Mâk 9
9
1Ne Jisos o-chîraa o-ca kashú o/fu, zîim m̂ ńkyín ba/fu, banet bakíri mbe nyín ḿbé baa*ba/chi ba-kpú* tata ba-ri Butu ḿbú Osówo ké boo/byí ne busa.
Byiko ḿbyí Jisos byi/yángê
(Mátyuu 17:1-13; Lûk 9:28-36)
2Ne ńdyí ací a/bashwôm nyâchât, Jisos o-kpî Pyíta ne Jêmsyi ne Jǒn ba-dim ne nyǐ, ba-yú kyíbóng-kaku ńké ka/nyâam, mbé bayén báyen. Ne ńdyí bǎmgbán emen mbe ba-tún n, byiko ḿbyí Jisos byi/yángê. 3Ne byídí emen byi-kpet ecé kpárádádát byi-shwôm ḿbyí nang yeě ké ejíí odaman esoo. 4Bǎmgbán emen ámbe ashí achât ba-ri okúsí-Elája ne okúsí-Músis ḿbé ba/mû ba-pem m ne Jisos. 5Ne Pyíta o-raa ne Jisos o/fu, ntánge byiraa-Osówo, nkyi chwǒm ńkyí kyinong ńkyí be byimu něen nyín. Be byi/chi byi-chi boompyep buchât, kabónge ńké eyên, kabónge ńké Músis, kabónge ńké Elája. 6Pyíta o/mû o*fí o-nyît ng ńkyí odachîsét* ké ebóng, nyǐ ne bábe ḿbé áku ba/mû ba-kú ba-shî ng kanong kanong.
7Ófíbí o-byí o-cít kámbé, ne ejá e-fím ké ófíbí ámu e-raa e/fu, nyín něen Wǎn ejí mú dyityém. Fwôo n̂g atông ba-jwo ǎ. 8Bǎmgbán emen ba-pín achi ochéé óchee ba-tún, nké ba*da/chîri onet okíri* kyi-cibi ne Jisos kǎnchí*.
9Ńdyí ba-kú ba-shû ng kaku ánke ba-bâ, Jisos o/kuri kámbé ekó o/fu, *da n̂g echi ba-sét onet nang obónge ńkyí ba/ri* tete Wǎn-Onet o-jwóbê ké bukyû.
10Mbé ba-bángê ké ekó nyí o/kuri kámbé, nké mbé ba/kpet epem ne barî kyi-kim ne chwǒm ńkyín ba/fu, ojwóbe ké bukyû mún o/byí nǎ. 11Ne mbé ba-bí Jisos ba/fu, ebóng kyi/chi ne bantánge Byije-Músis mbe ba-sét ng ba/fu, Elája o-man n o-bâ kpá.
12Nyǐ o-faa kámbé o/fu, Elája ntûntû o-bwóp ng kashú, o-ba-nap kángkáng byěm o-tî. Nké ebóng kyi/chi ne ejá-Osówo nyí ba/sáng kyísí e/fu, Wǎn-Onet o/chi o-ri busông chwóó ne ba/chi ba-né ǎ. 13Nké me mu n-sét ng běn kâng n/fu, Elája oo/bê. Banet to ba/chi ǎ kángkáng byěm ḿbyí mbé ba/mû ba-ryuu ng wǎ eringe nyí ejá-Osówo nyí ba/sáng kyísí e/sét kyi-kim ne nyǐ.
Jisos o/chi Wǎsíng-Onyinchéng mú mu ne Kyibî-Bucí o-nyange
(Mátyuu 17:14-21; Lûk 9:37-43)
14Ké nkéré Jisos ne bǎmgbán emen ámbe ashí achât ba/bwa esim ba-kâm bǎmgbán emen ḿbé áku, mbé ba/ri bujê-banet ányi chwóó. Bantánge Byije-Músis bakíri ba/mû ányi ba-kán n ké dyishí ne bǎmgbán-Jisos. 15Ńdyí banet ámbe ba-ri ng Jisos ba-bâ, kyi/chi kámbé wǎ chwǒm-akat, ne ba-byí ne ochéé ba-kâm ǎ, ba-ta ǎ kyiraa. 16Jisos o-bí bǎmgbán emen o/fu, ben bamu ba-kán n ké dyishí ne banet ḿbén kyi-kim ne ebóng.
17Onyinchéng obónge ké burwám-bujê-banet ámbe o-faa o/fu, ntánge byiraa-Osówo, me m/bê ne wǎn ejí n-kâm ǒ, ké ebóng, mu ne kyibî-bucí ké byiko ńkyí kii/chi ǎ o/waa kiǐmyímé. 18Nang nkéré orá nké bucí ámbu bu/kám ǎ, bu-twóp ng ǎ kyísí, biimpún byi-kpet ǎ ebyí ké ocím, o-ryí i asháng, ne o-naang naang byiko byimúmú. N/sét bǎmgbán eyên n/fu, baró ǎ kámbú, nké ba*da/man eró*.
