Numera Nuarin-tas alupas 13.
Nuarin-tas alupas 13.
1 Niji idai atimi iji ig er abrai ra mika eri apan ara um ahilek inpece. 17 Niji tas alep imi ra. 21 Nauritai ura. 26 Intas asuptecnaig ura.
1IS tas a Ihova ehele Moses, um ika,
2Namu abrai atimi aiek mika eri aijidjid inpece Kenan inig ara, ek alupai nup Isreel ainyak: akumu abrai natimi aijaua, yi athi um athi ehni, irai iji ahaiji nup Isreel, erumu ilpu atimi alupas ura ara asega.
3Is abrai ra a Moses an namasacen Peran vai intas alep u Ihova: eris ilpu atimi alupas u nup Isreel ara sji ehki asega.
4Nidai ra ji igki; nan, Samua inhal u Sakur irai ilpu mapoi Ruben.
5Im Sefat inhal u Horai irai ilpu mapoi Simeon.
6Im Keleb inhal u Jefunni irai ilpu mapoi Juta.
7Im Aical inhal u Josef irai ilpu mapoi Isakar.
8Im Osia inhal u Nun irai ilpu mapoi Ifreem.
9Im Paltai inhal u Refu irai ilpu mapoi Benjamin.
10Im Catiel inhal u Sotai irai ilpu mapoi Sebulun.
11Im Catai inhal u Susai irai ilpu mapoi Josef, ilpu ahrei Manasi marom.
12Im Amiel inhal u Cemalai irai ilpu mapoi Tan.
13Im Sidur inhal u Maikeel irai ilpu mapoi Eser.
14Im Nebai inhal u Vofsai irai ilpu mapoi Naftalai.
15Im Ciuel inhal u Mekai irai ilpu mapoi Cat.
16Nidai natimi iji ehki ji igki is abraig pan ra a Moses par aijidjid inpece. Is anvi nidai Osia inhal u Nun a Moses par ika Josua.
17Is abrai ra a Moses mika eri aijidjid inpece Kenan ara, um ika ehele ra, Akumu apan an nuarin inig et ahes nuritoga iran aijaua um aridjai an lolan nedoon.
18Um almoi inpece, par ato; im natimi iji ig era amen iran ara, kit era emda ara ka auatialidi, kit era ahinag ara ka era eti elpat;
19im inpece inig era amen iran ara, kit et upene ka et has; im lep niji maliyum era amen iran ara, kit irai eom apelumai, ka irai eom hat;
20im lep nobohtan inigki, kit et aiyu ka et acen, kit et eteuc nesei iran, ka oʼo? Etmu emda inliinmopomia aijaua, um imiapam nohwai itai an pece. Is opan meto o inhupnai vaine iyehki.
21Eris aridjai ara, um aijidjid inpece nahes vaig an namasacen Sin um yetpan Rihob, an nefalaig yetpan Hemad.
22Eris aridjai an nuarin inig et ahes nuritoga iran ara, um yetpan Hibron; ehtijis amen eahki a Ahaiman im Seseai, im Talmeai ehtaij mapoi Enak. (Eris uhup um actaig inmaliyum Hibron, ja is wat ti pan itac inmesese is seven eris actaig inmaliyum Soan an pece Ijipt.)
23Eris apan ara an niskanse Eskol, um acaldei inrai vaine is ethi is amen iran nigan, erus aijiro iran natimi is ero an nauincai; eris lep apos nohwai pomcranet ara, im nohwai ateg.
24Nidan nuarin iyehki niskanse Eskol, va nigai vaine iyehki eris acaldei eahki a nup Isreel.
25Eris aijidjid inpece ira adiat is forte ara, ja par adumoij.
26Eris lep apan ehele Moses im Eron im nup Isreel asega ara Ketes, an namasacen Peran, um asuptecnaig intas ehele rau, im lep ehele atimi asega, um ehvaig ehele ra nohwai itai an pece.
27Eris tas ehelen ara, um ika, Ecris apan aijama an pece as abraig pan cama iran aiek, et idim alupas nidenided im hune iran; nohwai itai iran nigki.
28Ja era emda natimi amen an pece, et arehed irai maliyum ura niji athatahau, et lep esjilid acen: ecris lep almoi ilpu mapoi Enak aijama eahki.
29Era amen a nup Amalek an pece inig et ahes nuritoga iran: era lep amen a nup u Hed, im nup u Jibus, im nup Emor irai lola edoon: era lep amen a nup u Kenan ubutpotet pan u injap, im lep an nahaijin Jortan.
30Is ago eropse inliinmopoi atimi a Keleb an nuhup u Moses, um ika, Intumu auroauro akaija um aridjai, um ohuun inpece; inta emda akaija par atimarid iran.
31Ja eris ika natimi iji ehki eris ahced yin, Inta auatialidi akaija par apan um ago nedoa vai nup eahki; era esjilid iraija ara.
32Eris lep asan tas has ara ehele nup Isreel vai inpece iyehki eris aijidjid ara, um ika, Inpece iyehki ecris atga iran aijama par aijidjid, et idim inpece atleg atimi iran; et lep alupas nohu atimi asega ecris almoi aijama iran.
33Ecris almoi ilpu atimi ijinies aijama eahki, nikavaig, ilpu mapoi Enak, eris ahes irai ilpu atimi actal-actal ara: ecris idivaig heled aijama an nuhup unyima im lep an nuhup ura.
Seçili Olanlar:
Numera Nuarin-tas alupas 13.: ABO
Vurgu
Kopyala
Karşılaştır
Paylaş
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)