye aani ki dëëra na cäänö ki uuni en. 13Kwär mara yi Ijep ki gïïa jootu bëët dou caanø jï wära. 'Ba ennø, laaru aay ni kälu wära kany.»
14Køøre Jocep dëëtge agäämge ki coki ma Benjamen ni jwöŋe, ni ö Benjamenni ni jwöŋe ni dëëtge ege gäämö ki coki. 15Ni ö eni ni nuum dhøk uutwänni bëët ni jwöŋe bäätge. Køøre uut wänni atägö ki man wääge ki eni.
16'Ba na ö luummögø na wïnye po Peerø, ni cöök Jocepi ki uutwänni bëët aöö, Peerø yie atïmö ni met, këël jø kööre moe bëët. 17Ni ko Peerø jï Jocep, «Caanï jï uutwäru, ni Peerø aköö, ni ‹Kïthu bäät lääy mou ki beel, ni døøu ŋööm Keenan, 18ni kälu wääu ki tuŋu baŋa. Køøre uuno mooa ki ŋøøm mo beyø døc yi Ijep, ni cam maru oen ri gïïa beyø paani.› »
19Ni cäŋ Peerø köö jï Jocep, ni «Wär caanï jïge thuwø, ni kööï, ni ‹Kädu Ijep ki jïëthe mo wø tut okwëënyi kiper nyïïu moa therø ki määru, ni kälu wääu ni ööu. Beerra man tïïyu gïnögø. 20Kär dee gïn lääŋŋu kiper jammi mou, kiper jammi moa beyø na en yi ŋööm Ijep bäre otïmö na mou.› »
21Køøre wäät Icriel gïnögø atïïcge. Ni ö Jocepi ni cïp jïëth wø tut okwëënyi jïge kaawat mana caan Peerø, ni mooc geni ki cam kiper wääth marge. 22Ni mooc ŋati man nø ka abïïe mo beyø mo røø dëëre. 'Ba Benjamen amooe ki gwel ma dïpe adäk ka abïïe abïïc mo beyø. 23Ni jääk baŋ wänni ki gïï mo thööth. Ni gïïa jääŋŋe baŋ wänni kiper wääth mare beege arëëni apaar mo bäätge päŋ ki jap Ijep moa beyø, ka arëëni apaar ma mädhi mo bäätge päŋ ki beel ki dääpe ki cam. 24Køøre eni uutwänni awëëk wääth ni aacge. 'Ba na aacge, ena köö jïge, «Käru pïëmö øtjöö.»
25Køøre gena aay ni wecge Ijep ni öge Keenan baŋ wääge ma Jeekap. 26Ni caange gø jïre, ni «Jocep poot kwøw, ni bee eni na kwäärö yi ŋööm Ijep bäre.» 'Ba wääge cwïnye abwøk, kiper gïna caange käre ŋäädhö. 27Køøre luup bëët moa caan Jocepi jïge acaange jïre. 'Ba kanya ö wääge ma Jeekap na joot jïëth wø tut okwëënyi moa jääŋ Jocepi nee eni kääri ki ge, jwïëy moe aput duu ree. 28Ni kö wääge ma Icriel, «Arømø nø. Wääda ma Jocep poot kwøw. Kawaane a cøø nee eni neena kany poode naa poot kär thøw en.»
Seçili Olanlar:
Wïlöölö 45: AnyuB
Vurgu
Kopyala
Karşılaştır
Paylaş
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© The Bible Society of Ethiopia