Yaakobho 5
5
Yaakobho arakaania abhaamë abhamangarru
1Bhoono bhëënyu abhaamë, munyitegherre bhuuya! Mukuure, mobhaabhayere bhököngʼu, ko okoghera iya inyanko enene eno murinyoora. 2Ubhwamë ubhwënyu bhwaghunda, na singibho isyënyu syareebhwa na rikonde. 3Esahaabhu iyëënyu na seehera isyënyu, seena ikutu, na ikutu iyö, nerebha ekemanyërryö ikiiya kö-bhëënyu bhono mokosarya ëbhëntö ibhya ubhwamë ubhwënyu, ku bhuyö Waryobha naraabhashibhi bhörrö kya hano omorro ghwasikya ëkëntö. Hayö nkwikomanërya mörë emongo ku-sinsikö seno isya umuhiko.
4Mwitegherre mbatëëbhi, mwaanga okohaka ehoorohooro ko abhaköri abhëënyu abha emeremo bhano bhaabhaghësëëyë ibhyakorya kö-mëghöndö ighyënyu. Ehoorohooro iyö, erabhakorra ko-Monene Waryobha uwa obhotoro bhwonswe igho! 5Mwikaayë morashomerwa na ubhwamë ubhwënyu ubhwaru bhono moonabho ko-kebhara kono, ko okokora igho, mwisëëmëri ku-rusikö urwa okobhotorrwa ikiina kya itugho ënöru iya okoghooghwa. 6Möbhötööyë ibhiina na ukwita abhantö abha heene bhano bhatakwitanga amangʼana aghëënyu.
Möghömërri Omonene Yëësu nkuusha arë
7Ku bhuyö abhakumya bharikyane, möghömërringa okohekera enkaagha eno Omonene Yëësu ariisha. Bhëënyu temokomaaha igha ömörëmi nkoghanyërrya arë ibhyakorya ibhyaye kö-möghöndö, takobhehoobherra hë? Kasi nkoghanya arë ömöghöndö ughwaye ghöhëësi ibhyakorya ibhiiya. Ku bhuyö nköghömërrya arë okohekera hano ömöghöndö ughwaye ghurinyoora imbura iya mbere na iya omooka.
8Ku bhuyö na bhëënyu bhonswe möghömërringa, na okoterema mo-senkoro isyënyu, ko bhoora igha, Omonene haangʼë arë akyore. 9Abhakumya bharikyane, motakaatemananga amasoro motakaasha okobhotorwa ikiina. Motamaaha! Umwahokania ono arebhotorra abhantö bhonswe igho ibhiina ibhyabho, haangʼë arë akyore.
10Abhakumya bharikyane, momaahere ko-bharööti bhano bhaaghambanga ku ubhwera ubhwa Omonene Waryobha. Bhayö bhabhe ëkërëngyö ikya ököghömërrya inyaanyi. 11Momaahe mbe, abhantö bhano tukwitegherra igha bhangʼoorwa m-baara bhaaghömërrya inyanko. Mwaighwa amangʼana agha ököghömërrya ukwa Ayubhu, na ghwiki mmomanyirë bhono Omonene Waryobha yaamökörëëyë amaiya ku-muhiko.#5:11 Maaha mo-ketabho ikya Ayubhu 42:10-13. Ghayö ghonswe igho nkwörökya gharë igha, Omonene Waryobha wa heene naana amaabhë.
12Abhakumya bharikyane, engʼana enene okokera ghonswe igho, ni-igha motakaatyananga ëkëntö kyokyonswe keera, nkekaabha ekebhara handë mu-ryobha. Kasi hano mwikërëëyi engʼana, mughikërri këmwë. Na hano mwangirë engʼana, mughyanga këmwë. Moghambenga obhoheene, hano motakörrë igho, mobhotorrwa ikiina.
Mosabhenga Waryobha eno moona umukumo
13Hano oraanyoore ömöntö aana inyanko mö-bhëënyu muyö, ni-igha asaasaame Waryobha. Na hano oraanyoore ömöntö ashömëëywë mö-bhëënyu muyö, ni-igha arëëti amarëëtyö agha ukukumya Waryobha.
14Hano oraanyoore ömöntö aröörrë, ömörööyë uyö ni-igha arekerre amangʼana abhaghaaka abhatangati abha ekanisa, okore bhaashe bhamohake amaghuta na okomosabhera ku iriina irya Omonene Yëësu. 15Hano abhantö bhayö bharaamosabhere ku umukumo, naraahwene. Omonene Yëësu naraamöghörröki, na hano oraanyoore akörrë ëbhëbhë, naraabherwe. 16Ku bhuyö, mohongorranenga ëbhëbhë ibhyënyu na okosabherana ku-Waryobha, okore muhwënibhwinga amarööyë aghëënyu. Okosabha ukwa ömöntö uwa heene, nkoona singuru sinsharu isya okokora amangʼana amarito.
17Ömörööti Ëriya, m-möntö yaarë kya bhëëtö. Ömörööti uyö, akakora omotono ughwa okasaasaama igha imbura etakaatwa ku-kyaro ikya Isiraëri. Imbura ekamara imyoka etatö na imyëri esansabha etatöönyirë ku-kyaro kiyö.#5:17 Maaha mo-ketabho ikya 1 Abhakama 17:1. 18Mbe, ghwiki akasaasaama Waryobha igha imbura etwe. Imbura ekatwa, abhantö bhakanyoora ibhyakorya.#5:18 Maaha mo-ketabho ikya 1 Abhakama 18:42-45.
19Abhakumya bharikyane, hano oraanyoore ömöntö mö-bhëënyu muyö atëëyirë ko amangʼana agha obhoheene ubhwa Waryobha, ömöntö amukyöri, 20amanye igha, noraanyoore akyörri ömöntö uwa ëbhëbhë ukurwa mö-bhëbhë ibhyaye. Noraanyoore ahönëri ömöntö uyö uruku, na ömöntö uyö, naraabherwe ëbhëbhë ibhyaru bheno aanabhyo.
© 2021, Wycliffe Bible Translators, Inc. All rights reserved.