19Ne Jisos o-raa ne mbé o/fu, ben bwǎn-bafî, obánge o*fí běn*. Me n-rí i nǎ ne ben. N-cíp ng dyityém n-kyú ne ben ké aje afěng. Bâ n̂g mě ne wǎn ámu. 20Ba-bâ ne wǎn ámu ba-kye Jisos.
Bucí ámbu bu-ri ng Jisos bu-bâ, bu-ziri wǎn ámu banê ké byiko kanong kanong. Fím ányi o-myii kyísí o-kpet eshwa, biimpún byi-kpet ǎ ebyí ké ocím. 21Jisos o-bí bonchí-wǎn ámu o/fu, bucí ḿbún boo/rí ǎ aje afěng ké byiko.
Bonchí-wǎn ámu o-faa o/fu, kyi/fím ǎ ne dyikwá. 22Boo/twóp ǎ ké kafâ-okwâ ne ké kafâ-kace kampén kampén, eringe nyí buda ǎ eju. Nké â wo a-man n echi, ri bě bafip a-chwáp bě.
23Ne Jisos o-raa ne nyǐ o/fu, âa, â wo to a-man n echi. Nang yeě nké o/fé dyityém emen ne me, onet ámu o-man n echi kángkáng byěm.
24Bonchí-wǎn ámu o-waa ké abe ányi o-wonge o/fu, me mu n-fâ dyityém ejí ne wo, nké n*fí n-fâ chwóó*. Chwáp mě n-fé dyityém ejí chwóó ne wo.
25Jisos o-kpúrî o-ri eringe bujê-banet bu-kú bu-cít ng kámbé bu-bâ, ne o-nyán kyibî-bucí ánkyi o/fu, bucí ḿbú mbu kiǐmyímé, me n/kye busa n/fu, byí wǎn mún ké byiko. *Dachi a-chîbwa esim a-ba-nung ǎ ké byiko*.
26Bucí ámbu bu-wonge kakânkakân, bu-ziri wǎn ámu kyibî-banê, ne bu-byí ǎ ké byiko. Wǎn ámu o-firi éné wǎ kyikwóm-okúsí. Ké bubwô ámbu, banet ba/kpet eraa ba/fu, oo/kpú. 27Nké Jisos o/níbî wǎn ámu ké bubwô o-chwáp ǎ, o-bêem ǎ, ne o-bûu nensang.
28Ké nkéré Jisos oo/dim o-nung ké kafâ-kyise, bǎmgbán emen ba-bí ǎ, ńdyí onet okíri o*fí ne mbé ányi* ba/fu, ebóng ńkyí be byi*da/man eró bucí ámbu*.
29Jisos o-faa kámbé o/fu, nshwam efé nké nke odaman eró dyizong-bucí ńdyín. *Chí chwǒm kyikíri*.
Jisos o/chîpem kyi-kim ne Bukyû Emen
(Mátyuu 17:22-23; Lûk 9:43-45)
30Jisos ne bǎmgbán emen ba-mîng kyikit ánkyi, ba-cen ba-shwôm esí nyí Gályílyi. Jisos o/mû o*fí o-ryuu ng o/fu, onet nang obónge onyît kyikit ńkyí nyǐ mu* 31ké ebóng, nyǐ o/mû o-tángê e bǎmgbán emen o/fu, ba/chi ba-kám Wǎn-Onet ba-kye banet ḿbé ba/chi ba-ju ǎ. Nké ké ací achât, o/chi o-jwóbê ké bukyû.
32Bǎmgbán emen ba*da/nyît eringe nyí chwǒm ńkyí mu o-tángê e kámbé něen kyi/byí*. Nké mbé ba/mû mbe ba-shî ng ǎ ebí.
Yeě o/rêe o-shwôm
(Mátyuu 18:1-5; Lûk 9:46-48)
33Ńdyí baa/cen tete ba-da-ribi ké Kapánum, ne ba-da-nung ké kyise, Jisos o-bí bǎmgbán emen o/fu, ebóng chwǒm ńkyí ben ba/mû ba-kán n barî ké dyishí ké nkéré byimu byi-cen n byi-bâ ké bukwóp.
34Nké mbé ba*da ǎ eman efaa ojá* ké ebóng, ké nkéré ba/mû mbe ba-cen n ba-bâ ké bukwóp, ba/mû ba-kán n barî ké dyishí kyi-kim ne onet mú mu kiǐtí o-shwôm ké burwám ebe. 35Jisos o-kyú me, o-kó bǎmgbán emen ámbe ashí diǐkpú ne afee, ne o-raa ne mbé o/fu, nang yeě nké mu o-ryuu ng o/fu, nyǐ o-kyú u mbwôp kashú, o-man o-bwa ne byiko emen kyísí o-kyú ḿgbán mú ashí amúmú. 36Jisos o-yip wǎn-ojújwô o-bi ké bushú-bǎmgbán emen. Ne o-kpárê wǎn ámu o-fé ké byiká, ne o-raa ne bǎmgbán emen o/fu, 37nang yeě nké o/koo dyizong-wǎn-ojújwô něen obónge o-tî ǎ kanong ké bubwô ejí, ányi onet ámu o/koo mě to. Nké nang yeě to nké o/koo mě me, o*da mě ekoo me nké nke* nké o/koo to nyǐ mú o/twóm mě.
Onet mú o*fí o-ciring ng Bě* mu ne Be
(Lûk 9:49-50)
38Jǒn o/sét Jisos o/fu, ntánge byiraa-Osówo, be byi/ri onyinchéng obónge mú mu o-yip ng dyizîn ńdyí eyên o-ró ng byibî-bací. Be byi/sét ǎ byi/fu, omîng, ké ebóng, nyǐ o*fí ké burwám eten*.
39Jisos o-sét bǎmgbán emen o/fu, *da n̂g ǎ echîsét ba/fu, omîng* ké ebóng, nang yeě nké o/yip dyizîn ńdyí ejí o-chi kiǐtí-akat oo*man ewaa ké abe ányi o-raa byibî-byěm kyi-kim ne me*. 40Eringe ebónge, nang yeě nké o*fí o-ciring ng bě* ányi onet ámu mu ne be. 41Ké ntûntû, me mu n-sét ng běn n/fu, nang yeě nké o/kye běn omu ba-jwáp, ké ebóng, o/fu, ben ba-chi i banet ḿbé onet mú Osówo o/kúng ǎ butu, onet ámu o/chi o-koo eyáré emen.
Okan mú Byibî echi
(Mátyuu 18:6-9; Lûk 17:1-2)
42Nké nang yeě nké o/chi wǎn-ojújwô wǎ mún o-né dyityém emen efé ne me, kyi-nwa ng kyi-shwôm ńkyí badatú dyizong-onet ándyi kiimbâng-kyirim-buká ké kyitông emen ba-twóp ǎ ké kafâ-baya. 43Nké â bubwô eyên nké mbu bu-chi i ǒ a-né mě, két kámbú a-twóp. Kyi-nwa ng ńkyí adanung ne bubwô bubónge ké dyikpen ńdyí ne banyá, kyi-shwôm ńkyí adakyú ne abwô afee a-jâ ké kyikit-busông eri ké okwâ mú oo*ribî ne banyá*. [ 44Ányi nké banyabang ḿbé badaryí enyam-byiko-banet baa*kpú ne banyá* nang okwâ to oo*ríbî*.] 45Nké â nang kyiká eyên nké nkyi kyi-chi i ǒ a-né mě, két kánkyí a-twóp. Kyi-nwa ng ńkyí adanung ne kyiká kyibónge ké dyikpen ńdyí ne banyá, kyi-shwôm ńkyí adakyú ne byiká byifee, ba-yip ǒ ba-twóp ké kyikit-busông eri. [ 46Ányi nké banyabang ḿbé badaryí enyam-byiko-banet baa*kpú ne banyá* nang okwâ to oo*ríbî*.] 47Nké â nang dyichi eyên nké ndyi dyi-chi i ǒ a-né mě, zú kándyí a-twóp. Nkyi kanong ńkyí wo adanung ké Butu ḿbú Osówo ne dyichi dyibónge, kyi-shwôm ńkyí bada ǒ etwóp ké kyikit-busông eri ne achi afee. 48Ányi nké banyabang ḿbé badaryí enyam-byiko-banet baa*kpú ne banyá* nang okwâ to oo*ríbî*.
49Ké ebóng, nang yeě ba/chi ba-fé ǎ okwâ ké byiko, wǎ eringe badafé bano ké byiryíng. 50Bano mbe kiǐtí-chwǒm, nké â bunyîn emen boo/man, wo a-cen n nǎ ne a-chîchi bunyîn emen bu-chîbwa esim. Bunyîn wǎ ḿbú bano bukyú běn ké atyém, ba-kyú to ké bunyîn-dyityém ne barî-banet.
Seçili Olanlar:
Mâk 9: BKY
Vurgu
Kopyala
Karşılaştır
Paylaş
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
Published by the Bible Society of Nigeria @ 1985
